EZEKIELI 3 - Bibilia Kui Mdedie fo Kimochi

¹ Ruwa kanjiwia, “Iyo mndu, ambia kitapu ki ulye, uhende ideda na mba i ya wana wa Israeli.”

² Nahong'u ngatambaṟuo dumbu lyako nao kanjiinenga kitapu kilya kundu njikilye.

³ Nalyo kanjiwia, “Iyo mndu lya kitapu ki njikeri ikuinenga, nokuihutse nyi kyo.” Koikyo ngakiambia ngakilya, nakyo kikaloda cha wuki dumbunyi lyako.

⁴ Nao kanjiwia, “Henda ko mba ii ya Israeli uwawie madedo ha hako,

⁵ Kyamba ngamekuduma ko wahenu wawode mdedie muumupfo, kyaindi na ngakuduma ko wana wa Israeli.

⁶ Kyaindi kokoya njiwechikuduma ko wandu wo wahenu, wawewode mdedie muumu, iwo nyi wawekuadanyia.

⁷ Kyaindi wana wo wa Israeli, wechikuadanyia pfo kyamba ma inyi njimonyi wechinjiadanyia pfo. Wanawo wa Israeli nyi wawode mrima injiumu wakawewa waminyi.

⁸ Ambuya njikuinenga wukari na wukahari chawo;

⁹ oshangu lopfo lochiwanga cha iho lya aṟeṟa na iuma cha alimasi, koikyo manya ulawaowuo wandu wo wanyamaṟi.”

¹⁰ Mndumii kanjiwia se, “Iyo mndu, adanyia necha madedo ha njikuwia, uhawade na mrima.

¹¹ Nahong'u nokuhendie ko wandu wapfo iwo wai wusingenyi uwawie nyi wudi Mndumii-Ruwa ahamba, koya wechiicho ang'u walakunde iadanyia.”

¹² Nalyo mumuyo fukanjiiria huye na kiṟumi kya Mndumii-Ruwa kikawono handu halya, ngaweicho ṟu sa ling'anyi cha kiding'ashi.

¹³ Maṟu ha nyi ha makungo ha shindo shilya shii na moo hawepayana ili haweṟunda na madenga halya hawei wanda yasho lyandi hawe piṟimka.

¹⁴ Nalyo Mumuyo fo Ruwa fukanjiira alya fukanjiduo haleshe, ngahenda njii msokie nyi fowa na nyashi, kyaindi pfinya ya Ruwa iwei na inyi.

¹⁵ Nalyo ngahenda ko walya wawei wusingenyi wawekeri kufui na meda fulya fo Kebari kulya Telabibu. Ngawekukaya kiidi kyawo mfiri mfungade njii mṟihie kya shindo shilya njileshiwona na ishiicho.

Ezekieli alaho kundu nawe mringi

¹⁶ Nahong'u komeida mfiri mfungade idedo lya Mndumii-Ruwa likanjichea lyechinjiwia,

¹⁷ “Iyo mndu nyi ngakusambuṟa uwe mringi o wana wa Israeli. Nochiwatutuma chando njechikuduma.

¹⁸ Kokoya njechihamba mndu mnyamaṟi nechipfa, na iyo uladedie mndu cho, kundu nahende ikiṟa mrima foke, mndu cho nechipfa kiidi kya wunyamaṟi woke. Indi samu ya mndu cho njechiiwesa mawokonyi hapfo.

¹⁹ Kyaindi kodedia mndu chu mbicho kya njonyamaṟo tsake indi alakunde ihaluka na ida mawuto ho hake mawicho ichu nechipfa kipfa kya wunyamaṟi woke kya indi ko ora lopfo nochikiṟa mrima fopfo.

²⁰ Indi mndu awekewuta sha wuhoṟotsu kawoka iwuta wunyamaṟi na inyi ngamtalia wudeko, kokoya iyo ulamwikimbe nyi echipfa; ma shilya sha wuhoṟotsu awewutie njechishikumbuo sepfo. Kyaindi samu yake njechiiwesa mawokonyi hapfo.

²¹ Manya kudo kokoya ochiikimba mndu chu o wusumuhanyi kundu nalawute wunyamaṟi nao kaweicho alakinyamaṟe, nyi echikia moo kipfa kya ili alenyamaṟa, na iyo nyi oletsa moo fopfo.”

Ezekieli awa pipi ko kiheri

²² Pfinya ya Ruwa iwei na inyi ikanjichea kanjiwia, “Kure uhende handu ha ipichihu njihende ideda na iyo.”

²³ Nalyo ngawehenda handu ha pichihu, nalyo ngawona mng'ano na kiṟumi kya Ruwa kifananyi na kilya njilekiwona alya mbai ya meda fulya fo Kebari, nalyo ngakuhutsa wanda na kyamu.

²⁴ Nalyo Mumuyo fo Ruwa fukanjichea ngaidimase ihoṟoka. Nao kanjiwia, “Henda kanyi kopfo uhende ikushingiapfo.

²⁵ Ambuya wechikupfunga na mshe ulechiidimase ihenda kiidi kyawo.

²⁶ Na inyi njechipfunga olimi lopfo uwe pipi kundu ulaidime idediase wandu wa kipfa nyi wai waminyi.

²⁷ Kyaindi njechicha idedase naiyo, njitambaṟuo dumbu lyapfo nuwawie, nyi wudi Mndumii-Ruwa ahamba. Ulya akunda iicho naicho, na ulya alakunda ikuadanyia nyi kyake. Kyamba wandu wa nyi wai waminyi.”