EZEKIELI 31 - Bibilia Kui Mdedie fo Kimochi

Misri yaṟinganyisho na mwerezi

¹ Mfiri fo kuwoka fo meri fo kaṟaṟu, maka fo ikumi na limu wokia lulesamiṟo, idedo lya Mndumii-Ruwa likanjichea lyechihamba:

² “Iyo mndu! Henda wia Farao mangi o Misri na wandu wake: ‘Ngesa wunene wopfo wufananyi na kiki?

³ Iyo nyi kimu na mwerezi fo Lebanoni, fuwode maṟamba na maṟa hafoi na itsinde lileshe. Mtsitisonyi fofo fushikie huye mapuchinyi.

⁴ Mṟinga fulelioṟisha, na shiṟoṟi sha mṟinga shilelinosa. Meda ilesoka handu liweoṟie, ikaweduo mṟinga fukaoṟisha mashidi hose ha ngeṟenyi.

⁵ Kipfa kya ikyo nyi fulelea kota mashidi hose ipfo ngeṟenyi. Maṟamba hafo hakang'ana na ipfo, kipfa kya mṟinga fufoi fulenosa mri yafo.

⁶ Shilehe shikasungusia sungu tsasho huyafo, wanda yafo mando ha ngeṟenyi haweshayapfo maalea hasho, nawudo mamiingi ha wandu wa mkambo wakawesia moo wanda ya mṟinje fofo.

⁷ Ikidi lyo liweloṟie wucha ko mng'ano folyo, na ko wuleshe wo maṟamba halyo, Mri yalyo iwesoṟowie wanda, mṟasa ikakoya mṟinga fufoi.

⁸ Kiidi kya mierezi iwekeri mdeminyi ya Mndumii-Ruwa, kuwewodepfo ikidi lyewa iṟing'anyisho nalyopfo. Manya misonobari ilewa iṟing'anyisho na maṟamba halyo pfo, manya mibambakofi iwewode maṟamba halyo pfo, manya mashidi hose hawekeri ipfo mdeminyi ya Mndumii-Ruwa haleidima koya wucha na kiweṟe chalyopfo.

⁹ Nyi inyi ngilefutana mcha ko maṟamba halyo hafoi, mashidi hose ha Edeni hakafunyeng'a iho hawekeri ipfo Mdeminyi fo Mndumii-Ruwa.’”

¹⁰ Kipfa kya ikyo, “Inyi Mndumii-Ruwa ngahamba njidi, kyamba iyo nyi ulelesheṟo wuleshi wopfo kiidi kya maṟamba hang'anyi na iyo kokushelia wuleshe wopfo,

¹¹ ambuya nyi njechikuwika mawokonyi ha mnene umu kiidi kya mkambo ya wandu Mnenechu nyi echifuhoṟuo. Inyi nyi ngafuwihitsia kuleshe kipfa kya wunyamaṟi woke.

¹² Kyamba wahenu wawukie mkambo ya wandu wai walang'a nyi wechifumanyamanya na ifuolotsa wanda wafudeho. Maṟamba hafo nyi hechiṟaṟanyikia mafuvuhu na mapichinyi; na wandu wose nyi wechikure maṟinjenyi hayo wakuhendie.

¹³ Shilehe shose nyi shechionyonyia ipfo kiidi kya mtsuhaṟo folyo, na mando hanja nyi hechichuma chuma maṟamba hapfo.

¹⁴ Iki nyi kilewutika kudo kundu orio ikidi likeri handu kuwode mṟinga lilaleyese na ikuiria huye ya mapuchi. Ikidi lyose lyekenoso lilakoyese wuleshi wo mbaṟi yo; kyamba mtsitsionyi fo orio kindo nyi opfu, manya wandu nawo; wose nyi wechisokia handu ha wapfu.

¹⁵ “Kyamba Inyi Mndumii-Ruwa ngahamba njidi. Ili mandi mweresi fochishika ko wapfu, njechifushikia na isulia ling'anyi lya meema; koikyo meda yose isotsa mṟinga njechiumiṟa. Lebanoni yose yechirumbalala mema puti, na mashidi hose ha ngeṟenyi nyi hechisoṟowia kipfa kyake.

¹⁶ Ambuya wandu wa mkambo nyi wechidedema kipfa kya chandu aihenda ioloka, kiheri kyo njechimsoṟowitsa ipfo ko wapfu hamu na iwo wose waisoṟowiapfo; hamu na mashidi hose ha Edeni, mashidi mecha hawemasambuṟe ha Lebanoni hawekenoso necha, iho nyi hechihenda iwihiṟio moo ipfo ko wapfu.

¹⁷ Iyo ilewesoṟowitsio ipfo ko wapfu hamu na walya wose wawekulungie nao, na walya wawekeonyonyia wanda ya mṟinje folyo.

¹⁸ Ko wucha na mng'ano kuwode ikidi lyose ipfo mdeminyi fo Edeni lyewa iṟinganyisho na ikidi lyopfo. Ambuya wulalule, iyo Farao nyi iyo ikidilyo. Nuhenda ikumbo ko wapfu handu hamu na mashidi ha Edeni. Nyiochihenda ikaa hamu na walya walaichi Ruwa na walya walewoho ko oshu. Nyi wudong'u ochihenda iwa iyo Farao handu hamu na wandu wapfo. Nyi Inyi Mndumii-Ruwa ngahamba.”