EZEKIELI 2 - Bibilia Kui Mdedie fo Kimochi

Ezekieli alaho nawe mwikimbi

¹ Nalyo kanjiwia, “Iyo mndu! Hoṟoka na madende hapfo, njikundi ideda na iyo.”

² Njekiicho ṟu lilya, Mumuyo fo Ruwa fukaida kiidi kyako na inyi ngahoṟoka, ngaweadanyia chando aweideda na inyi;

³ “Iyo mndu, nnjikeri ikuduma ko wana wa Israeli, ko wandu watahachie, walelekana na inyi, wo hamu na waku wawo walenjidekio mṟasa inu kudi.

⁴ Njikuduma ko wanawo walawode sonu, wai waminyi, na iyo nochiwawia Mndumii-Ruwa nyi ahamba adi;

⁵ Koya wandu wo wechiicho ma walakunde iicho kyamba wai wandu waminyi kyaindi nyi wemanya ke muikimbi o Ruwa nakeri kiidi kyawo.

⁶ Ko ikyo iyo mndu, ma ulawaowuo, manya madedo hawo halakuoweshe. Ma chandu mbihinu na msha shii kuṟingichia, ngoseṟa nudamie huye ya shisuwa, manya ulaowuo madedo hawo, manya ulapfio nyi mdo kipfa kya nyashi iloṟie ipfo shamunyi shawo, chakipfa wandu wa nyi wa waminyi mnu.

⁷ Koikyo nochiwawia madedo ha hako, koya wakundi ihaadanyia ang'u ihaleha. Mba i iwode wandu waminyi.

⁸ “Kya indi iyo mndu adanyia idedo lyi njikeri ikuwia, manya ulawe momina cha mba iya iwode waminyi, tambaṟuo dumbu lyapfo ulye kindoki njikeri ikuinenga.”

⁹ Kiheri njileiria meso ngakoya njii mhoṟoye owoko luwode kitapu kiwei kiṟehie:

¹⁰ Owoko lulya lukatambaṟuo kitapu kilya oshangunyi loko. Kiwei kiṟehie njora tsose madedo ha msumukio, shilio na madedo ha ochia.