EZEKIELI 16 - Bibilia Kui Mdedie fo Kimochi

Mṟi fo Yerusalemu fowuṟa wuhendeli

¹ Idedo lya Mndumii-Ruwa likanjichea se lyechihamba,

² “Iyo mndu henda ongoya mṟi fo Yerusalemu mawicho hafo.

³ Wia Yerusalemu Mndumii-Ruwa nakuwia adi; Iyo nyi ui mfee orukenyi lo Kaanani. Ndeye opfo nyi Mwamori na maye opfo nyi Mhiti.

⁴ Kiheri kilya ulefeo kuwode mndu aleletsana kimambuchu kyapfo pfo, manya ulesanjo na mṟingapfo ma iangatso na monyo pfo, ngoseṟa kuwode alekuṟika nguo tsa kikoku pfo.

⁵ Kuwode mndu alekusaṟia nakuwutie ishopfo; kyamba kuwode mndu alekukundapfo. Kipfa lilyamandi ulefeo nulewihitso patehu kyamba ifeo lyafo lilechihiṟa mndupfo.

⁶ “Ili mandi njileida hafui na iyo ngakuwona ochiikelea ipfo samunyi yapfo. Nahong'u ngakuwia, ipalyipalyi lya samu,

⁷ ‘Kaa na moo uwe cha ikidi lilicha lilidonge mdeminyi. Na iyo kowelea kowa manowaka ang'anyi mawee hake hamaumbe necha, na njui tsapfo tsikalea necha. Kyaindi nuwekeri kiṟanguo .’

⁸ “Kiheri njileidase ngakoya kiheri kyapfo kekoso kishikie. Ngawekushikia na nguo yako, nalyo ngawika kyasa na iyo kealikana. Nahong'u iyo kowa oko. Nyi wudo Inyi Mndumii-Ruwa ngahamba.

⁹ “Kyasia ngakusanja na mṟinga samu iya iwei mbihunyi fopfo, ngawekushia mafuda.

¹⁰ Njilekuṟika iṟinda sa lichope necha, na shadu sa shicha, ngawekupfunga kitsinyi kyapfo na kitambaa sa kiili na mdonyi kopfo ngakushikia na mitandio fo kimamile.

¹¹ Njilekuchopa ko shindo sha wuhuru, ngakuṟika bangili mawokonyi hapfo ngawekuṟika mshe fo tsingonyi.

¹² Njilekuṟika rachi mbuonyi yapfo, na shipulisho madunyi ngawekuṟika shela sa njicha mdonyi fopfo.

¹³ Koikyo nuweimchope ko fesa na sahabu, na mṟae fopfo fuwei fo wuhuru wung'anyi, nguwo njiili na hariri, mlie fopfo fukawewa mcha, mkate mcha, wuki na mafuda mecha ha msenefu. Koikyo kohenda ichia mnu kofanana na mkamangi.

¹⁴ Kiṟumi kyapfo kikamanyika kiidi kya mkambo ya wandu kipfa kya wucha wopfo kyamba nyi Inyi Mndumii-Ruwa njiletana kudo.

¹⁵ “Kyaindi kiṟumi kya wucha wopfo kikakutewa kohenda iwuta shindo sha mkika na ilya na walya wewuta sha useṟeṟi.

¹⁶ Ambuya nyi ulewuta nguo tsilya tsapfo njicha koachikia natso handu heterewia, na handu na oo kahaluo nyi handu hewutia shindo sha mkika, kindo kya mbaṟi ii kilemewono manya kechikaa kiwonopfo.

¹⁷ Kowewuta shindo shilya shekuchopa njilekuinenga, sahabu iya yako na fesa iya yako kohendasungusia sanamu tsa wasoṟo, natso kowehenda iwuta shindo sha mkika natso.

¹⁸ Kingise kowewuta na nguwo tsilya njichope njilekuinenga kohenda ishikia natso sanamu tsilya; kowetsiinengia mafuda halya na marashi halya njilekuinenga.

¹⁹ Shelya shilya njilekuinenga; mkate msungusie na mso mcha, mafuda ha msenefu, na wuki shose kohenda ishiwuta shidaso shechihiṟa sanamu tsilya. Nyi wudo Mndumiii Ruwa ahamba.

²⁰ “Ngoseṟa ya isho kowewuta wana walya ulenjifeye wa kiumi na wa kika kidaso kemaya modonyi ko sanamu tso. Ang'u nukusaṟie mawuto hapfo ha mkika ulenjiwutia nyi kindo sa kitutu koko ngesa?

²¹ Kotana ohenda iwuta wana wako kidaso kemaya modonyi ko sanamutso?

²² Ambuya kiherikyo uwekufanyitsa kiidi kya ngafu tsa waruhui ulekumbuo kiheri kya wututu wopfo kiheri uwei kiṟanguo na ikupolohocha kidi kya samu yapfo.”

Wameluki wo mṟi fo Yerusalemu

²³ Mndumii-Ruwa nyi ahamba, “Ochia nyi lopfo iyo Yerusalemu kipfa kya mawicho ho ulewuta,

²⁴ Orio, handu mbai ya njia nuwikiepfo mahekalu heindia sanamu na iyo kowutiapfo mawuto ha mkika.

²⁵ Ambuya orio mawookionyi ha njia nulewika ho hekalu, handu ho kowefanyitsa wucha wopfo ko wuṟuhui, kowekuinengia ko orio mndu ose aweida ko mawuto ha mkika.

²⁶ Kyamba nulehenda ichumia na wamṟasa wapfo Wamisri wandu waichuo lango tsa wuṟuhui, na kipfa kya mkao fo fo waṟuhui kohenda injipfulutsa nyashi.

²⁷ Ambuyang'u njihenda ikukapa njiwekusoka na kyoṟa kyapfo njihende ikiinenga wakituwa wapfo, wanawo wa Wafilisti iwo walewado nsonu kipfa kya mawuto hapfo ha wuseṟeṟi.

²⁸ “Ambuya chandu ulekeshiko, nulekapa wuṟuhui na Waashuru kyaindi kula shiko.

²⁹ Kowehenda ilya na wandu walya wa mbucha wa Ashuru ma iwo walaidime ikuwuta nyoda yapfo ya wuṟuhui. Walaidime ikuihutsa.

³⁰ Mndumii-Ruwa nahamba adi, “Ambuya chando mrima fo fopfo fui mfafa, mawuto ha mawicho hadi ulehawuta, kofanana na mndu mka amwohi.” Mndumii-Ruwa nahamba adi, “Mrima fopfo fui mkuwu, kipfa mawuto ho ulewuta nyi hekewuto nyi waka waohi.

³¹ Orio handu ipfo paṟepaṟenyi nulewika pfo hekalu lyeindia maruwa hengi, kowewutiapfo wuṟuhui. Indi ulafanane na waṟuhui wengi kyamba iyo uleambia pesapfo.

³² Kowewa cha mndu mka ekeṟuhuyo alakunde iambilia mii oke.

³³ Wasoṟo weketaa wameluki heleri, kyaindi iyo nokeinenga wasoṟo heleri tsewaterewa kundu wache ilaa na iyo.

³⁴ Ambuya wuṟuhui wopfo wufananyi na wo waka wengipfo, wo nyi weketao, kyaindi iyo noketaa ko kipfa kyako ufananyi nawopfo.”

Ngapo ya Mndumii ko Yerusalemu

³⁵ “Mndumii nyi ahamba adi kyapfo iyo mndu mka muohi.

³⁶ Mndumii-Ruwa nahamba adi kyamba ulekushukuo nguwo tsapfo cha wameluki kowekuinengia ko wakunde wapfo kowetana oindia maruwa hengi na itsidasia mbihu ya wana wapfo,

³⁷ Ambuya njihenda isanyia handu hamu mbuya tsapfo tsose na walya ulawakundi, nawo wechikuṟingichia njora tsose na iyo ukae makidi hawi hawo, njihende ikuatuo nguwo tsapfo ukae kiṟanguo oshangunyi lowo wakuambuye.

³⁸ Njikeri ihenda ikuanduya, uwone ngapo ya opfu cha mndu mka awodo eṟuhuya ang'u mndu awaha, njiwewuwuya samu yo ilepusuka ko nyashi na wunyenyi wung'anyi.

³⁹ Njihende ikudambikia mawokonyi ha wakunde wapfo, nawo nyi wechiwunduo mba yapfo na handu ha rasioni kopfo, wahende ikuatuo nguo tsapfo, na shindo shapfo shekuchopa wakude kiṟanguo ulawode kindo kyose.

⁴⁰ Wechiende mamiingi fo wandu wahende ikukapa na maho nawo wahende ikudumbuo teṟe teṟe na njoshu tsawo.

⁴¹ Wandu wo wechihenda ikoṟa mba tsapfo na ikukapa oshangunyi lo waka sa wafoi, na inyi njehenda ikuima piu mkao fopfo fo wuseṟeṟi na mkao foinenga wasoṟo heleri tsewatsutsuma.

⁴² Nyi wudong'u nyashi yako na wunyenyi woko njiwewode kipfa kyapfo shechisia, njikae na ofoṟo njilawodese nyashi.

⁴³ Ambuya nulehadima wucha wose njilekuwutia kiheri kya uwanake wopfo kohenda iwuta mawicho ha hose halenjisuiṟa, kipfa kya ikyo njechikutaa kiṟache kya isho shose ulewuta, nyi wudo Mndumii-Ruwa ahamba, nowehenda idumbuya na mkao fopfo fo wuseṟeṟi.

Mana awaka mae

⁴⁴ Ambuya, mndu akundi ikudeda kui mfanano nechihamba, “Chando mae o mndu ai na wudo mana echimbaka.”

⁴⁵ Ambuya iyo mana mshiki, mayo nalesuo mii oke na wana wake, na wawawayo naudo walesuo wamii wawo na wana wawo. Wamae opfo nyi Mhiti na ndee opfo nyi Mwamori.

⁴⁶ Wawiye ipfo Samaria nyi akeri huye yapfo hamu na wana wake na mananu opfo mtutu Sodoma nyi akeri nuka yapfo hamu na wana wake.

⁴⁷ Ambuya ulekunda iosha njotifo tsawopfo, manya iwuta mawuto hawo mawichopfo, kyaindi ko oweṟe sa lututu mnu nulenyamaṟika kota wo ko orio kindo uwekeri iwuta.

⁴⁸ So Mndumii aina moo, Mndumii-Ruwa nahamba mshiki opfo Sodoma alewuta mawuto hatahachie cha iyo hamu na wana wapfo pfo.

⁴⁹ Sodoma na wana wake walekushela, wakawelya na iihuda, wakawekukaya na ofoṟo na olele, kyaindi wakahadima ileshia owoko wakiwa na walya wawuṟie, ilyo nyilyo ideko lyawo.

⁵⁰ Ambuya nyi walekushela na iwuta mawuto ha mkika oshangunyi loko, njechiwona kudo ngahenda iwakapa.

⁵¹ Wasamaria wunyamaṟi wowo nyi kenga sa kitutu tupu kya wunyamaṟi wopfo. Kohenda iṟinganyisha wunyamaṟi wo wopfo na wulya wo washiki wo wapfo, wo nyi wechiwoneka ke nyi wai na usumhanyi.

⁵² Ambuya wulalu nochihenda ikudika wusutsu wopfo kyamba wunyamaṟi wopfo nyi wueṟie wulya wo washiki wapfo, wo kiidi kyapfo wahende iwa walawode mti. Kudikeng'u sonu na wusutsu wopfo kyamba wo wawa walawode mti.

Sodoma na Gomora yawikose ko wuhya

⁵³ Mndumii kawia Yerusalemu, “Ambuya njikeri henda iira Sodoma na Gomora hamu na wana wawo. Na wudo njiwehenda ikuira iyo kiidi kyawo,

⁵⁴ Uwuteho ikudika wusutsu wopfo kumonyi na sonu tsa mawuto hapfo uwutie, nakyo kihende iwihiṟia wanawo wa mayo moo.

⁵⁵ Kii kidi washiki wapfo Sodoma na Gomora hamu na wana wawo wechihendase iwuya mboṟa iya ya kuwoka, na iyo na wana wapfo na wudo.

⁵⁶ Ngesa chi ulemina mshiki opfo Sodoma kiheri kilya uwekekushela?

⁵⁷ Lilya mandi wuwicho wopfo wulawemeanyiko patehu, ambuya nohenda ifanana nao, kowehenda isalucho nyi wana wa Edomu na Wafilisti hamu na walya wose wa kuṟingichie wawekusuo.

⁵⁸ Mndumii nahamba nochihenda ikudika ngapo tsa ngafu tsapfo na mawicho ho hapfo unyamaṟie.”

Mndumii awika kyasa kya mlungana na Yerusalemu

⁵⁹ Mndumii-Ruwa nyi ahamba adi, “Njechikuwutia sumhana na mawuto hapfo, kyamba nyi ulemina kyasa kyapfo koweumbuya mkundana.

⁶⁰ Manya kudo njiechihenda ikumbuo mkundana fulya njilelya na iyo kiheri kya wuwanake wopfo, njihende iwika mkundana fungi naiyo msa fochikaa mlungana.

⁶¹ Ambuya nochihenda ikumbuo mawuto hapfo uwewutie uwewode nyi sonu ili mandi washiki wapfo wechiwuya wang'anyi na watutu na inyi njihende ikuinengia wawe cha wana wapfo. Indi ikyo chi mkundana foko na iyopfo.

⁶² Njikeri iwikase mkundana fungi na iyo, na iyo nochihenda imanya ke inyi nyi Mndumii.

⁶³ Kyamba njihenda ikuhoṟia mawicho hapfo hose, na ili mandi ochihakumbuo uhende wado nyi sonu ulekaria iiria dumbu lyapfo udede kindo.” Nyi wudo Mndumii ahamba.