EZEKIELI 29 - Bibilia Kui Mdedie fo Kimochi

Wuikimbi kipfa kya Misri

¹ Mkonu fo ikumi na kawi fo meri fo ikumi, fo maka fo ikumi wokia kiheri lulesamiṟo, idedo lya Mndumii likanjichea lyechihamba,

² “Iyo mndu! Halukia mangi Farao o Misri, uwute wuikimbi kipfa kyake na orukalo lose lo Misri.

³ Mbie kudi, Inyi Mndumii-Ruwa menyi matorito ngahamba njidi: “Inyi njelimbana na iyo mangi o Misri, Iyo nyi kinyau kilee medenyi Nili! Kyamba nuichi ke meda fo Nili nyi fopfo, Ke nyi iyo ufuwikie!

⁴ Kyasia njihenda ikuwikia sumi mahundunyi hapfo njiwehenda ihaluo makunga hawado mng'ang'urenyi yapfo. Chakipfa njikeri ihenda ikudeha uwuke ipfo medenyi.

⁵ Njikeri ihenda ikuwihitsa handu ha nuka, iyo na makungaho hose. Mbihu fopfo fochioloka kundu ko nuka ya msanga, kulawode manya mndu echikuirapfo nakuṟike. Ambuya nyi njikeri ihenda iinengia, malehe na mando ha nja malang'a fuwe kelya kyaho.

⁶ Kipfa kya ikyo wandu wose wa Misri wechiwutaho imanya ke Inyi nyi Mndumii-Ruwa.” Kyamba nuwekeri cha iṟinga lya menya ko Waisraeli kyaindi nuwei mfafa kota ilio.

⁷ Kiheri walekuwada na iyo owoko, lulefunjika koeduo makombe hawo. Kiheri walekuihetsa na iyo nyi nulefunjika ko dihinyitsa shiwungo shawo.

⁸ Kipfa kya ikyo Inyi Mndumii-Ruwa ngahamba njidi: Nyi njihenda ikusotsia oshu nalo nyilochihenda iwaha wandu wapfo na shiuma shapfo shose.

⁹ Kyamba nyi ulehamba meda fo Nili nyi fo pfo, ke nyi iyo ulefuwika, kyasiang'u oruka lopfo lo Misri lochiwa lo wulya na ihaluka nuka. Nyi lyondo wandu wechiwutaho imanya ke Inyi nyi Mndumii-Ruwa.

¹⁰ Nyi kyalohi nyi njihenda ikukapa iyo na meda yo yapfo, ko ikyo nyi njihenda ihaluo oruka lo Misri nuka ya msanga na lo walya kuwokia Migdodi mṟasa Syene, mṟasa mṟasenyi na Kushi.

¹¹ Kuwode mndu ang'u mando hai na moo hechiida pfo pfo. Kuwode chando lochiidima ikaapfo mṟasa maka makumi haana (40) iidepfo.

¹² Kiidi kya mṟi yo yose ya Misri yechinyamaṟika yechikaa wulya maka makumi hana (40). Ambuya nyi njechiṟaṟanja Wamisri kiidi kya wandu wa mkambo ingi na iwasamiṟia njorukenyi tsingi.

¹³ “Kyaindi Inyi Mndumii-Ruwa ngahamba njidi: Maka yo makumi hana ikamsia nyi njechisanyia se Wamisri kuwuka mkambonyi ya wandu kulya walesamiṟio.

¹⁴ Ambuya nyi njechiinengase Wamisri oru. Njechiwawihiṟase na orukenyi lo Pathrosi, oruka lowo lo mbooko. Ifo nyi wechiwadapfo wumangi wulawode pfinya.

¹⁵ Wumangi wufafa kota wumangi wose, walechiidima ikuirinyishase ko wandu wa mkambo ingi. Ambuya nyi njechifafaṟa Wamisri wo kundu walaidime se ihoṟokia wandu wa mkambo ingi.

¹⁶ Misri wechiidima iwada se pfinya yechikusiṟio na Waisraeli sepfo, na wo Waisraeli wechikumbuṟo chandu wawekedeko ikusiria oruka lo Misri. Waisraeli wechiwuta ho imanya ke Inyi nyi Mndumii-Ruwa.”

Mangi Nebukadneza nechiwinga Misri

¹⁷ Kyasia mfiri fo kuwoka fo meri fo kuwoka maka fo makumi hawi na mfungade fo isamiṟo lyadu, idedo lya Mndumii-Ruwa likanjichea;

¹⁸ “Iyo mndu Nebukadneza mangi o Babuloni nyi aleinenga mbahanyi tsake iṟunda ling'anyi lyekapa Tiro. Ambuya, mdo ya mbahanyi tsake walewuka uhaa na makombe hawo hakapichuka. Kyaindi, ambuya oo na mbahanyi tsake walewonaho kindo kyosepfo ko shida yo aleiria Tiro.

¹⁹ Ko kipfa kya ikyo Inyi Mndumii-Ruwa ngahamba njidi; njihenda iinengya Nebkadneza mangi o Babilonyi oruka lu lo Misri. Nechiduo wusuṟi woyo wose wuhende iwa wueri wo mbahanyi tsake.

²⁰ Ambuya nyi ngamnenga oruka lo Misri luwe wueri woke kyamba mbahanyi tso tsake nyi tsaṟunda iṟunda lyako inyi. Nyi Inyi Mndumii-Ruwa ngahamba njido.

²¹ Kyamba mkonufo nyi njechiinenga Waisraeli pfinya, na iyo Ezekieli uidime ideda kiidi kyawo. Nawo waidime imanya ke Inyi nyi Mndumii-Ruwa.”