EZEKIELI 20 - Bibilia Kui Mdedie fo Kimochi

Waisraeli waengeṟa ileha Mndumii-Ruwa

¹ Kyasia komsia maka mfungade meri fo katanu mfiri fo ikumi wokia lodao wusingenyi, wanene wa Israeli wakanjichea wakundi iwesa makusaṟo ha Mndumii nyi wuda hai. Wakadamia oshangunyi loko.

² Nalyo idelo lya Mndumii likanjichea lyechihamba,

³ “Iyo mndu deda na wanenewo wa Israeli uwawie, Mndumii-Ruwa nahamba adi, ‘Ngesa nyi mocha injiwesa idedo? Nyi kya lohi ngambia so Mndumii ai na moo mochiidima injiwesa kindo nyopfo nyi wudo Mndumii-Ruwa ahamba.’

⁴ “Alewo iyo mndu nukundi iwaanduya? Kyasia waanduye. Wakumbuṟe kya mawicho ha wafee wawo wawewutie.

⁵ Nahong'u uwawie le, nyi wudi Mndumii-Ruwa ahamba, ‘Ili mandi njilesambuṟa Israeli njilewawikia kyasa ngakuloṟa kowo kulya Misri ngawawia inyi nyi Mndumii-Ruwa owo.

⁶ Kiherikyo njilewawikia kyasa ke njihenda iwawuta orukenyi lo Misri njiwaduo orukenyi njilewasumbuṟia njimonyi, oruka luichuo wuki na maruwa, oruka sa lulucha kota njoruka tsingi tsose.

⁷ Ngawewawiase, lekanenyi na sanamu tsose tsichihiṟie meso hanu, manya mulakufanyitse na maruwa halyo ha wongo ha Wamisri, kyamba inyi nyi Mndumii-Ruwa onu.

⁸ Kyaindi wakanjimina, walakunde injiadanyia. Walekunda ilekana na sanamu tsilya tsawo ma ilekana na maruwa halya ha wongo ha wa Misri pfo, ikyo kikanjiinenga njikunde iwasotsia ngapo na nyashi yako ing'anyi kulya Misri.

⁹ Kyaindi njilakunde iwawutia kudo, kyamba njiwechiendie rina lyako wusutsu kiidi kya wandu walya wawei kiidi kyawo, kipfa njiwemesonguo ihamba oshangunyi lo Waisraeli ke njihenda iwawuta kulya orukenyi lo Misri.’

¹⁰ Kii kidi, ngawawuta kulya orukenyi lo Misri, ngawaduo kulya nuka.

¹¹ Ngawainenga mawawaso hako, na iwalosha sungusihu tsako kundu orio mndu oose echitsiosha naidime ikaa na moo.

¹² Lya ngoseṟa ngawewawasia Sabato tsako kundu tsiidime iwa kichano kiidi kyawo na inyi, nawo wawuteho imanya ke nyi Inyi Mndumii-Ruwa njilewasanja.

¹³ Kya indi mba i ya Israeli ilenjileha kulya nuka, wakaweumbuya mawawaso hako na sungusihu tsako tsilya tsekeinenga moo mndu ulya eketsiosha. Wakawefanyitsa sabato tsako, ngahamba njechiwasotsia nyashi yako kulya nuka ihende iwarumatsa piu.

¹⁴ Kyaindi njilewuta kudo pfo kundu njilahende isutsa rina lyako oshangunyi lo mkambo fulya walewona njechiwawuta kulya Misri.

¹⁵ Nalyo ngawalia nyamu kulya nuka ke njechiwaduo se kulya orukenyi njiwewateseheṟie pfo, oruka luichuo maruwa na wuki, oruka lui lucha kota njoruka tsose.

¹⁶ Kyamba waleleha chila tsako, manya walakunde iosha mawawaso hako, wakawefanyitsa sabato tsako, kyamba mrima yawo ilekuwada iosha sanamu tsilya tsawo.

¹⁷ Manya kudo riso lyako likawasaṟia, njilakunde iwakapa, manya iwarumatsia kulya nuka.

¹⁸ “Nyi wudo ngawekekedia wana wawo kulya nuka, manya mlaoshe wuwawaso wo wafee wanu, ma ichumia kiidi kya sungusihu tsawo, manya mlakufanyitse kiidi kya sanamu tsawo.

¹⁹ Inyi nyi Mndumii njii Ruwa opfo, chumienyi kiidi kya sungusihu tsako, muweringa necha mawawaso hako.

²⁰ Hendelienyi sabato tsako kundu tsiwe nyi kichano kya mkundana foko nanyo, ikyo kimukumbuṟe ke inyi nyi Mndumii-Ruwa onu.

²¹ Kyaindi wanawo wakanjimina walakunde iosha mawawaso hako, manya ichumia kiidi kya sungusihu tsako kundu waidime ikaa na moo, wakawefanyitsa sabato tsako. “Ikyo kikanjinenga makusaṟo hewakapa na nyashi yako iwaolokie kulya nuka.

²² Kyaindi njilawute kudo, cha kipfa rina lyako liwewona wasutsu oshangunyi lo mkambo fulya fulenjiwona njewuta wana wa Israeli kulya Misri.

²³ Ngawewalia nyamu kulya nuka ke njechiwaṟaṟanja kiidi kya mkambo ya wandu wuyanenyi kose.

²⁴ Kyamba nyi waleleha ichumia kiidi kya sungusihu tsako, wakawumbuya mawawaso hako na ifanyitsa sabato tsako, na meso hawo hakakunda iosha sanamu tsilya tsa waku wawo.

²⁵ “Ngawewainenga mawawaso halai mecha, na sungusihu tsilechiidima iwaendie moo;

²⁶ ngawewaleka wakufanyitse wawenyi kiidi kya shidaso shawo, kyamba nyi waledasa wana wawo wawe shidaso shemaya modonyi. Iki kikawa ngapo kowo kundu wawuteho imanya ke inyi nyi Mndumii-Ruwa.

²⁷ “Kyasia, Iyo mndu, deda na mba yo ya Israeli uwawie, Mndumii-Ruwa nyi ahamba le, ‘Waku wanu walenjisuiṟa, wakawewuṟa mawuto ha wuhoṟotsu,

²⁸ Kyamba njilewaende na orukenyi lulya njiwewateṟie, nawo wekiwona mafuvu maleshe na mashidi haoṟie necha, wakawoka ihaendie shidaso shawo. Wakawenjipfulutsa nyashi ko shidaso shilya shepfaama walewuta hamu na iletsia mvinyo.

²⁹ Nalyo ngawewesa, nyi wuda kya handu ha hakuirie huye mukeri ikuhendia? Nahong'u kukahenda ilaho nyi handu hakuirie huye mṟasa inu.’

³⁰ Wulalu wia mba yo ya Israeli le, nyi wudi Mndumii-Ruwa ahamba, ‘Nki ili muiosha mawuto halya hawichuṟie, halya waku wanu walewuta na iosha maruwa halya hawo ha wongo?

³¹ Ili mandi muiwuta shidaso shanu, mochikoṟa wana wanu modonyi chi muleengeṟa ikufanyitsa na sanamutso mṟasa inu. Aka ngesa iyo mba ya Israeli nochiidima injiwesase kindo? So Mndumii-Ruwa ai na moo, ochiidima injiwesase kindopfo.

³² Kyamba mrimenyi yanu mukusaṟie ke mukundi ifanana na wandu wa mkambo yose mochiindia sanamu chawo, ikyo kechiidima iwapfo.’”

Mndumii-Ruwa nekekapa na ihoṟia

³³ “Mndumii-Ruwa nahamba adi, ‘Inyi Mndumii ai na moo, ngalya nyamu, njihenda iwa mangi yanu njimusongoye ko pfinya yako yose, na kuwoko koko kulemeri lochisokia huye yanu hamu na nyashi yako.

³⁴ Kyamba njikeri henda imuwutase na imusanyia muwuke ipfo mkambonyi ya wandu na njorukatso muweṟaṟanjikie nanyo mochiwona nyashi na pfinya yako.

³⁵ Kyamba njechimuduo kiidi kya mkambo ya wandu kundu ko nuka, na ipfo njechihenda imuanduya.

³⁶ Cha kipfa njihenda imuanduya chando njileanduya waku wanu kulya nuka ya Misri.’

³⁷ “Njikeri ihenda imuhoṟokia kundu muidime ichumia kiidi kya mkundana fulya mulewika na inyi.

³⁸ Kyamba njihenda iwuta ipfo kiidi kyanu walya wawode orikiki na walya wose walenjidekio, njechiwawuta wose ipfo njorukenyi njihenu kundu waledao masinga, kyaindi wechiidima iida na ipfo orukenyi lo Israeli pfo lo kyasapfo na ikyo kihende imumanyisha ke inyi nyi Mndumii.

³⁹ “Mndumii-Ruwa nahamba adi, iyo mba ya Israeli engeṟenyi iindia sanamu tso tsanu kokoya mulakundi injiadanyia, kyaindi njikeri imuikimba ke mochiidima ifanyitsase rina lyako liele ko wuindi wo wonu woindiya sanamupfo.

⁴⁰ Ko ifumvu lyako liele, ifumvu lileshe lya Israeli, Mndumii-Ruwa nahamba adi, wandu wo wa Israeli na walya wose wai kulya orukenyi wechicha injiindia, na inyi njechiwaambia, wawenjiendie shidaso shawo na shiinengo shawo shiele wasambuṟie.

⁴¹ Ngamemaa iwawuta ipfo njorukenyi muweṟaṟanyikie, kiidi kya mkambo fo wandu, njechimuambia, na iwasanyia sanyia, na rina lyako liele lyechihenda irumisho kiidi kya mkambo yo ya wandu.

⁴² Ili mandi njechimuende na orukenyi lo Israeli, oruka njileteṟia ke njechiluinenga waku wanu nyi nanyo mochiwutaho imanya ke inyi nyi Mndumii-Ruwa.

⁴³ Kipfa kya ikyo, nyi mochihenda ikumbuo mawuto hanu mawicho muwewutie halya halemufanyiṟa, naho hechimwendie wusutsu,

⁴⁴ nanyo mochiwutaho imanya ke inyi nyi Mndumii-Ruwa, cha kipfa njechiringa rina lyako, kyamba njechimuwutia chando muwesumhanyi ko mawicho hanu muwewutie pfo manya mkao yanu njiwichopfo, iyo mba ya Israeli, nyi wudo Mndumii-Ruwa ahamba.”

Modo foatso ora lo nuka

⁴⁵ Mndumii-Ruwa kadedase na inyi kanjiwia,

⁴⁶ “Iyo mndu henda ora lo nuka uweonguo na iikimba walya walee kiidi kya mashidi orukenyi lo Negebu.

⁴⁷ Ongoya wandu wo wa Negebu ochiwawia, nyi wudi Mndumii-Ruwa ahamba, nakeri iatsa modo fuhende ikoṟa mashidi hose mawishi na halya maumu kiidi kyapfo, modo fo nyi fochiwokia ora lo nuka mṟasa ora lo huye manya kuwode mndu echiidima ifurumishapfo, na orio mndu nechiicho ngumia yafo.

⁴⁸ Wandu wose wechimanya ke nyi Inyi Mndumii-Ruwa ngaatsa modo fo nafo fochiwa irumishapfo.”

⁴⁹ Na inyi ngahaluo ngahamba, “Ee Mndumii-Ruwa wandu wa wenjitaluo wechihaluo inyi nyi mndu ulya ekehamba njoṟiyo tupu!”