EZEKIELI 24 - Bibilia Kui Mdedie fo Kimochi

Nungu inyamaṟikie

¹ Kii kidi, maka fo kenda, meri fo ikumi, mfiri fo ikumi fo meri, idedo lya Mndumii-Ruwa likanjichea lyechihamba,

² “Iyo mndu! Ṟehia mkonu fu fo inu, kyamba mkonu fu tichi nyifo mangi o Babuloni akeri ihenda itengetia mṟi fu.

³ Uwehenda ideda na mba i njilemi kui ofano uwawie Mndumii-Ruwa nyi ahamba adi: Demekienyi kinungu kyo rikonyi, muwekiichuṟa mṟinga.

⁴ Kewewehienyipfo ngamra tsa nyama njicha, shiteno shicha sha nyama tsa owa na makombe, muweichuṟa pfo mafuo mecha.

⁵ Sambuṟa nyama njicha ya ichondi, kiidima noatse modo ipfo rikonyi, nokoṟe necha nyamatso na mafuoho mṟasa tsihe.

⁶ “Mndumii-Ruwa nyi ahamba adi: ‘Ochia nyi lo mṟi fo wuwahi! Mṟi fo fufananyi na nungu iwode mtsiri fulechidima iwuka! Shiteeno sha nyama shikeri iwutopfo kimu kimu kulawode isambuṟa.

⁷ Kyamba samu yo walepusuo ikeri ipfo kiidi kyawo, kya mba ilepusukia terinyi ishikio nyi kilulipfo, ilekuala ihohu lya iṟaṟa handu yewono.

⁸ Samuyo njileida ikae huye ya iho lya iṟaṟa ilashikio kundu idose nyashi yako njiidime itaa kiṟache.’

⁹ “Kipfa kya ikyo Inyi Mndumii-Ruwa ngahamba njidi: Ochia nyi lo mṟi fo fo samu kyamba nyi njechiengeṟa timbiri ing'anyi ya ngu.

¹⁰ Ambuya nyi njihenda iende timbiri ing'anyi ya ngu, njikoṟe nyama tso necha na kamu, njiumiṟie supuyo na mafuo ho hahe mṟasa haonguo.

¹¹ Kiidima njidehie nungu ilawode kindo huye ya modo, itane ngafu iweipfo isalae hamu nayo.

¹² Kyaindi ambuya nyi njikuwinyisha kya wulya, kyamba mtsiri fo foyo fochiidima iwuka manya ko modopfo.

¹³ Cha kipfa mawuto hapfo nyi hai mawicho, ngawetambahana ikusanja kyaindi ulawe, koikyo ochiwa isanjasepfo mṟasa ili mandi nyashi yako yechikuhoya.

¹⁴ Ambuya nyi Inyi Mndumii-Ruwa ngahamba, ‘Njechihenda iawutsia kindo ki, njechiwuta kindo, njechiambuya ndumapfo, nyi njechikukapa sumuhana na mkao fopfo na mawuto hapfo, nyi wudo Mndumii-Ruwa ahamba.’”

Opfu lo mka o mwikimbi

¹⁵ Kii kidi idedo lya Mndumii-Ruwa likanjichease,

¹⁶ “Iyo mndu ambuya njihenda ikukapa njikusoke mka opfo mkunde, kya indi ulasokio nyi fowa, manya ulafihiṟe na itonyitsa mchenyeṟe,

¹⁷ ‘Ambuya nyi ochisumukia kya indi uladose ṟu. Manya ochiloṟa iawuka lya icho apfapfo. Ṟaa kidami kyapfo, uwekuṟaya shadu shapfo, manya ulashikie oshangu lopfo manya ilya kelya kya iawuka.’

¹⁸ “Kyasiang'u ngawekudedia na wandu ngamenyi na kyukanyi mka oko kapfa. Ili lya ngama ngamenyi ngawewuta chandu njilewawaso.

¹⁹ Nalyo wandu wakanjiwesa, kindo ki ukeri iwuta nyi kyahambaki kodu?”

²⁰ Na inyi ngawahaluo, “Mndumii-Ruwa nalenjiwia;

²¹ Wia mba ya Israeli, nyi wudi Mndumii-Ruwa ahamba; ambuya njihenda ifanyitsa haele hako, mba yo ikeri kiṟumi kyapfo na pfinya yapfo, nayo nyi ichihiṟie mesonyi hapfo. Kyamba wana wanu wa kiumi na wa kika mulewada nduma wechiwoho ko oshu.

²² Nanyo nyi mochiwuta chandu njilewuta inyi kyamba mochishikia njoshangu tsanu pfo, manya mochilya shelya sha iawuka pfo.

²³ Ambuya nyi mochiṟaa shilemba shanu mdonyi yanu, na shadu madendenyi hanu, mochisumukia manya ifihiṟapfo. Ambuya mochifafaa mrimenyi kya mawicho hanu na isumukia nyo wenyi ko wenyi.

²⁴ Kipfa kya ikyo inyi Ezekieli njechiwa kichano kyanu, kyamba orio kindo njilewuta nanyo mochihenda iwuta kudo. Kyasiang'u ili mandi shindo shi shechihenda iwutika, nyi lyondo mochimanya oo nyi Mndumii-Ruwa.”

²⁵ “Ambuya Iyo mndu! Mkonufo njechiwasoka kilya wakusirie, sia yawo na kiṟumi kyawo, kilya kichihiṟie meso hawo na kilya mrima yawo ilangie, na iwasoka wana wawo wa kiumi na wa kika,

²⁶ Mkonufo nechicha, mndu umu ho alekia nache ikuwia mbonyi tsi.

²⁷ Mkonu na ifo dumbu lyapfo nyi lyechidambuka uidime ideda nao. Koikyo iyo nochiwa kichano kowo, nawo wechiwuta ho imanya ke Inyi nyi Mndumii-Ruwa.”