EZEKIELI 18 - Bibilia Kui Mdedie fo Kimochi

Mndumii-Ruwa nekeanduya orio mndu kihianyi na mawuto hake

¹ Mndumii-Ruwa kacha ideda na inyi kahamba,

² “Nkili mandi mokewuya wuya ifanano li kunu orukenyi lo Israeli? Ke wafee wakeri ilya ndunda tsa msabibu njiwishi, na maheho ha wana hakapfa mpfipfi?

³ Ambuya, Inyi Mndumii ai na moo, njimuwia mochikikaa muwuyese ifanano li kunu kiidi kya Israeli pfo.

⁴ Kyaindi manyenying'u ke mrima yose nyi yako, mrima fo mfee na fo mana, yose nyi yako, koikyo mrima fulya fochihenda inyamaṟo fochihenda ipfa.

⁵ “Kokoya mndu nai mhendeli kawehenda iwuta shindo sha wusumuhanyi,

⁶ manya elekelya shidaso shishiwute ko sanamu tsa Israeli manya elekeindia sanamu tsa maruwa ha Israeli, manya elekechumia na mka o wamṟasa oke, manya elekelaa na mndu mka akeri mfirinyi yake,

⁷ manya elekewonyia mndu ose, kawewa mndu mowihiṟa kilya aakuye, kawewa mndu elekeiwa, kaweinenga wakiwa shelya na iṟika nguwo walya wawuṟie,

⁸ alai mndu ekeakuya pesa natao tsa ngoseṟa, awei mndu elekewuta shindo sha mkao mmbicho, kawewa mndu ekewutia wandu wose sha wusumuhanyi,

⁹ mndu cha icho kawa moosha mawawaso hako na muanduye foko, icho nyi akeri o wusumuhanyi nao nyi echikaa na moo.” Nyi wudo Inyi Mndumii-Ruwa ngahamba.

¹⁰ “Kya indi mndu chu kafee mana akeri miwi na mbahi,

¹¹ msa ekelya shidaso shilewuto ko sanamu, kawewa mndu ekechumia na mka o wamṟasa oke,

¹² nao kawewonyia wakiwa na walya wawuṟie, na isoka wandu ko pfinya masaa hawo, kawewa mndu elekewihiṟa kilya kii kiwike reka lingise kawa mndu moindia sanamu na iwuta shindo shiwichuṟie,

¹³ nawei mndu ekeakuya wandu kundu nawone ngeria. Ngesa mndu cha ichu neidima ikaa na moo? Echiidima ikaa na moo pfo. Kipfa kya mawuto ho hose mawicho owutie nechipfa kyaindi nyio amonyi akuendie opfulo.”

¹⁴ “Kyaindi mndu chu kafee mana na manachu kawona manyamaṟo ho hose ndeye awutie, kaowuo alaoshe ang'u iwuta cha mfee oke,

¹⁵ alakunde ilya shidaso shileinengo sanamu ipfo mafumvuhu, manya alakunde iindia sanamu tsa mba ya Israeli, manya alakunde ilaa na mka o wamṟasa oke,

¹⁶ alakunde iwutia mndu ose owicho, alasoke kilya kikirekie, alakunde isoka, kyaindi kawewa mndu ekeinenga wakiwa shelya, na iṟika nguo walya wawuṟie.

¹⁷ Kawekuṟisa iwuta mawicho alakunde iambia kiira kya ngoseṟa ko walya alewaakuya, kawamoosha muanduye foke na iringa mawawaso hako. Ichu echiidima ipfa kipfa kya wunyamaṟi wo wafee wakepfo, ichu nechikia.

¹⁸ Kyaindi ndee oke, ichu aleiwa, kawesoka wandu masaa hawo, kawewa mowuta mawicho kiidi kya mkambo, nechihenda ipfa kipfa kya njonyamaṟo tso tsake awewutie.

¹⁹ “Indi nyo mokewesa, chi kiwaṟi mana nakapo kipfa kya njonyamaṟo tsa mfee oke? Kokoya mana chu nalewuta sha wusumuhanyi kaweosha wuwawaso woko, kyalohi ngambia ichu nechikaa na moo.

²⁰ Mndu mowuta mawicho nechipfa. Mana echikapo kipfa kya wunyamaṟi wo ndeepfo, manya mfee echikapo kipfa kya wunyamaṟi wo mana pfo, kyamba wusumuhanyi woichu wusumuhanyi nyi woke amonyi, na wuwicho wo ichu mowuta mawicho nyi woke amonyi.

²¹ “Indi kokoya mndu mnyamaṟi awechidumbuya njonyamaṟo tsake tsose awewutie, kawewa moosha mawawaso hako na iwuta shilya sha wusumuhanyi, nechihenda ikia manya echipfasepfo.

²² Kyamba njonyamaṟo tsake tsose nyi tsechihenda ihoṟio, nao nechihenda ikia kipfa kya mawuto hake ha wusumuhanyi.

²³ A ngesa inyi njekechihio ili mandi mndu apfa kipfa kya wunyamaṟi woke? Nyi wudo Mndumii-Ruwa akeri iwesa, ngesa chi nanga awechidumbuya kahenda ikiṟo?

²⁴ “Kyaindi ili mandi mndu o wusumuhanyi echihenda ida iwuta sha wusumuhanyi, kahenda iwuta mawuto mawicho hafananyi na walya wawuta mawicho, ngesa nechihenda ikaa na moo?” Ote! Kyamba mecha halya hose awewutie hechihenda ihadimo. Kyaindi kipfa kya mawuto ho mawicho halai ha wusumuhanyi ahenda iwuta nechihenda ipfa.

²⁵ Ambuya nyo mokehamba mbutie fo Mndumii fusumuhanyipfo. Kya indi inyi njikeri imbesa, ngesa nyi mbutie fo Mndumii fulai fo wusumuhanyi ang'u nyi mbutie yo yanu ilai ya wusumuhanyi?

²⁶ Ambuya ili mandi mndu o wusumuhanyi ahenda ida iwuta sha wusumuhanyi kahenda iwuta shindo shiwicho kawuta ho ipfa, nyi apfa kipfa kya mawicho ho awuta.

²⁷ Ko ora lungi ili mandi mndu mnyamaṟi echihenda ialachika kada mawuto mawicho hake kahenda iwuta mawuto ha wusumuhanyi nyi echikia.

²⁸ Ichu nyi alekusaṟa kawedumbuya kya njonyamaṟo tsake awewutie, nyi kyalohi ichu nyi echikia echipfapfo.

²⁹ Manya kudo, mba ya Israeli ihamba mbutie ya Mndumii isumhanyipfo. “Iyo mba ya Israeli ngesa ni mbutie foko fulai fo wusumuhanyi ang'u nyi mbutie yapfo ilai ya wusumuhanyi?

³⁰ “Koikyo njikerihenda ikuanduya iyo mba ya Israeli, orio mndu mbutie foke, nyi wudo Mndumii-Ruwa ahamba. Dumbuyenyi muhaluke, muhende ida mawicho hanu hose kundu njonyamaṟo tso tsanu tsilahende imunyamaṟa.

³¹ Denyi mawuto hanu hose mawicho muwenjinyamaṟie, kuṟikenyi nguo njicha na mrima iyo mba ya Israeli, nkili mukundi ipfa?

³² Kyamba njikundi manya umu onu nadekepfo.” Nyi wudo Mndumii-Ruwa ahamba. Koikyo, “Dumbuyenyi njonyamaṟo tsanu muhende ikia.”