EZEKIELI 26 - Bibilia Kui Mdedie fo Kimochi

Wuikimbi ko Tiro

¹ Ili kuweshikie maka fo ikumi na limu mfiri fo kuwoka fo meri, idedo lya Mndumii-Ruwa likanjichea lyechihamba,

² “Ambuya Iyo mndu! Tiro nyi aleseka mṟi fo Yerusalemu kechihamba: ‘Ambuya mṟi fo Yerusalemu mongo yake wandu wa mkambo wawekekuidiaho fo mmaa irumatso. Wulalu fomeludea mweke fo wusuṟi woke womerumatso!’

³ Kipfa kya ikyo Mndumii-Ruwa nahamba adi, ‘Njikeri ihenda ilimbana na iyo Tiro, njiende wandu wa mkambo ifoi wache ikapana na iyo, wechikuchea cha masinanu ha ipalyipalyi.

⁴ Wechiwunduo njomombo tsapfo na inyamaṟa mnaṟa yapfo, njechiahiṟa teri yapfo nodeo cha iho lya iṟaṟa.

⁵ Nochihenda ikaa handu ha hadutsu kiidi kya ipalyipalyi handu wadehi wa makunga wekehadutsia mdeho yawo, na iyo nochihenda ideho nyi wandu wa mkambo, nyi wudo Inyi Mndumii-Ruwa ngahamba,

⁶ na mṟi yo iwei mṟasenyi na iyo ipfo isangenyi yechiombotso kui oshu, nalyong'u muwuteho imanya ke nyi Inyi Mndumii-Ruwa.’

⁷ “Kyamba nyi wudi Mndumii-Ruwa ahamba, ‘Njechiende mangi Nebukadneza awuka ora lo huye Mangi o Babiloni, Mangi o wamangi, nache na frasi, magari ha shida, na walya wadoye frasi, ichekeṟo ling'anyi liche ikukapa.

⁸ Nao nechikapa mṟi yo iwei kufui na iyo ipfo isangenyi. Nechisuma mafoo huye yapfo, nawewika njomombo tsekuringa huye yapfo, natso tsihende iwa ngao yekuringa huye yapfo.

⁹ Kyamba nechiira shisha shake shewunduo huye ya njomombo tsapfo, nawewunduo mnaṟa yapfo na masoka hake.

¹⁰ Kyamba Nebukadneza narie frasi sa tsifoi, kiluli kyo tsechidutsa nyi king'anyi nakyo nyi kechikushikia, njomombo tsapfo nyi tsechidihinyitso nyi ṟu lya mbahanyi tsake, na makari ha shida ili mandi wechiida mongonyi ya mṟi fopfo cha ili mandi waida na mṟinyi fuwundukie wundukie.

¹¹ Ambuya mbahachu tsa frasi tso tsake tsechiteṟateṟa njia tsapfo tsose, nawahe wandu wapfo wose ko oshu, na mnaṟa ya pfinya tsapfo nechiiombotsa wanda.

¹² Nawo wechinyamaṟa wusuṟi wopfo wose na shindo shapfo wechishiduo. Lingise nawunduo njomombo tsapfo hamu na mba tso tsapfo njicha, nawunduo maho ho hatsiwikie na mbau tso tsisungusie na teri yo itsiwikie wahende itsiwunduya mṟingenyi.

¹³ Kyamba maṟu ha shiimbo shanu hamu na maṟu ha shinanda shanu nyi shechitsista.

¹⁴ Kyamba nyi njikuhaluo iho lya iṟaṟa na handu hapfo nyi hechiwa handu hehadutsia ndusu tsa wedeha makunga. Manya mṟi fopfo fochikaa fuwikosepfo kyamba nyi wudo Inyi Mndumii-Ruwa ngahamba.’

¹⁵ “Inyi Mndumii-Ruwa njikeri ikuwia kudi iyo Tiro: Wandu wo wakeri wambaṟa ya ipalyipalyi nyi wechidedema ili mandi wechiicho chandu ochioloka ling'anyi na kilio kya iwo wakeri ifihiṟa kipfa kya shifaṟe shawo hamu na wandu wo wakeri iwoho.

¹⁶ Kii kidi wanene wose wa njoruka tsii wambaṟa ya ipalyipalyi wechisoka wanda wawuka shidihu shawo sha wunene, wawekuatuo maṟao hawo ha wuitoṟi na kanzu tsawo njichope; nawo nyi wechisokio nyi wuowu wung'anyi, wawekudamia wanda wechidedema, na iṟihiyo mnu kya ishi shose shilekuhoya.

¹⁷ Nawo nyi wechisumukia mnu kipfa kyapfo wechikuwia: ‘Nyi wuda ulerumatso iyo mṟi fuwewode kiṟumi, kowesaramaya kiidi kya ipalyipalyi! Iyo na wandu wapfo muwewode pfinya ing'anyi, Mukaowesha wandu wose wawei hafui na iyo.

¹⁸ Wandu wo wa orukenyi, nyi waidedema chando uleolotso, na iwa wa mbai ya ipalyipalyi, nyi wai waṟihie chandu uleṟuṟuma.’”

¹⁹ Kyamba Mndumii-Ruwa nahamba adi, “Njechikuhaluo iyo Tiro nuwe mrapu, uwewa cha mṟi fulalemekao nyi wandu, ili mandi njechiende mṟinga fuwuka shiṟoṟinyi sha ipalyipalyi huye yapfo, na mṟinga fufoi fukushikie:

²⁰ Ambuya njikeri ihenda ikusoṟowitsa ṟungunyi uhende ilungana na walya wakeripfo, walya wawekeri wuyanenyi ili mboko, nochihenda ikaapfo ukeri msami mlungana kyamba kulawode mndu echikaa se orukenyi lopfo manya ochiidima iwada dembo kiidi kya wandu wai na moo mlungana.

²¹ Kyamba nuhenda ishikia mtsitsionyi sa mbicho, kyamba ochikaa uwonosepfo, manya kopfulo ochikaa uwonekesepfo, nyi wudo Inyi Mndumii-Ruwa ngahamba.”