EZEKIELI 19 - Bibilia Kui Mdedie fo Kimochi

Kiimbo kya kilio

¹ Henda lilia wanenewo wa Israeli:

² “Uhambe mayo mwiso fo kika nawei mrahari , kyamba nyi aleng'anyisha, wana wake kiidi kya mwiso njilang'a.

³ Kaweng'anyisha umu o malea hake, katoṟika, kaidima ihenda ilasa nao, kawa molya wandu.

⁴ Mkambo ya wandu wawei kufui wakaicho mbonyi tsake, wakamṟingichia na imbika odehonyi, wakamduo orukenyi lo Misri, wechimkuruo na sumi.

⁵ Wamae kawedia alambone, mkusirie fukasia; kyasia kang'anyishase umu o malea hake, kawewa mwiso njilang'a.

⁶ Ichu kaweng'anyia kiidi kya miiso tsingi, kawekulosha iwada shindo shelya, kawewa molya wandu.

⁷ Ichu kanyamaṟa njomombo tsilya tsawo, kaolotsa mṟi iya yawo. Oruka lulya lukaomboka hamu na shose shiweipfo, kipfa kya iringona lyayo.

⁸ Mkambo yose ya wandu ikalimbana nao njora tsose, wakahoṟotsa odeho lowo njora tsose, wakambada.

⁹ Nawo wakambada, wakambika itimbenyi, wakamduo ko mangi o Babiloni, ipfo wakampfunga na ṟu lyake, lilakiichiose ipfo mafuvunyi ha Israeli.

¹⁰ Mae opfo nakeri cha msabibu fumdonge kufui na mṟinga, nafo fukaṟaa maṟamba hafoi na ndunda tsifoi.

¹¹ Maṟamba hafo hawei mashimbi; hakang'ana hakawase ndichi tsa wumangi. Msabibu fukalea huye mapuchini, na orio mndu kawona chando lileshe, na maṟamba sa hafoi.

¹² Kyaindi msabibufu fukahenda ikuṟuyo, fukaoloka wanda otanu lukafunjafunja, maṟamba halya hafo na iumiṟa ndunda tsafo daa, nahong'u modo fukahenda ifukoṟa.

¹³ Kyaindi wulalu fumdonge handu kuumu, handu kuumu kulawode mṟinga.

¹⁴ Modo nyi fulehenda ikoṟa maṟamba, halya hafo na ndunda tsafo, kulakiwonekeseho maṟamba hesungusia ndichi tsa wumangi.” Iki nyi kiimbo kya kilio nakyo kechihenda kechiimbo kafoi.