EZEKIELI 10 - Bibilia Kui Mdedie fo Kimochi

Ngela ya Mndumii yasama kulya hekalunyi

¹ Ngairia meso kulya maloalonyi huye ya shindo shilya shiwei na moo ngawona kindo kiwekisungusie necha na maho maili kiwefananyi na loṟika lo wumangi.

² Ruwa kawia mndu ulya aweṟee nguwo njiili lesha mawoko hapfo kiidi ya shidenga shilya shiweleshe lung'anyishe na makungo ha mando halya hai na moo, nowute okaa lo modo lui ipfo kiidi kyaho, komeichuṟa mawoko ho hapfo, nofunanatse mṟi fulya na inyi ngaweṟingishia mndu ulya echiwuta ado.

³ Makerubi hawehoṟoki ora lo nuka lo mongo fulya fo hekalu lilya, nalyo mndu ulya aweṟee nguwo njiili kaida na mba, ipuchi ling'anyi likaida na kulya mba likaiichuṟa pacha.

⁴ Nalyo ngeela na mng'ano fo Ruwa fukawuka kulya ikarinyi fukashika huye ya mongo fulya fo hekalu na ipuchi likaichuṟa hekalu lilya lyose. Ngeela ya Mndumii ikalimika kulya mba kose.

⁵ Na ṟu lya Makerubi walya likaichio kulya hekalunyi mṟasa kulya nja ya hekalu likafanana na ṟu lya Mndumii-Ruwa ili mandi akeri ideda.

⁶ Ili mandi Mndumii-Ruwa alewia mndu ulya aweṟee nguwo njiili nahende ionduo modo ipfo shi ya shidenga shila shiwei wanda ya Makerubi halya, na o kahenda ihoṟoka o kufui na kidega kimuho.

⁷ Kerubi ulya kahoṟuo owoko loke kaonduo modo fuwei kiidi kya mando halya hawewode makungo, kafuinenga mndu ulya aweṟee nguwo njiili nao kekifuambia kawekuhendia.

⁸ Kiumbe kilya kiwewode mawoko hafananyi na ha mndu ipfo wanda ya makungo hakyo.

⁹ Ambuya njilewona shidenga shiina shifananyi. Kidenga kimu mbai ya orio kiwumbe. Shidenga shilya shiwekeri iaka aka cha iho lya zarabajadi.

¹⁰ Shidenga sho shina shiwefananyi shikawa cha ili orio kimu kikihekie huye ya kingi.

¹¹ Shidenga sho shawehenda ora lose hakunda ihenda ihaluka kulawode ihaluka. Ipfo kundu kidenga kyo kya kuwoka kihenda na shidenga sho shingi shechihendapfo.

¹² Mbihuyo ya shindo shilya shiwewode moo, ipfo mhongonyi yasho na ipfo oshangunyi losho hamu na makungo halya hawo na shidenga shilya shiweshi tengetie nyi meso haiakaaka.

¹³ Shidenga shilya shiwelaho nyi shidenga shikeri ipiṟimka piṟimka.

¹⁴ Shiumbe shilya shiwewode makungo, orio kimu kiwewode shamu shiina. Kya kuwoka nyi kya ipung'a, kya kawi kyamu kya mndu, kya kaṟaṟu kyamu kya mwiso, na kya kana kyamu kya owishi.

¹⁵ Shiumbe shi shikakuiria huye. Ishi nyi shifananyi na shilya njileshiwona alya kufui na meda fulya fo Kebari.

¹⁶ Kiheri shiwumbe shi shilehenda, shidengasho shikawehenda hamu nasho, kiheri shindo shi shii na moo shilerunduka huye na shidengasho shi kawehenda nasho.

¹⁷ Kiheri shiwumbeshi shilehoṟoka shidenga shilya shikawehoṟoka hamu nasho. Kiheri walerunduka huye na shidenga shikawehenda hamu nasho. Mumuyo fulya fo shiwumbeshi fukawekaa ipfo kiidi kya shidenga shilya.

¹⁸ Nalyo kiṟumi kya Mndumii-Ruwa kikasama kulya mba ya Ruwa kikahenda isokia huye ya shiwumbe shilya shii na moo.

¹⁹ Shiwumbe shilya shikarunduka huye shiwuka wanda oshangunyi loko, shidenga shilya shikawehenda mbai nasho. Shiwumbe shilya shikahoṟoka ora lo ngamenyi lo mongo fo hekalu lilya lya Mndumii-Ruwa o Israeli. Nalyo ngeela ya Mndumii-Ruwa o Israeli ikasokia huye yawo.

²⁰ Ishi nyi shiwumbe shilya shii na moo njileshiwona kui ngeela ya Mndumii-Ruwa o Israeli alya mbai ya meda fulya Kebari, nasho nyi shiwewode makungo.

²¹ Orio kiwumbe kiwewode shamu shina, na orio kimu makungo hana, na wanda ya makungo halya kuwewode mawoko hafananyi na ha mndu.

²² Shamu sho shikawefanana na shilya njileshiwona alya kufui na meda fulya fo Kebari. Orio kiwumbe kiwekuidia ko ihenda kusonguo.