EZEKIELI 14 - Bibilia Kui Mdedie fo Kimochi

Mndumii-Ruwa adeda kya wuindi wo sanamu

¹ Nalyo wanene maata wa Waisraeli wakanjichea,

² Nahong'u idedo lya Mndumii likanjichea lyechihamba,

³ “Iyo mndu ambuya wandu wa walemma iinengia mrima yawo ko sanamu, na sanamu tso tsikawaombotsa wunyamaṟinyi. Ngesa na sumhana wahende injiwesa inyi kindo kyose?

⁴ Henda deda nawo uwawie nyi wudi Mndumii-Ruwa ahamba, “Orio Muisraeli ose awikie sanamu mrimenyi foke, na sanamu tso tsikamwinenga kaoloka wunyamaṟinyi, indise kakunda icha na ko mwikimbi njechimhaluo sumhana na sanamu tso tsake akudikie.

⁵ Njikeri ihenda iwihiṟa Waisraeli wo na koko, iwo walenjida wakahenda iindia sanamu.”

⁶ Mndumii-Ruwa nahamba, “Dumbuyenyi mulekane na iindia sanamu tso na ida mawuto hawichuṟie.

⁷ Indi kokoya Mwisraeli ose ang'u mhenu akeri ipfo kiidi kya mba yako ya Israeli echihenda ilekana na inyi kawesa moindia maruwa hengi ha sanamu, kachea mwikimbi oko na immbesa nbonyi tsako, mndu ado njechimhaluo njimonyi.

⁸ Mnducho njelimbana nao, njechimhaluo kichano, cha kipfa njechimfuna kiidi kya wandu wako, nanyo muwute ho imanya ke inyi nyi Mndumii.

⁹ Kyaindi kokoya mwikimbi ahamba wongo kechihamba nyi inyi Mndumii njilemlemba nyi njechihoṟuo owoko loko huye yake na imfuna kiidi kya wana wako wa Israeli.

¹⁰ Wechihenda iambia ngapo tsawo, kyamba ngapo ya mwikimbi na ya ulya ahendie imbesa ideda nyi tsiṟinganyi.

¹¹ Njihenda iwuta kindo kundu mba i ya Israeli ilakikaese haleshe na inyi, ang'u walakufanyitsese kiidi kya njonyamaṟo tsawo, indi wahende ikuwia wandu wako na inyi njiwekuwia ng'u Ruwa owo, nyi wudo Mndumii-Ruwa ahamba.”

Noe, Danieli na Yobu

¹² Mndumii kadeda na inyi kahamba,

¹³ “Iyo mndu, ilimandi oruka lochihenda injinyamaṟia ko mawicho hawo, na inyi ngahoṟuo owoko loko lo ngapo huye yawo njechiwaima kelya na iwaendie njaa, ngawehenda ikapa wandu wo hamu na mando hai na moo ko opfu.

¹⁴ Manya kokoya wandu wa waṟaṟu Noe, Danieli na Yobu wawekoya wai kiidi kyawo, nyi wawechikiṟo wo wawenyi tupu kipfa kya wusumuhanyi wowo.” Nyi wudo Mndumii-Ruwa ahamba.

¹⁵ Kokoya njiwechidika mando ha ngeṟenyi kiidi kya oruka lulya, naho hakaluhaluo kulakae mndu o wandu echikaria iida kiidi kipfa kya mando ho ha ngeṟenyi.

¹⁶ Manya kokoya wandu waṟaṟu wawechikoya wai kiidi kya mṟifo, Mndumii menyi moo nahamba wawechiidima ikiṟa wana wawo wa kiumi ang'u wa kikapfo, shile wawechikia wo wawenyi tupu, nyi wudo Mndumii-Ruwa ahamba.

¹⁷ Kokoya njiwechiende shida ikarumatsa wandu wo na mando ho ha ngeṟenyi.

¹⁸ Manya kokoya wandu wa waṟaṟu wawechikoya wai kiidi kya mṟifo, Mndumii-Ruwa nahamba, so Mndumii ai na moo, nawechiidima ikiṟa wana wawo wa kika ma wa kiumipfo, kyaindi nyiwo wawenyi tupu wawechihenda ikiṟo.

¹⁹ Kokoya njiwechidika makokoi ipfo orukenyi, na kui nyashi yako ngahenda ipusuo samu ya wandu na mando hai na moo.

²⁰ Manya kokoya Noe, Danieli na Yobu wawekoya wai kiidi kyawo, inyi njii na moo, Mndumii-Ruwa nahamba wechiidima ikiṟa wana wawo wa kika na kiumipfo, shile nyi wo wawenyi tupu wechihenda ikiṟo kipfa kya wusumuhanyi wowo.

²¹ Mndumii-Ruwa nahamba, “Njikeṟi idika ngapo tsing'anyi tsina, mṟinyi fo Yerusalemu natso nyi shida, njaa, mando ha ngeṟenyi mawicho, na ndaṟe ya makokoi, natso tsihende irumatsa wandu na shindo shii na moo.

²² Walya wechiashuka hamu na wana wawo wa kisoṟo na wa kika, waṟisenyi mbutie yawo na mawuto hawo, nyi lyondo mochimanya ke ngapo yo njilekapa Yerusalemu nyi ya sumuhana.

²³ Mukamaa iwona mawuto ho hawo na mchumie yawo, mochiidikia ke nyi njiwewode kitewe kewuta isho njilewawutia nyi wudo Inyi Mndumii-Ruwa ngahamba.”