EZEKIELI 22 - Bibilia Kui Mdedie fo Kimochi

Madeko ha Yerusalemu

¹ Idedo lya Mndumii-Ruwa likanjichea lyechihamba,

² “Iyo mndu oidima ionguo muanduye, uanduye mṟi fu fo samu? Kyasia wawie mawicho hawo hose.

³ Wawie le Inyi Mndumii-Ruwa menyi matorito ngahamba njidi; Iyo nyi mṟi fokewaha wandu wapfo kumonyi, kowekufanyitsase ochisungusia sanamu tsa maruwa hengi, koikyo kiheri kya ngapo yapfo kyaafukia.

⁴ Ambuya nukeri mdeko kipfa kya samu iya ulepusuo, kowekufanyitsase kipfa kya sanamu tsilya uletsana. Koikyo mfiri fo ngapo yapfo nofukuruya hafui na iyo, Ee ko, mfiri yapfo injitale. Nkyo kitewe wandu wa mkambo ya wandu wakeri ikutaluo na wandu wa njoruka tsose wakeri ikumina.

⁵ Njoruka tsose tsa kuleshe na kufui tsikeri ikutaluo kipfa kya mkao fopfo mbicho na kifahiyo.

⁶ “Ambuya, wanene wose wa Israeli wakeri kiidi kyapfo wai wawahi.

⁷ Kyamba kiidi kyapfo wafee wakemino, na mhenu kawesoko masaa hake, ngweda na waka wakusu wakawehenda iwonyio.

⁸ Nulemina shindo shako shiele, kowesalucha sabato tsako.

⁹ Kiidi kyapfo kuwode wekeṟingia wodoyawo kundu wawoho. Wandu wapfo wekelya shidaso shiledasio maruwa hengi. Wakawekaapfo walya wekewuta shindo sha mkika.

¹⁰ Kiidi kyanu kuipfo wandu wekelaa na waka wa wandeawo na ifanyitsa waka wakeri kiidi kya mfiri yawo.

¹¹ Wandu wengi wekewuta shindo cha wusutsu wechilaa na waka wa mṟasenyi yawo, wengi wakalaa na waka wa wana wawo, na wengi wakalaa na washiki wawo.

¹² Kiidi kyapfo kuwode wandu wekeambia fesa kundu wawahe. Koweambia ngeṟia tsa wulembi kundu ukusuṟishe, kochiotoya manawomayo, konjihadima inyi piu.” Nyi wudi Mndumii-Ruwa ahamba.

¹³ “Ambuyang'u inyi njikeri ilema nzina kipfa kya fesa iya uleduo ilakusumhanyie na kipfa kya samuyo ilepusuyo kiidi kyapfo ilawode mti.

¹⁴ A ngesa nochiidima ikuhoda na inyi ili mandi njihenda ilimbana naiyo? Nyi wudo Inyi Mndumii-Ruwa ngahamba na nyi wudo njechihenda iawutsia isho.

¹⁵ Ambuya njikeri ihenda ikurahanyitsia kiidi kya mkambo ya wandu na ikukumba ipfo na ipfo kiidi kya njoruka tsingi. Njechitsitsa ngafu tsose tsii kiidi kyapfo.

¹⁶ Ambuya, nochikufanyitsa oshangunyi lo mkambo ya wandu, kyaindi nyi ochiwutaho imanya ke Inyi nyi Mndumii-Ruwa.”

Nungu ya Ruwa ya modo yeilisha

¹⁷ Nahong'u idedo lya Mndumii-Ruwa likanjichea lyechihamba;

¹⁸ “Iyo mndu, wana wa wa Israeli wafanana na mbosha koko. Wakafanana na mbosha iya iletsuhaa ko walya weela aṟeṟa, mapati, menya, ang'u mboro kiherikyo shikeri isanjo.

¹⁹ Koikyo Mndumii-Ruwa nahamba, kyamba nyo mose mofanana na mbosha tsa fesa, njikeri ihenda imusanyiasanyia mṟinyi fo Yerusalemu.

²⁰ Kyamba chandu wandu wekesanyia fesa, aṟeṟa, mapati, menya na mboro kiidi kya nungu ya modo kundu washisanje ko ishikoṟa na modo, nyiwudo ng'u na nyashi yako yechihenda iwasanyia sanyia ipfo njiwasalaṟe.

²¹ Ee, nyi wudo njechihenda imuatsia modo fo nyashi yako na nyo mochihenda isalaa mukure ipfo mṟinyi.

²² Kyamba chandu fesa yekesalaṟo nungunyi ya modo, nyi wudo njihenda imusalaṟa ipfo mṟinyi, nanyo mochiwutaho imanya ke nyi Inyi Mndumii-Ruwa ngapusuya nyashi yako huye yanu.”

Wunyamaṟi wo wanene wa Israeli

²³ Idedo lya Mndumii-Ruwa likanjichea,

²⁴ “Iyo mndu, wia wana wo wa Israeli ke oruka lowo lufananyi cha ili kulalemekape mvuo, lukohaduka kipfa kya nyashi yako, lukawa cha teri ilawode mṟinga.

²⁵ Wanene wanu wafananyi na miiso tsirongona ili tsiwode kindo madumbunyi hatso. Kyamba wekewaha wandu, wakawesoka wandu masaa hawo, wakaengeṟa waka wakusu orukenyi.

²⁶ Wakohanyi wawo wakafunja mawawaso hako, wakawesalucha shindo shako shiele. Waleidima iṟohuo kiidi kya shindo shiele na shilya shilai shielepfo, ma kiidi kya kiloshio waleidima iloṟa wandu wamanye nyi shindo shiha shii sha ngafu na nyi shiha shii shiele. Walekunda iindia sabato tsako pfo, kikatewa ngahenda imino kiidi kya mkambo fo wandu.

²⁷ Wanene wawo nyi wafananyi na shisii shekeranduo shilya shewada madumbunyi hasho kyamba wakeri iwaha na iwada wusuṟi wulawaṟi.

²⁸ Waikimbi wawo washikia kilya kiidi kya lohi cha ili mndu aishia chokaa omombo lunyamaṟikie. Wechionguo ndodo tsa wongo na iikimba wongo wechihamba, ‘Mndumii-Ruwa nahamba adi'; Kyaindi ko ora loko ngamehambe kindopfo.

²⁹ Orio handu ipfo orukenyi kuichuo iwonyio na wasoki, wekesoka wakiwa na walya wafafa, wahenu nawo wakawehenda iwonyio kulawode isaṟa kindo.

³⁰ Kyasia ngapfula mndu awuka ipfo kiidi kyawo kundu nawike omombo luhoṟoke kiidi kyako na orukalo kundu njilalurumatse, kyaindi njilawone manya mndu umu.

³¹ Koikyo njilewapusuya nyashi yako na iwakombetsa ko modo fo nyashi yako sumhana na mawuto hawo. Nyi wudo ngahamba Inyi Mndumii-Ruwa menyi matorito.’”