EZEKIELI 11 - Bibilia Kui Mdedie fo Kimochi

Wunyamaṟi wo Yerusalemu

¹ Mumuyo fo Mndumii-Ruwa fukanjiiriya huye fukanjiduo mongonyi fo hekalu lya Mndumii-Ruwa fuwei ora lo ngamenyi. Kii kidi ngawewonapfo wasoṟo makumi hawi na watanu (25). Kiidi kyawo kuweipfo Yazania mana o Azuri, na Pelatia mana o Benaya, iwa nyiwo wawei wanene wa Waisraeli.

² Nalyo Mndumii kanjiwia, “Wandu wa nyiwo wekesaya mbonyi njiwicho na iinenga wandu chila njiwicho kunu mṟinyi.

³ Kyamba wandu wa nyi wakehamba, kiheri kewika mba kyameshikepfo, mṟi fu nyi fukeri cha sufuria yekoṟa naso nyi lui nyama ipfo sufurienyi.

⁴ Koikyo Iyo mndu waikimbe ikimba wandu wa.”

⁵ Mumuyo fo Mndumii-Ruwa fukanjichease, nao kanjiwia, “Nyi wudi Mndumii-Ruwa ahamba iyo mba ya Israeli Mndumii naichi makusaṟo hapfo na ikyo ukusaṟie.

⁶ Kyamba nulewaha wandu wafoi mnu kiidi kya mṟi fu itane njia tsose tsaichuo mnying'a ya wandu.

⁷ Mndumii-Ruwa nyi ahamba, ‘Wandu walya mlewawaha nyi wawa nyama na mṟi fu fowa sufuria. Kyaindi nyi muhenda ifuno muwuke kunu mṟinyi.

⁸ Kyamba nuleowuo oshu, kyaindi nochipfa ko oshu, nyi wudo Mndumii-Ruwa ahamba.

⁹ Ambuyenyi njikeriihenda iwawuta ipfo kiidi kya mṟi fo njiwadambikie mawokonyi ha wandu wahenu, nyihondo ngapo yako yechiwahoya.

¹⁰ Muhende iwohiyo kunu kunu orukenyi lonu, na orio mndu nahende imanya ke inyi nyi Mndumii-Ruwa.

¹¹ Mṟi fu fuhenda iwa sufuria yekuringapfo manyo muhenda iwa nyama kiidi kyapfo, kyamba njihenda imukapa ipfo nja ya mṟifu fo Israeli.

¹² Kipfa kya ikyo mochihenda imanya ke inyi nyi Mndumii-Ruwa ichu mulaleosha njia yake na iumbuya wuwawaso woke mukahenda iindiya mawawaso na mchumie fo wandu wahenu walya wawemuṟingichie.’”

¹³ Nahong'u kiheri njiwewuta wuikimbi wulya kudi Pelatia mana o Benaya kaoloka kapfa. Nalyo na inyi ngaoloka wanda na kyamu ngafihiṟa ko ṟu ling'anyi njechihamba, “Hoi Mndumii-Ruwa nocha ikombetsa wana wa Israeli waletsuhaa?”

Kyasa kya Ruwa ko walya wawei wusingenyi

¹⁴ Idedo lya Mndumii-Ruwa likanjichea.

¹⁵ “Iyo mndu, wana wa mayo wa wai kunu mṟinyi fo Yerusalemu, wakeri ideda deda kyapfo hamu na Waisraeli walya wakeri wusingenyi, ke walya wakeri wusingenyi waledekio mnu Mndumii-Ruwa koikyo naluinenga o oruka lu.”

¹⁶ Koikyo wia wandu wo wakeri wusingenyi ke nyi inyi njilewasamiṟia ipfo kuleshe kiidi kya mkambo ya wandu wahenu, manya kudo njikeri kiidi kyawo ipfo wuhenunyi.

¹⁷ “Uwewawia se nyi wudi Mndumii-Ruwa ahamba, ‘Njechimusanyia sanyia se muwuke ipfo njorukenyi njilewananatsa njiwuye imwinenga se oruka lu lo Israeli.

¹⁸ Ili mandi mochiwuya njechiwutapfo orio kindo kyose kisuiṟie na ngafu tsose.

¹⁹ Na inyi njewainenga ngoo na mrima mhya kiidi kyawo, njihende iwutapfo ngoo njiumu cha iho na iwainenga ngoo iwode wuindi.

²⁰ Wahende ichumia njiehu tsako na iosha mawawaso hako. Nahong'u wahende iwa wandu wako na inyi njiwewa Ruwa owo.

²¹ Kyaindi walya wose wachumia njia tsilai sungusihu na weosha maruwa hengi, njechiwakapa.’” Nyi wudo Mndumii-Ruwa ahamba.

Ngela ya Mndumii yasama kulya Yerusalemu

²² Shindo shilya shiwewode moo na makungo shikawoka irunduka na shidenga shilya shikawehenda hamu nasho. Ngeela ya Mndumii-Ruwa o Israeli ikakaa huye yasho.

²³ Ngeela iya ya Mndumii-Ruwa ikasama kiidi kya mṟi fulya ikahenda huye ya fumvuhu liwekeri ora lo ngamenyi lo mṟi fulya.

²⁴ Njikeri njido kiidi kya ndodo iya, mumuyo fo Mndumii-Ruwa fukanjiiriya huye fukanjisotsia kulya Babiloni ko wandu walya wai wusingenyi. Nahong'u ndodo iya ikasia.

²⁵ Nalyo ngaongoya wandu walya wawei wusingenyi shindo shilya shose Mndumii alenjiloṟa.