EZEKIELI 17 - Bibilia Kui Mdedie fo Kimochi

Mfanano fo mbeṟo na msabibu

¹ Idedo lya Mndumii likanjichea lyechichamba,

² “Iyo mndu! Hamba oṟayo, udede na wana wa Israeli kui mfanano.

³ Uwawie, nyi wudi Mndumii-Ruwa ahamba, Nyi kuweipfo mbeṟo sa ing'anyi makungo hayo haweng'anyi mnu, mamberi hayo nyi hawemaleshe, hakawechopo kui fana tsa mbaṟi tsifoi. Mbeṟo yo ikarunduka mṟasa mafuvuhu ha Lebanoni, ikakaa machenjehu ha ikidi lya meresi;

⁴ ikafunjaho iṟamba lya ikidi lilya, kaduo iṟamba lilya kuleshe orukenyi lo wandu wa mbucha, kaliwika iṟamba lilya kiidi kya walya wekapa mbucha.

⁵ Nalyo kawutase mbeu kulya orukenyi lo Israeli, kaidonga hando kuwode teri njicha na mṟinga.

⁶ Mbeu ya ikang'ana ikawewa ikidi ling'anyi lya msabibu furambalalie, maṟamba halya hakadoya huye kulya kundu mbeṟo iya iwei, na mri iya ikaatsa wanda alya hando lilidonge. Msabibu fulya fukadosa maṟamba na maṟa sa hafoi.

⁷ “Kyaindi kukawekaasepfo mbeṟo sa ing'anyi, iwode makungo hang'anyi hawode mamberi sa hafoi. Kyasia msabibu fulya fukaatsa mri fukawedosa maṟamba hakadoya kulya, kundu mbeṟo iya ikeri kundu ifunose.

⁸ Kyaindi msabibu fulya fuwembute alya kichanjenyi kyake, fukawedongo terinyi njicha iwode sari na mṟinga, kundu fuidime ioṟa maṟamba na ikumbia ndunda, nalyo fukuwutieho iwa msabibu sa mcha.

⁹ Wulalu, Mndumii nawesa adi, ‘Ngesa! Msabibufo fochikia? Ngesa! Wechihenda ikuṟuo mri yo yake, na ipuṟa ndundatso tsafo na maṟambaho naho hawesaramaya? Manya kukundikie ho wandu wa finya wefukuṟuo pfo.

¹⁰ Nyi fui mdonge a ngesa fochioṟa? A ngesa ili mandi otanu lo ora lo ngamenyi lochiida, chifochihenda imamia? Ma fochihenda iuma oo handu fumdonge.’”

Mdambuye fo mfanano

¹¹ Nalyo idelo ya Mndumii-Ruwa likanjichea likanjiwia,

¹² “Wulalu wesa wana wa mba i walemi ngesa na wamanya kindo ifananolyo lyawawia? Wawieng'u mangi ya Babeli ilecha na Yerusalemu ikaduo mangi o mṟi fo hamu na wanene wake mṟasa Babiloni.

¹³ Kahenda sambuṟa ho umu o wakioṟa kya wumangi kahenda ilya mma nao. Kawewada wanene waapfinya wa Israeli masinga,

¹⁴ Kundu wumangi wu wufafae wechiringa kyasa kyo walewika nao.

¹⁵ Kyaindi katahacha kaduma ko mangi o Misri namdikie frasi na wasoṟo mbahanyi. A ngesa nechiidima iwinga? Ngesa mndu mowuta shindo sha mbaṟi i nechiidima ikia? Natehiye kyasa naidime ikuashuo?

¹⁶ “Inyi Mndumii-Ruwa ai na moo ngahamba, mangi chu o Yuda nechihenda ipfia kulya Babiloni, kipfa nyi aletehia mma na mkundana fulya alelya na mangi chu o Babiloni, ichu alembika wumanginyi.

¹⁷ Kyamba mbahanyi yo ya Farao ma chandu ing'anyi yechiidima imtarama shidenyi pfo, ili mandi wechiṟingichio na mfoo watengetienyi, ipfo kundo wechioloka na irumatso,

¹⁸ kyamba naletehia kyasa kilya na mkundana fulya alewika oo amonyi, kawuya iwuta shindo sha mbaṟi i, kuwode chandu echiidima ikia pfo.”

¹⁹ Koikyo Mndumii-Ruwa nahamba, “Inyi Mndumii ai na moo, ngalya nyamu, njechihenda imkapa kipfa nyi alefunja mkundana fulya alelya na inyi.

²⁰ Ambuya njihenda imdeha na mdeho fo wadehi njimduo Babeli njihende imkapiapfo kipfa kya mawuto hake mawicho alenjiwutia.

²¹ Kyamba waskari wake wose wecha wechihenda iwoho, na walya wetsuhaaho wahende irahanyikia masangenyi kose, nanyo mochihenda imanya ke nyi wudi Mndumii ahambie.”

Kyasa kya Mndumii kya mkusirie

²² Mndumii nahamba adi, “Njechifunja iṟamba lya huye lya meresi, njihende se ikuwutia ho iṟamba sa litutu, na ilyo njihende ilidonga fuvuhu lileshe.

²³ Ee da; Njihende idonga iṟamba li fumvuhu sa lileshe lya Israeli, nalyo lyechihenda ing'ana lechioṟa na ikumbia ndunda, lihende iwa ikidi licha, na shilehe sha mbaṟi tsifoi shechihenda ikuowia wanda ya mṟinje folyo.

²⁴ Nalyong'u mashidi hose ha oruka hahende iwutaho imanya ke inyi Mndumii njekefuiṟa mashidi sa maleshe, ngaweiriya huye mashidi sa mafui, lya ngoseṟa ngaweumiṟa mashidi mawishi, na halya maumu ngawehawishiṟa, nyi inyi Mndumi ngahamba njido.”