ESTA 9 - Bibilia Kui Mdedie fo Kimochi

Wayuda warumatsa wakituwa wawo

¹ Kiheri kuleshika meri fo ikumi na kawi meri fo Adari fo mkonu fo ikumi na kaṟaṟu iwawaso lya mangi na ole loke luteṟie iinutsio, fuwei nyi mkonu fo wakituwa wa Wayuda wawekusirie iwaitoṟia, kyaindi kikailachika, Wayuda wakaitoṟia walya wawewasuo.

² Mfiri naafo Wayuda wakasanzia mṟinyi yawo kiidi kya isanga lyose lya mangi Ahasuero kundu wahoṟuo wandu walya wawekundi iwaendie mawicho, kulakae pfo ma umu aleidima iwaima, kipfa wandu wose walehoyo nyi wuowu.

³ Wachili wa isanga na wasongoru na wanene wa wandu na walya wawekeṟunda ko mangi; waletarama Wayuda; kipfa keowuo Mordekai.

⁴ Kipfa Mordekai nalewa ang'anyi kanyi ko mangi, kiṟumi kyake kikaichio isanganyi kose, kipfa Mordekai cho kaengeṟa ing'anyisho.

⁵ Kyasia Wayuda wakakapa wakituwa wawo kui ngapo tsa njoshu, na iwoho, na marumatso, wakawawutia chandu walekunda iwutia wakituwa wawo.

⁶ Ipfo Susa otiṟiwenyi Wayuda wakawaha wandu mahana hatanu (500).

⁷ Wakawaha Parshandata, na Dalfoni, na Aspata,

⁸ na Porata, na Adalia, na Aridata,

⁹ na Parmashta, na Arisai, na Aridai na Wazata,

¹⁰ na iwa nyi wana ikumi wa Hamani mana o Hamedata mkituwa o Wayuda; kyaindi waleduo masaa ha wandu cha shiwade shidenyi-pfo.

¹¹ Mfiri fulya mangi kaendio itala lya iwo walewohio ipfo Susa otiṟiwenyi.

¹² Mangi kawia Esta mkamangi, “Wayuda wawaha wandu mahana hatanu (500) iya Susa mṟi fung'anyi na iwarumatsa hamu na wana wa Hamani ikumi, ngesa isanga lyingi lya mangi lyitsuhee wawutie wada? Ngesa nkiki ukundi wulalu nocheinengo, kuhambie nakyo kechiwa.”

¹³ Esta kahamba, “Mangi kokoya kekuchihia inenga Wayuda wai Susa momu wawute chandu wawuta inu kihianyi na wanawo ikumi wa Hamani wamaso ikidihu lyewahia.”

¹⁴ Mangi kahamba ke isho shose shiinutsio, na mbonyi ikahambo ipfo mṟinyi fo Susa, ombe lukakapo wana walya ikumi wa Hamani wakamaso.

¹⁵ Kyasia Wayuda wakasanzase mkonu fo ikumi na kana fo meri fo Adari, wakawaha wandu mahana haṟaṟu (300) ipfo Susa; indi waleduo shindo shiwade sha shidapfo.

¹⁶ Wayuda wawei kiidi kya isanga lyi wakaringa moo yawo. Wakakiṟo kiidi kya mawoko ha wakituwa wawo, walewaha wandu washikie shiku makumi mfungade na watanu (75,000) indi waleduo kilya kiwade shidenyi-pfo.

¹⁷ Ifo nyi mbe mkonu fo kaṟaṟu merifo Adari. Mkonu fuleituma fo ikumi na kana walesia moo. Wakafutana mkonu mnene fo mfuho.

¹⁸ Kyaindi Wayuda wengi wa mṟi fung'anyi fo Susa walewekusanza mfiri fo ikumi na kana kyaindi walesia moo-pfo. Wo nyi walesia moo mfiri fo ikumi na katanu ko sia na mfuho fung'anyi.

¹⁹ Ko kipfa kya ikyo Wayuda wekekaa shimṟinyi shilai kiidi kya mfiṟiha, wo wekeindia mfiri fo ikumi na kana na idikiana shindo sha nga na nyi mkonu fo meri fo Adari.

Mkonu mnene fo Purimu

²⁰ Mordekai kaṟehia ngata tsi tsose. Kiidima kaṟehia paruo Wayuda wose wawei wuchilinyi wo mangi Ahasuero.

²¹ Wawike mkonu mnene, mkonu fo ikumi na kana na mkonu fo ikumi na katanu fo meri fo Adari.

²² Nyilyo Wayuda walewinza wakituwa wawo kiidi kya mkonu yo, na kiidi kya meri fo fowa yawo ikahaluka ikawa ya sia, na ipfiio lyawo lyikawa mfiri fo seka na sia. Wakawawaso wakumbuo mkonu fo wechisungusia mfuho na idikiana shindo sha nga, na wakiwa wadikio shelya na shindo shingi.

²³ Kyasia Wayuda waleidikiana chandu walewoka na chandu Mordekai aleṟehia.

²⁴ Hamani mana o Hemedata, Mwagagi na mkituwa o Wayuda nalewika mtambo fo rumatsa Wayuda.

²⁵ Kyaindi Esta kiheri alehendia Mangi, nao mangi kawuta iwawaso kui mṟeho ke mtambo fulya Hamani awewode fowaha Wayuda fumkoye o amonyi, na ke o na wana wake wawoho wechimaso ikidihu lyewahia.

²⁶ Ko ikyo walelaha mkonu fo Purimu, iwuka idedo Puri lii kuṟukuhya. Kipfa kya paruo ya Mordekai na mbonyi tsilya waletsiwona wawenyi na shilya shilewatowokia,

²⁷ Wayuda walehaluo nyi iwawaso ko kishari kyawo kose na ko orio ulya awekulunga nawo. Ke, kiheri kilyiwe kya mdawao orio maka, kulawode deko, mkonu yo iwi ing'anyisho kihendesanyi na wuwawaso wo Mordekai.

²⁸ Waleweidikiana ke orio kishari kya Wayuda, marika na marika, kiidi kya orio isanga na mṟi mkonu ya Purimu yechikumbuyo na ing'anyisho kui sia mlungana.

²⁹ Nalyo mkamangi Esta mana o Abihaili kaṟehia paruo ko pfinya tsake tsose hamu na Mordekai Myuda iṟingishia shilya Mordekai aleṟehia ipfo mawookionyi kya Purimu.

³⁰ Baruo yo Wayuda waleṟehio wose na tsingi tsikadao masanganyi hose ihana limu na makumi hawi na mfungade (127) ha wuitoṟi wo Ahasuero. Baruo yo ilelangia Wayuda ofoṟo na wuhooya,

³¹ na iwaitika wo na shishari shawo iindia mfiri iya ya Purimu kui kiheri kyawo, chandu wo wekekumbuo mfiri iya yekuotoya kiheri kya wukiwa. Wuwawaso wu wulewuto nyi Mordekai Myuda, hamu na mkamangi Esta.

³² Iwawaso lya Esta likawanza mbonyi tsose tsa Purimu, ikaṟehiyo kitapunyi.