EZEKIELI 25 - Bibilia Kui Mdedie fo Kimochi

Wuikimbi ko Amoni

¹ Idedo lya Mndumii-Ruwa likanjichea,

² “Iyo mndu halutsa kyamu kyapfo ko wana wa Amoni uwaikimbe kochihamba,

³ ‘Adanyienyi idedo lya Mndumii-Ruwa, kyamba nyo nyi mulekeseka lilya mba yako ilefanyitso, na oruka lo Israeli lulerumatso, na lilyandi wana wa Yuda waledao wusingenyi.

⁴ Ambuya njikeri henda imudambikia mawokonyi ha wandu wawukie kulya ora lo ngamenyi, nawo nyi wechikapia mahema hawo kiidi kyanu, nawo wechihaluo oruka lonu nyi kanyi kowo; Nawo nyi wechihenda ilya ndunda tsanu na inyo maruwa hanu.

⁵ Kyamba mṟi fo Raba njechifuhaluo pata lyelisa ngamia na oruka la Amoni luhaluke mfiṟiha fo machondi. Kipfa kya ikyo mochihenda imanya ke Inyi Mndumii-Ruwa.’

⁶ “Koikyo Inyi Mndumii-Ruwa ngahamba njidi; kipfa iyo nulekapakapa mawoko, koweshongashonga na sia kipfa kya oruka lo Israeli,

⁷ inyi ng'u njikuhoṟuya owoko loko, njihenda imuda mudao wusingenyi nyi wandu wa mkambo njihenu. Kyasia njikerihenda imurumatsa mulechiwa se mkambo fo wandupfo manya mochiwase na orukapfo. Kipfa kya ikyo nyi mochihenda imanya ke Inyi nyi Mndumii-Ruwa.”

Wuikimbi ko Wamoabu

⁸ Mndumii-Ruwa nyi ahamba adi, “Kyamba Moabu nalehamba, Yuda nyi kimu na wandu wa mkambo ingi,

⁹ ambuya njikeri ihenda ikapa mṟi yo ya Moabu, mṟi yo mcha iringie mṟasa yake, mṟi fo Beth-yeshimothi, Baal-meoni, na Kiriathaimu.

¹⁰ Kyamba njikeri ihenda idambikia oruka lowo hamu na oruka lo Amoni mawokonyi ha wandu wawukie ora lo ngamenyi luwe nyi oruka lowo; Orukalo lo Moabu kuwode mndu echilukumbuose pfo.

¹¹ Kii kidi njikeri ihenda ikapa orukalo lo Moabu, nawo wawuteho imanya ke Inyi nyi Mndumii-Ruwa.”

Wuikimbi ko Edomu

¹² Mndumii-Ruwa nahamba adi, “Kyamba Edomu naletaa kiṟache ko mba ya Yuda, wakawakapa ili liwicho mnu ko itaa kiṟache,

¹³ Kyasiang'u Inyi Mndumii-Ruwa njihenda ihoṟoya Edomu kuwoko koko, njechiwaha wandu wose na shiuma shawo, njihaluo orukalo ngafu kuwokia mṟi fo Temani mṟasa mṟi fo Dedani, wandu wo wose wechiwoho ko oshu.

¹⁴ Kyamba njihenda itaa kiṟache ko Waedomu kui owoko lo wana wako wa Israeli, cha kipfa wechihenda iwutia Waedomu sumuhana na nyashi yako. Kii kidi Waedomu wawuteho imanya kiṟache kyako, nyi wudo Mndumii-Ruwa ahamba.”

Wuikimbi ko Wafilisti

¹⁵ Mndumii-Ruwa nahamba adi, “Kyamba Wafilisti waletaa kiṟache, wakataa kiṟache ko wakituwa wawo ili liwicho mnu, wakaweengeṟa iwada kituwa kilekesia.”

¹⁶ Kyasiang'u Mndumii-Ruwa nahamba adi, “Njihenda ihoṟoya Wafilisti kuwoko koko, njihende irumatsa Wakerethi, na iwo wose wakeri waambaṟa ya ipalyipalyi.

¹⁷ Kipfa njihenda iwataa kiṟache king'anyi kui nyashi yako, nawo wechiwutaho imanya ke inyi nyi Mndumii-Ruwa, ili wechiwona kiṟache kyako huye yawo.”