EZEKIELI 30 - Bibilia Kui Mdedie fo Kimochi

Mndumii-Ruwa nechikapa Misri

¹ Idedo lya Mndumii-Ruwa likanjichea lyechihamba;

² “Iyo mndu! Wutase wuikimbi ochihamba Inyi Mndumii-Ruwa ngahamba kudi: ‘Kapenyi kilio mochihamba ochia nyi lodu mkonu fulya.

³ Kyamba mkonu fulya nyi fotikiria, mkonu fulya fo Mndumii-Ruwa nyi fotikiria, Mkonu fo nyi fochiwa fo mapuchi, mkonufo nyi fochiwa fo ngapo ko wandu wa mkambo.

⁴ Shida yechihoya Misri, na fowa ing'anyi yechikaa kiidi kya oruka lo Kushi. Kyamba Wamisri wafoi wechiwoho, masaa hawo wechihaduo, na njomombo tsa mṟi yo yawo wechiiwunduo.

⁵ Kii kidi, wandu wose wawepfunganyi na Wamisri, Ethiopia, Puti, Ludi, Uarabu, na Libya wechisaramaya hamu nawo.’

⁶ “Inyi Mndumii-Ruwa ngahamba njidi: Walya wose wa lunganyi na Wamisri nyi wechisaramaya, Mbahanyi tsake tsiwode kiṟumi nyi wechisaramaya, kuwokia Migdoli itane Syene wandu wo nyi wechipfia shidenyi. Nyi Inyi Mndumii-Ruwa ngahamba.

⁷ Misri yechiwa wukiwa chando njoruka tsingi tsii wukiwa, na mṟi yo yake yechiwa njisame chando mṟi ingi isaramaye.

⁸ Mandiho njikeri ihenda ikoṟa Misri na modo hamu na walya wose wakemwikanyia, nyi lyondo wechiwutaho imanya ke inyi nyi Mndumii-Ruwa.

⁹ Ambuya kiheri kyo nyi njihenda iduma wandu wako ko wandu wa Ethiopia , kyamba wo nyi wekekuichika nyi wawode ofoṟo, Kyaindi wechidedema ili mandi Misri yechioloka. Ee, Nyi kya lohi mkonufo fukeri icha.

¹⁰ “Inyi Mndumii-Ruwa ngahamba njidi. Njechirumatsa wusuṟi wo Misri kui owoko lo Nebukadneza mangi o Babuloni.

¹¹ Kyamba Nebukadneza hamu na wandu wake nyi wai walang'a kota wandu wa mkambo ingi, wechidumo ikapana na Misri. Nawo wechiiria njoshu tsawo huye ya Misri, na orukalo loichiichuo mnying'a ya wandu wechiwoho.

¹² Ambuya, njikeri iumiṟa meda yose ya Misri, njihenda ikumbia wandu wawicho orukalo lo Misri. Ngoseṟa njihenda inyamaṟa orukalo lose ko mawoko ha wandu wahenu, Nyi Inyi Mndumii-Ruwa ngahamba.

¹³ “Inyi Mndumii-Ruwa ngahamba kudi; ambuya njikeri inyamaṟa sanamu tsose tsa maruwa ha wongo, na kulechiwonose sanamu ipfo Memfisi. Manya kochikaa kuwadese wumangi ipfo Misri pfo. Kii kidi nyi njechiinenga Wamisri wakae ko wuowu.

¹⁴ Ambuya mṟi fo Pathrosi njechifuhaluo fo wukiwa, na mṟi fo Soani nyi njechifukoṟa na modo, na mṟi fo Thebesi nyi njechifuhoṟuo.

¹⁵ Nyashi yako njihenda iolotsia Pelusiumu, fukeri mkusurie fo Wamisri, na wudo njechirahanyitsa Thebesi.

¹⁶ Ambuya njihenda iatsa modo oruka lo Misri. Pelusiumu wechisokio fowa ing'anyi, omombo lo Thebesi nyi lochiwunduyo, ambuya wakituwa wechikapa Memfisi kui mfiri.

¹⁷ Ambuya wanake wa Oni na Pi-besethi wechiwoho ko oshu, na wandu wo wengi wa mṟi yo nyi wechidao wusingenyi.

¹⁸ Kyamba ipfo Tahpanesi kochiwada meema, kiheri kyo njihenda ifunja pfinya ya Misri, na ikudosa lyake ling'anyi nyi lechitsitsa. Misri yechihenda ishikio na mapuchi na wandu wake nyi wechidao wusingenyi.

¹⁹ Kyamba nyi wudo njihenda ihoṟuo Misri. Na wandu wawuteho imanya ke Inyi nyi Mndumii-Ruwa.”

Ifunjika lya pfinya tsa Misri

²⁰ Nahong'u mfiri fo mfungade fo meri fo kuwoka, fo maka fo ikumi na limu wokia isamiṟo lyadu, idedo lya Mndumii-Ruwa likanjichea lyechihamba:

²¹ “Iyo mndu! Ambuya njilefunja kuwoko ko Farao mangi o Misri ambuya lui lupfunge chi kundu luchie naidime iirase oshu pfo.

²² Kipfa kya ikyo Inyi Mndumii-Ruwa ngahamba njidi: Njihenda ilimbana na Farao mangi o Misri. Ambuya nyi njikeri ihenda ifunja mawokoho hake hahawi, lulya lufunjikie na lulya lui lucha. Kipfa kya ikyo oshu lo awode kuwokonyi nyi lochioloka wanda.

²³ Njikeri ihenda iṟaṟanja Wamisri kiidi kya mkambo ingi ya wandu na iwawika njorukenyi tsingi.

²⁴ Ambuya njihenda iwikia mawoko ha Nebukadneza mangi o Babuloni pfinya, njiwewika oshu loko mawokonyi hake. Kyaindi njechifunja mawoko ho ha Farao, nao nyi echiṟohoṟa oshangunyi lo mangi o Babuloni cha mndu amfaṟe owicho.

²⁵ Njechiinenga mawoko ha mangi o Babuloni pfinya, kyaindi mawoko ha Farao njechihalehesha. Na oo wandu wechiwutaho imanya ke Inyi nyi Mndumii-Ruwa. Kiherikyo njechiwika oshu loko mawokonyi ha mangi o Babuloni, nao nechiluhoṟoya oruka lo Misri.

²⁶ Na inyi njechiṟaṟanja Wamisri kiidi kya mkambo ingi ya wandu na iwarahanyitsia njorukenyi tsingi. Nyi lyondo wechimanya ke Inyi nyi Mndumii-Ruwa.”