EZEKIELI 28 - Bibilia Kui Mdedie fo Kimochi

Wuikimbi ko mangi ya Tiro

¹ Idedo lya Mndumii-Ruwa likanjichea likanjiwia,

² “Iyo mndu! Henda wia mangi chu o Tiro ke inyi Mndumii-Ruwa ngahamba njidi: Iyo nuwode ikudosa mrimenyi Kyamba nyi ulehamba ke iyo nyi ruwa, Ke nyiudamie loṟikehu lo maruwa, Ke nyi ukeri kuleshe ipfo ipalyipalyinyi Kyaindi iyo nyi ukeri mndu o wandu manya iyo ukeri Ruwa pfo, manya chandu ukuwonyi ke nyi uwode wuṟango cha Ruwa.

³ Ambuya! Nukuwonyi ke nuwode wuṟango kota Danieli, Nukusaṟie ke kuwode kindo kya kiṟika ulakiichi pfo.

⁴ Kyamba wulaanyi na wuṟango wopfo nyi shilekuinenga wusuṟi, Koweorana fesa na sahabu, Koshiichuṟa kisenyi kyapfo.

⁵ Kipfa kya wuṟango wopfo kiidi kya mbucha koengeṟa wusuṟi wopfo, Kipfa kya ikyo kokudosa kipfa kya masaa hapfo.

⁶ Kipfa kya ikyo Inyi Mndumii-Ruwa ngahamba njidi; Kyamba iyo nulekuwona ke nyi ukeri mṟango cha Mndumii-Ruwa,

⁷ ambuya njechikuendie wahenu, wandu walang'a kota wose. Iwo nyi wechihenda inyamaṟa kiṟumi kyapfo na wuṟango wopfo. Wawefanyitsa wucha wopfo

⁸ Kyamba nyi wechikusoṟowitsia ṟungunyi, na iyo nyi ochipfa opfu luwicho kiidi kya ipalyipalyi.

⁹ Ngesa, nochekutanase ke iyo nyi Ruwa. Oshangunyi lo iwo wakeri ikuwaha? Mawokonyi ha iwo wakeri ikumarisa, Kyaindi nochihenda imanya ke iyo nyi mndu owandu tupu manya ukeri Ruwapfo.

¹⁰ Ambuya nochipfa opfu luendie wusutsu wung'anyi mawokonyi ha mkambo fo wandu. Nyi inyi Mndumii, Ruwa menyi matorito ngahamba.”

Ioloka lya Mangi o Tiro

¹¹ Lingise idelo lya Mndumii-Ruwa likanjicheya.

¹² “Iyo mndu! Imba kiimbo kya fowa kya mangi o Tiro, mmbie ke Inyi Mndumii-Ruwa ngahamba njidi: Iyo mangi o Tiro nuwekeri kimaenyi kya wuhoṟotsu Nyi uwemiichuṟe wulaanyi na wucha wushikie;

¹³ Nyi uwekeri Edeni mdeminyi fo Mndumii-Ruwa. Nyi uwei mchope ko orio kindo kii kicha kyose akiki, lopazi, yaspi, zabarajadi, berili, sardoniki, yakuti, samawi, almasi na zumaridi nuwemchope ko sahabu. Isho shose nuwemteseheṟie kiheri kya iwumbo.

¹⁴ Ngawesambuṟa malaika nawe mringi opfo kiidi kya fumvu lyako liele. Kechichumia huye ya shindo shikeri iakaaka.

¹⁵ Ambuya nyi uwewode ohendo lo moo fulawode tewe, wokia lilyamandi ulewumbo, itane kiheri kilya ulewoka iwuta mawicho.

¹⁶ Kiheri kyo mbucha tsapfo tsileengeṟeka, kowoka iwada ngoo ya ulembi, kowoka iwuta wunyamaṟi. Kipfa kya ikyo ngakufuna ko ngafu ukae haleshe na fumvu lyako liele. Na malaika ulya awei mṟingi opfo kakufunyia haleshe hamu na shindo shilya sheakaaka.

¹⁷ Ambuya nuwekekushelia wucha wopfo Kowenyamaṟa wulaanyi wopfo Kipfa kya mng'ano fopfo. Ngakuhutsa wanda terinyi ngakutana kowa kindo kesetsa wamangi.

¹⁸ Kyamba chando ngeṟo tsapfo tsiwefo na chando uwekelemba ipfo mbuchenyi tsapfo nyi ulefanyitsa handu hapfo heindia; na inyi ngasotsia modo huye yapfo kundu fuhende ikurumatsa, ngawekutana ifu huye ya isanga oshangunyi lo iwo wose wawekeri ikuambuya.

¹⁹ Iwo wose wawekuichi kiidi kya mkambo fo wandu waleṟihio mnu kipfa kyapfo. Kyamba nuleshika mtsitsionyi fuoweshie, manya ulechikaa se pfo mlungana.”

Wuikimbi kipfa kya Sidoni

²⁰ Idedo lya Mndumii-Ruwa likanjichea.

²¹ “Iyo mndu! Halukia mṟi fo Sidoni,

²² uwute wuikimbi kipfa kyapfo ke Inyi Mndumii-Ruwa ngahamba njidi: ‘Inyi njihenda ilimbana na iyo Sidoni, njihende ikuloṟiaho mng'ano foko kiidi kyapfo, Ili mandi njechiawutsiaho muanduye yako huye yapfo, njiwekuloṟa wuele woko, nyi lyo mandi ochiwutaho imanya ke Inyi nyi Mndumii-Ruwa.

²³ Njikudikia ndaṟe njiwicho, na samu yechehenda ipusuka ipfo njiehu tsapfo. Nochihenda ikapo ko oshu wuka njora tsose na wandu wapfo wechiwoho nyi sa wafoi. Kipfa kya ikyo wechiwutaho imanya ke Inyi nyi Mndumii-Ruwa.’”

Waisraeli wechiwona ona

²⁴ Mndumii-Ruwa nahamba, “Mkambo iya ya wandu iweṟasanyi na Waisraeli wechiidimase iwawiṟa Waisraeli cha msha na msambochipfo. Kyamba wawutaho imanya ke inyi nyi Mndumii-Ruwa menyi Matorito.

²⁵ “Inyi Mndumii-Ruwa menyi Matorito ngahamba njidi: Njikeri ihenda isanyia na iende Waisraeli kuwuka mkambonyi ya wandu wose wawewaṟahanyitsie. Kipfa kya ikyo wandu wo wa mkambo wechiwutaho imanya ke inyi njii mwele. Nawo Waisraeli wechihenda ikaa orukenyi lowo njiweinengie mṟundi oko Yakobo.

²⁶ Wechihenda ikaa pfo na ofoṟo, nawo wechihenda iwika mba na ioṟisha mashidi ha msabibu. Nawo nyi wechihenda ikaapfo walawode wuowu, kyamba wandu walya wa mṟasa yawo wawekewatuura inyi njikeri ihenda iwakapa. Kipfa kya ikyo wechiwutaho imanya ke Inyi nyi Mndumii-Ruwa, Ruwa owo.”