EZEKIELI 1 - Bibilia Kui Mdedie fo Kimochi

Kidi kya wuitoṟi kya Mndumii-Ruwa

¹ Maka fo makumi haṟaṟu, meri fo kana, na mkonu fo katanu njiwekeri kulya Babeli kiidi kya walya waledao wusingenyi kufui na meda fo Kebari. Nahong'u ruwehu kukanjitambaṟukia ngawewona Ruwa kui ndodo.

² (Fuwei maka fo katanu wokia mangi Yehoakimu amdao wusingenyi).

³ Nahong'u idedo lya Ruwa likacheya mwikimbi Ezekieli mkohanyi mana o Buzi alya mbai ya meda fo Kebari orukenyi lo Wakaldayo. Pfinya ya Ruwa iwei nao alya.

⁴ Kiheri njileambuya ngawona owira sa lung'anyi luwuka ora lo huye. Owira lu luweluṟingichie na ipuchi ling'anyi liwekeri iaka aka. Kuweipfose modo fuweiaka kiheri kyose, na makidi hawi ha modo fulya kuweipfo kindo kiweaka cha aṟeṟa.

⁵ Kiidi kya otanu lulya kukawukapfo shindo shishiwumbe shiina shirie ofano lo mndu.

⁶ Shiwumbe shi nyi shiwewode mdo iina na makungo hana orio kimu.

⁷ Madende hawo hawemahoṟotsu, na njowayo tsawo tsikafanana na mbahachu tsa mbe; natso tsikaakaaka cha aṟeṟa iweisanje.

⁸ Wawewode owoko lo mndu wanda ya orio ikungo njora tsose tsina. Na wose waana wawewode shamu na makungo hawo kudi;

⁹ Makungo hawo hawelunganyi. Wakakunda ihenda ora lose, wakawehenda kusonguo walawode wahalutsa mbihu yawo.

¹⁰ Orio umu owo kyamu kyake kiwefananyi na kyamu kya mndu ipfo oshangunyi na ora lo kulyo kiwefananyi na kya mwiso, na ora lo kumoso kiwefananyi na kya mbe, na ora lo nduma kiwefananyi na kya mbeṟo.

¹¹ Makungo hawi ha orio kiwumbe ki hawekualie huye hakakoyana, kyaindi halya hawi ha orio kiwumbe hakashikia mbihu yawo.

¹² Orio kiwumbe ki kilekuhendia handu hose chando mumuyo alemloṟa. Wakawekuhendia kusonguo kulawode ihalutsa mbihu yawo.

¹³ Kiidi kya shiwumbe shilya kuweipfo kindo kifananyi na makaa ha modo haiaka. Kukawukapfo na shimunyi sheaka sha modo shiwelimikalimika kiidi kya shiwumbe shilya. Modo fulya fulekenga mnu fukawewuka njowaṟuko.

¹⁴ Shiumbe shilya shikakuidia ipfo na ipfo cha owaṟuko.

¹⁵ Kiheri njiwekeri iambuya shiwumbe shilya, ngakoya orio kimu kiwewode idenga limu o wanda yakyo.

¹⁶ Madenga halya nyi hawefananyi, naho hawekeriaka aka cha iho lya wuhuru wung'anyi. Msungusie fo madenga ha fukawa cha idenga limu kiidi kya idenga lingi.

¹⁷ Kipfa kya ikyo madenga ha nyi haleidima ikuhendia njora tsose kulawode ihaluka.

¹⁸ Mtengeto iya ya madenga halya iwenjitengetie na taa sa tsifoi.

¹⁹ Kiheri kyose shiwumbe shi shilehenda na madenga ha hakawehenda nasho o mbai yasho, na kiheri shiwumbeshi shado huye na madenga ha hakawedo hamu nasho.

²⁰ Handu hose shiwumbe shi shii na moo shilekunda ihenda na madenga halya haleweshiosha kyamba mumuyo fo mandoha hai na moo fuwekeri ipfo kiidi kya madenga ha.

²¹ Ko ikyo handu hose shindo shi shii na moo shilehenda, koya nyi kusonguo, ang'u numa ang'u idosio huye na madenga ho halehenda kimu na sho.

²² Huye ya mdo ya shiwumbe shilya kuweipfo kindo kii cha maloalo kiwekeriiaka aka cha kilola alya huye yawo.

²³ Shindo shilya shii na moo shikakaa kiidi kya kindo kilya kiwei cha maloalo. Orio kiwumbe kikatambaṟuo makungo hakyo hawi hakakoyana na odoye, na halya hawi orio kiwumbe kikakushikia naho.

²⁴ Ili mandi shiwehenda, ngaicho ṟu lya makungo hasho, ṟu lyo likawa cha ṟu lya mṟinga fufoi likawefanana na ikuṟuṟuma lya Mndumii aitoṟie shose, ṟu saling'anyi lioweshie cha lya mbahanyi; ili mandi wahoṟoka, wakalema makungo hawo.

²⁵ Ngaweicho ṟu liwuka kulya mwalonyi fuwei huye ya mdo yawo.

²⁶ Huye ya mwalonyi fulya huye ya mdo yawo kuwekeriho loṟika lulusungusie ko fana ncha. Huye ya loṟika lulya kuwedamieho umu awefananyi na mndu o wandu.

²⁷ Huye ya mndu chu nawemtengetie nyi modo fuweaka aka cha aṟeṟa na wanda yake kaweṟingichio nyi modo fuwei aka aka

²⁸ cha mkoṟi kiheri kya mvuo. Na wudo njilewona ofano lo kiṟumi na wuitoṟi wo Mndumii-Ruwa odu. Ngammbona njido ngakuhutsa wanda na kyamu kyako, ngaweicho ṟu lya mndu umu aweideda.