EZEKIELI 12 - Bibilia Kui Mdedie fo Kimochi

Mwikimbi awa msami

¹ Idedo lya Mndumii-Ruwa likanjichease lyechihamba,

² “Iyo mndu ambuya nukeri kiidi kya mba ikeri njilemeri kya mba wandu wo nyi wawode meso hewona kyaindi wawonyipfo, wakawewada na madu heicho kyaindi wekeichopfo. Kyamba ikeri mba njilemeri.

³ Kyasia Iyo mndu kupfunge nuwekudika iṟio cha mndu akeriidicha oruka loke, uwekure ili kulameila. Wuta kudi oshangunyi lo wandu wakuwone chando ukeri idicha uwuka iya uhende handu hengi. Kofia wechiwutaho imanya chandu wai mba njilemeri.

⁴ Nahong'u uire nzohoṟa tsapfo oshangunyi lowo kiheri kya mfiri cha tsa mndu asamiṟo. Uwekuidia oshangunyi lowo kyukanyi na nzohoṟa tsapfo cha mndu ahenda kiowionyi.

⁵ Kii kidi tocha ṟoche o omombonyi lo mba yapfo noideho hamu na nzohoṟa tso tsapfo.

⁶ Uwekudika nzohoṟa tsapfo makosohu hapfo oshangunyi lowo ili kio, uwekuidia ṟochenyi ushikie kyamu kyapfo kundu ulawone oruka lu kyambale nyi njikundi iyo uwe kichano ko mba i ya Israeli.”

⁷ Kyasia ngawewuta chandu Mndumii alenjiwia, ngapfunga iṟio lyako kiheri kya mfiri oshangunyi lowo cha lya mndu akeri isama. Ngawehenda itocha ṟoche omombonyi lo mba yako, ngawekudika iṟio lyako oshangunyi lowo ili kio ngawekuidia alya ṟochehu ngahenda.

⁸ Ili lya ngama ngamenyi idedo lya Mndumii likanjichea lyehamba,

⁹ “Iyo mndu ngesa wanawo wa Israeli wawalemeri wado wamekuwesa nkiki uwuta kudo?

¹⁰ Nochiwawia kudi, ‘Mndumii-Ruwa nyi ahambale, kichano ki nyi ko mangi chu o Yerusalemu na ko wana wa Israeli wakeri ipfo kiidi kya mṟifo.

¹¹ Kyamba kilya owuta oshangunyi lowo nyi wudo kihenda iwa kowo, kipfa nyi wakeri ihenda idao wusingenyi.

¹² Nao mangi chu ai kiidi kyawo nechikudika ṟio lyake makosohu hake ili kio, nawehenda iida ṟochehu lilitoche omombonyi lo mba yake naweshikia kyamu kyake nakuhendie elechiwona orukalu.

¹³ Na inyi njechimwoṟowia mdehonyi foko fumbade nadao mṟinyi fo Babeli. Nyipfo kundu echipfia alawona mṟi fo.

¹⁴ Njechiṟaṟanja ipfo na ipfo walya wose waoshanyi nao na mbahanyi tsake tsose na inyi njechiwawaha wose na oshu.

¹⁵ Nyi lyondi wechiwutaho imanya ke inyi nyi Mndumii ili mandi njechiwaṟaṟanja ipfo na ipfo na iwakumba ipfo njorukenyi tsingi njihenu.

¹⁶ Kyaindi, njechikiṟapfo sa waangu njiwakiṟe shida, njaa na ndaṟe kundu iwa waidime ionguo wuwicho wowo kiidi kya mkambo ya wandu ipfo kundu waihenda nawo wawute imanya ke inyi nyi Mndumii.’”

Kichano kya mwikimbi akeri idedema

¹⁷ Idedo lya Mndumii likanjichea se lyechihamba,

¹⁸ “Iyo mndu lya kelya kyapfo ko wuowu, uwekunyoya mṟinga fopfo ochidedema.

¹⁹ Uwewia wana wo wa Israeli, nyi wudi Mndumii-Ruwa ahamba ko wandu wo wakeri ipfo Yerusalemu na oruka lu lo Israeli, walye kelya kyawo wechidedema na ikunyoya mṟinga fowo ko wuowu wung'anyi, cha kipfa oruka lu lowo lochikumbiase kindo pfo, kitewe nyi wuwicho wowo.

²⁰ Mṟi yo yawo iweichuo wandu yechiwa wulya na oruka lo lochiwa wukiwa, nanyo mochiwutaho imanya ke inyi nyi Mndumii.”

Idedo lya Mndumii lyechiawutsio

²¹ Mndumii kadeda na inyi kanjiwia,

²² “Iyo mndu, nkili mandi wadeda deda kunu kiidi kya Israeli ke mfiri yameidiya na wukimbi wuwei wudede wuipfo sepfo?

²³ Nochiwawia Mndumii-Ruwa nyi ahamba mdedie fo mbaṟi fochihenda iwono kiidi kya Israeli pfo kyamba mfiri yameafukia na kilya kiweikikiimbe kyose nyi kihenda iawutsio.

²⁴ Kyamba kiidi kya Israeli kochikaa kuwono wuikimbi ang'u ndodo tsa wongopfo.

²⁵ Kyamba inyi inyi Mndumii, na orio idedo njechilideda nyi lyechihenda iwutika kudo. Kochikaasepfo ikeleṟapfo iyo mba iwode wuminyi. Kyamba njechideda idedo nalyo liwehenda iwutika kudo nyi wudo Mndumii-Ruwa ahamba.”

²⁶ Idedo lya Mndumii likanjichea

²⁷ “Iyo mndu, wana wo wa Israeli nyi wakusaṟie ke wuikimbi wo na ndodo tso uwaikimba nyi tsa mafiri maleshe hakeriicha!

²⁸ Kyaindi wawie kudi, Mndumii-Ruwa nyi ahamba, ‘Kuwodese ikeleṟapfo, kyamba orio idedo ngalideda nyi lyechihenda iwutika kudo, nyi Inyi Mndumii-Ruwa ngahamba.’”