EZEKIELI 32 - Bibilia Kui Mdedie fo Kimochi

Farao aṟinganyisho na kinyau

¹ Mkonu fo kuwoka fo meri fo ikumi na kawi maka fo ikumi na kawi wokia lulesamiṟo, idedo lya Mndumii-Ruwa likanjichea lyehamba:

² “Iyo mndu! Imba kisuku ochifihiṟia Farao, mangi o Misri. Iyo Farao nulekuwona ke iyo nyi mwiso kiidi kya mkambo ya wandu, kyaindi iyo nyi ukeri cha kinyau kikeri mṟingenyi: Ambuya nyi nokekure ko pfinya ipfo medenyi yapfo, kowefohafoha mṟingafo ko madende hapfo, kowefanyitsa meda yo.

³ Inyi Mndumii-Ruwa ngahamba njidi: ‘Njikeri isoṟowitsa mdeho foko huyapfo, wandu wo nyi wechikudeha na mdehofo foko.

⁴ Ambuya nyi njechikudosia handu hahadutsu. Osehu njiweende malehe hose hadamie huyapfo, njiwehenda iihutsa mando hose ha ngeṟenyi kui nyama tsa mbihu fopfo.

⁵ Lingise njechihenda iṟaṟanja nyama tsapfo mafuvunyi, na mapichi hose hahende iichuṟo mnying'a fopfo.

⁶ Ambuya nyi njechinosa oruka kui samu yapfo mṟasa mafumvunyi, na maṟumbuchu nyi hechiichuo samu yapfo.

⁷ Kiheri kyo njihenda ikuombotsa, ruwehu nyi kochiwada mema, na nyenyeri tsechiidima iwaa sepfo, na wudo na mnengeṟi nyi njechifushikia na mapuchi, manya meri fochiidima iwaasepfo.

⁸ Ambuya njikeri ihenda irumisha ngela tsose tsa ruwehu, na oruka nyi lochirambalala meema, Nyi Inyi Mndumii-Ruwa ngahamba.’

⁹ “Njikeri ihenda isotsia wandu wafoi fowa, mandiho njihenda ikuduo wusingenyi kiidi kya mkambo ya wandu njoruka ulawetsiichi.

¹⁰ ‘Mbonyi tsi tsapfo nyi tsechiṟihisha wandu wa mkambo ifoi, wamangi nyi wechidedema kipfa kyapfo, kiheri kyo njihenda ihoṟuo oshu loko huyapfo. Ambuya nyi wechihenda idedema orio kiheri, orio mndu nechihenda ikusaṟa kya moo foke, mkonu fulya uihenda irumatso.

¹¹ Kyamba Inyi Mndumii-Ruwa ngahamba, Oshu lo Mangi o Babuloni ni lochikuhoya.

¹² Kyamba wandu wapfo sa wafoi nyi wechihenda iwoho ko oshu lo mbahanyi, wandu wai walang'a kota wandu wa mkambo ingi yose. Iwa nyi wechihenda imarisa ikudosa lya Misri lyose, kyamba wandu wapfo wose nyi wechiwoho.

¹³ Ambuya njikeri irumatsa shiuma shose wambaṟa ya meda fo Nili, Kipfa kya ikyo kuwodese mndu ang'u shiuma shefohase mṟinga fopfo sepfo.

¹⁴ Nahong'u njechiharamisha mṟinga fo meda fo, nafo fusoke cha mafuda. Nyi Inyi Mndumii-Ruwa ngahamba.’

¹⁵ “Kyamba ili mandi njikeri ihenda ihaluo orukalo lo Misri nuka ya msanga, na masaa hake hose hadao, na wandu wake wose wahende iwoho, nahong'u nyi wechiwutaho imanya ke Inyi nyi Mndumii-Ruwa.

¹⁶ “Iki nyi kiimbo kya kilio, wakawo wa mkambo ya wandu wechiimba, kyamba wahenda iimba kipfa kya Misri na wandu wake wose. Nyi Inyi Mndumii-Ruwa ngahamba.”

Oruka lo wapfu

¹⁷ Kyasia meri fo kuwoka mkonu fo ikumi na katanu, maka fo ikumi na kawi wokia losamiṟio wusingenyi, idedo lya Mndumii-Ruwa likanjichea lyechihamba;

¹⁸ “Iyo mndu! Henda ichio makulili wandu wo wafoi wa Misri, waduo mṟasa ko wapfu handu hamu na wandu wa mkambo ifoi iwode pfinya wahende hamu nawo wakeri ihenda ko wapfu.

¹⁹ Kewawienyi, ngesa nyo mui wecha kota u? Hendenyi ipfo ko wapfu muhende ikaapfo hamu na wandu walya walaichi Ruwa!

²⁰ Wamisri nyi wakeri iarisika handu hamu na walya waleho shidenyi. Kyamba oshu nyi luhoṟuo lokombetsa Wamisri hamu na wandu wake sa wafoi.

²¹ Wanene waapfinya hamu na watarami wawo wakeri ipfo ko wapfu wechihamba le! Ambuya Wamisri nyi wasokia ko wapfu, wakawesanzo hamu na walya walawadine, walya walewoho shidenyi.”

²² “Waashuru na ipfo ipfo wakeri, wawaṟingichie nyi shipfu sha mbahanyi, wose iwa nyi walewahio shidenyi.

²³ Shipfu sho shawo nyi shisoṟowie wanda mnu ipfo ko wapfu. Mbahanyitso tsawo nyi tsilepfia shidenyi na shipfu sho shawo nyi shiwatengetie. Iwa wose walewoho nyi waweoweshie mnu wandu wa mkambo ili wawei na moo.

²⁴ “Waelamu nyi na ipfo ipfo wakeri, nawo nyi wawatengetie nyi shipfu sha mbahanyi tsawo tsilepfia shidenyi. Iwa wose walawadine nyi walesokia ko wapfu. Kiheri kyo wawei na moo nyi waweoweshie mnu mamiingi fo wandu. Kyaindi wulalu wakeri iiṟeenze hamu naiwo wasokie ko wapfu.

²⁵ Wulalu nyi wawalaṟe handu hamu na mbahanyi tsake kiidi kya walya wose walewoho shidenyi. Wakaweṟingichio nyi shipfu sha mbahanyi tsake iwa wose walewohio shidenyi na walaweiwadine. Kiheri kyo wawei na moo nyi waweoweshiye mnu kiidi kya mkambo ya wandu, kya indi wulalu nyi wawodo nyi sonu tsing'anyi hamu na walya walewohio shidenyi.

²⁶ “Wandu wa Mesheki na wa Tubali na ipfo wai, nawo nyi wai waṟingichie nyi shipfu sha mbahanyi tsawo. Iwa wose walawewadine nyi walepfia shidenyi, kiheri kyo wawei na moo nyi waweoweshie mnu kiidi kya wandu kunu orukenyi.

²⁷ Iwo walawewadine waleṟiko hamu na mbahanyi tsilya tsa kuwokapfo, iwa wawesokie ko wapfu hamu na shisha shawo, shoshu shawo huye ya mdo yawo na ngawo tsawo huye ya mbihu yawo. Mbahanyi kiheri kyo walawemepfe nyi waweoweshie mnu kiidi kya wandu wai na moo.

²⁸ Ambuya wulalu nyo wa Misri nyi muihenda irumatso muhende iṟiko kimu na walya walawadine iwo walepfia shidenyi

²⁹ “Waedomu na ipfo wakeri handu na mangi tsawo na wanene wawo wose. Kyamba kiheri kyo wawei na moo nyi wawewode pfinya ing'anyi, kyaindi wulalu nyi wai walaṟe ko wapfu hamu na walya walawadine msa walepfia shidenyi.

³⁰ “Kii kidi wanene wo wa wandu wawukie ora lo huye nyi naipfo wakeri, Wasidoni nawo wose nyi walewelungio kiidi kya wapfu. Kiheri kyo wawei wuyanenyi pfinya tsawo nyi tsiweoweshie mnu, kyaindi wulalu iwa walawewadine nyi wawalaṟe wanda ko sonu handu hamu na walya walepfia shidenyi. Ambuya nyi wakeri ikusanza ko sonu ipfo ko wapfu hamu na iwo walepfia shidenyi.

³¹ “Kiheri kyo Farao echiwona iwa wose nyi echiwuyo nyi moo kipfa nyi mamiingi ha mbahanyi tsake; nyi wudo Inyi Mndumii-Ruwa ngahamba.

³² Kyamba Farao nyi aweoweshie mnu wandu wai na moo, kyaindi wulalu nyi aihenda ilaṟo kiidi kya wandu walaiwadine, handu hamu na wandu walewoho ko oshu, ichu nyio Farao na wandu wake, nyi wudo Inyi Mndumii-Ruwa ngahamba.”