EZEKIELI 27 - Bibilia Kui Mdedie fo Kimochi

Kilio kya Tiro

¹ Idedo lya Mndumii-Ruwa likanjichea lyechihamba,

² “Wulalu Iyo mndu! Kure nohende ifihiṟia mṟi fo Tiro,

³ mṟi fulya fukeri wambaṟa ya ipalyipalyi, fokekapa mbucha na mkambo ya wandu sa wafoi, nofuwie Mndumii-Ruwa nahamba adi kyapfo, ‘Iyo Tiro nulekushela, na ikuwona ke nyi ui na wusumuhanyi!

⁴ Mṟasa yapfo ikeri kiidi kya mapalyipalyi, Na walya walekuwika. Nyi walekuwika kochia mnu.

⁵ Mbau tsapfo tsose nyi waletsisungusia na misonobari ileendo Seniri, wakawesungusia ngo tsapfo, tsose na mbau tsa meresi iwukie Lebanoni.

⁶ Wakawesungusia makasia hapfo, na mbau njikari tsiwukie Bashani; wakawesungusia sakafu yapfo, na misonobari iwukie kulya Kupro, Wakaweichopa na membe.

⁷ Kitambaa kiikichope wuka Misri nyi kyo kilechopa tanga lya ngalawayo ing'anyi, kikawewa nyi yo pendeṟa yapfo. Chandaluo yapfo iwenjisungusie, ko fana tsa buluu na king'ari ng'ari tsiwukie kisiwa kya Elisha.

⁸ Wandu wawukie Sidoni na Arvadi wawei wekuruo makasia wapfo. Wandu wai walaanyi wawekeri kiidi kyapfo cha wandu wesongoya ngalawa.

⁹ Wameku wa Gebali na waaria wawo, wawekeri kopfo wechiṟinda mṟangua tsapfo. Weduo ngalawa wawekeidia kopfo, wakakapa mbucha na iyo.’

¹⁰ “Wandu wawukie kulya Persia, Ludi na Puti, walekulunga na mbahanyi tsapfo; Walewumbia ipfo mbenyi tsawo tsa mbahanyi, ngao tsawo na kofia tsawo. Mbahanyi tsi nyi tsilekuendie kiṟumi.

¹¹ Wandu wa Arvadi na walya wa Hele na mbahanyi tsawo nyi waleringa njomombo tsapfo njora tsose, na iwo wa Gamadi nyi waleringa mnaṟa yapfo. Wakawemasa ngao tsawo njomombohu tsapfo njora tsose, koikyo wakaawutsia necha wucha wopfo.

¹² “Wandu wa Tarshishi walekapa mbucha na iyo kipfa kya wusuṟi wopfo wo mbaṟi tsifoi. Wakawewuta fesa, menya, mabati, na mboro kundu waidime ihuṟa shindo sho shapfo.

¹³ Wandu wa Yavani, Tubali na Mesheki walewekapa mbucha na iyo, wakakuinenga masinga na shindo sha aṟeṟa kundu waidime ihuṟa shindo sho shapfo.

¹⁴ Masaa hapfo nulehakumba ipfo Beth-togarma kundu uidime ihuṟa pfo frasi tsekudika na tsekapana shida, ngamia na nzoi.

¹⁵ Wandu wa Dedani nyi walekapa mbucha na iyo. Njoruka tsose tsiwekeri wambara ya ipalyipalyi nyi tsiwei tumo yapfo. Wandu wake nyi walekuendie membe tsa njofu na mashidi ha mpuko waidime itaa nasho masaa hapfo.

¹⁶ Wandu wa Edomu nyi walewekapa mbucha na iyo kipfa kya mfoeṟa fo masaa hapfo. Ko ora lowo wameidima iambia masaa hapfo nyi walekuinenga akiki, shitambaa sha sambarao, shitambaa shishisungusie kiaria, kitani kicha matumbawe na yakuti.

¹⁷ Wayuda nawo wakawekapa mbucha na iyo wakakuinenga Ngano, zeituni, tini tsa kuwoka, wuki, mafuda na marhamu wechikutaa masaa ho hapfo ulewakumbia.

¹⁸ Wandu wa Damesko wakawekapa mbucha na iyo kipfa kya mfoeṟa fo masaa ha hapfo; wakakuinenga mvinyo na sufu.

¹⁹ Vedani na Yavani nyi walekudika masaa hapfo hawuka Uzali; wakaweduo menya tsinjitsane, mdalasini na mchaichai kundu waidime ihuṟa masaa hapfo.

²⁰ Wandu wa Dedani walewekapa mbucha na iyo wechikuinenga maalo ha frasi.

²¹ Waarabu na wanene wose wa oruka lo Kedari nyi wawei wachuṟusi wapfo wang'anyi ko shidahina sha machondi, masuwa na mburu.

²² Wachuṟusi wa Sheba na wawukie Rama, wakaweende shekapa mbucha na iyo; wakakuendie shiungo sha shelya, shindo sha wuhuru na sahabu kundu waidime ihuṟa shindo shapfo shii shicha.

²³ Wandu wawekekaa mṟi iya ya Harani, Kane na Edeni na wachuṟusi walya wa Ashuru na Kilmadi wakawekapa mbucha na iyo.

²⁴ Wo nyi walekapa mbucha na iyo ya nguwo tsa wuhuru wung'anyi, nguwo tsa buluu tsinjichope, masulia ha fana yekeakaaka na mambo tsa nguwo.

²⁵ Ngalawa tsa Tarshishi nyitso tsiwekeduo masaa hapfo. ‘Koikyo chando ngalawa ikeri makidi hawi ha ipalyipalyi, iyo nuwemiichuṟe nzohoṟa.

²⁶ Wandu wapfo weduo ngalawa wakakuduo kundu kuleshe ipalyipalyinyi, otanu lo ora lo ngamenyi lukakufunjafunja, kiherikyo uwekeri kiidi kya ipalyipalyi.

²⁷ Wusuṟi wopfo wo shindo na masaa, wandu wapfo wose walya weduo ngalawa wose ipfo ngalawenyi, waaria wapfo na ngalawa na wachuṟusi wapfo, mbahanyi tsapfo tsose tsikeri kopfo, handu hamu na walya wepfunga kyaṟo wakeri kopfo, iwo wose wechiarisikia ipalyipalyinyi, mkonu fulya fo iarisika lyapfo.

²⁸ Kiheri kya kilio kya walya weduo ngalawa tsapfo kechiichio, njoruka tsilya tsikeri wambaṟa ya ipalyipalyi nyi tsechidedema.

²⁹ Kipfa kya ikyo walya wose, wekekapa makasia wechida ngalawatso tsawo. Weduo ngalawa na wasongoru wo wawo, nyi wechikaa wambaṟa ya ipalyipalyi.

³⁰ Wechikuichio makulili hang'anyi kipfa kyapfo, wechifihiṟa ko wukiwa wung'anyi mnu, Nyi wechikuolia kiluli mdonyi yawo, na ikuturunja mafunyi.

³¹ Waleoda njui kipfa kyapfo, na iṟa nguo tsa makunyia Nyi wechifihiṟa kilio king'anyi, kiwukie mṟimenyi kipfa kyapfo.

³² Nawo nyi wechihenda iimba shiimbo sha wukiwa kipfa kyapfo, nyiu alemearisika cha Tiro kiidi kya ipalyipalyi?

³³ Kiherikyo masaa hapfo haleambatsio njoruka tsa molyolya, nyi tsileinutsia shilya wandu wafoi wawelangie, nyi kipfa kya chando mfoeṟa fo masaa hapfo fuwei, mfoeṟafo nyi fulesuṟisha wanene wa wuyanawu.

³⁴ Ambuya wulalu omesoṟowia ipalyipalyinyi. Omaiarisikia kiidi kya shiṟoṟi sha mṟinga. Nzohora tsapfo na weduo ngalawa wapfo wakawesoṟowia hamu na iyo.

³⁵ Walya wose wawekekaa ipfo orukenyi, Nyi walepfa mdidi kipfa kyapfo; Wamangi wawo wakaowuo mnu nakamu, Njoshangu tsawo nyi tsikulemielemie kipfa kya fowa.

³⁶ Wachuṟusi wa wandu wa mkambo nyi wechikuṟihiyo na ikukapa mang'ang'o! Nyi kipfa nuleshikia mtsitsionyi fuoweshie, na kipfa kya ikyo ochiidima iwona sepfo shika mlungana!’”