ESTA 8 - Bibilia Kui Mdedie fo Kimochi

Wayuda wainengo momu fokuringa

¹ Mkonu fulya mangi Ahasuero kadambikia mkamangi Esta mba yose ya Hamani na masaa hayo ko ulya awei mkituwa o Wayuda. Esta kawia mangi ke Mordekai nao nyi o oshari. Wokia mandi ho Mordekai kainengo momu fowona mangi.

² Mangi kawuta rachi yake ya ofano, iya awesokie Hamani kainengia Mordekai. Esta kainenga Mordekai naitoṟie masaa hose ha Hamani.

³ Esta kadeda se na mangi, kakukumba wanda madendenyi ha mangi, kechifuha, katerewa mangi nakange makusaṟo halya mawicho ha Hamani Mwagagi aweṟeheṟie kya Wayuda.

⁴ Mangi kaleshia Esta ndichi yake ya sahabu, na Esta kahoṟoka kahamba,

⁵ “Kokunda, iyo mangi, na kokoya nokusaṟa kicha kyako, na kokoya kechikuchihiṟa, ngakuterewa hoi, kewuta idedo lyapfo lyefurunja kyama kilya Hamani awewiie wandu ke kiinutsio. Idedo lyawo liwe liliṟehie chandu nao aleṟehia Hamani mana o Hamedata Mwagagi tserumatsa Wayuda kiidi kya masanga hose.

⁶ Nyi wuda njechikarishia iwona wandu wako wechirumatso na wandu wako wechiwoho?”

⁷ Mangi Ahasuero kawia mkamangi Esta na Mordekai Myuda, “Ambuyenyi! Ngainenga Esta masaa hose ha Hamani nao ameotsuyo kipfa kya kyama kyake kihadi na Wayuda.

⁸ Wulalu mochiidima iṟehia Wayuda kyose mukundi. Kake, mochiidima iṟehia na kui rina lyako na ikapa ofano lo mangi kipfa kulawode mndu moilacha mṟeho fui kui rina lya mangi na ofano loke.”

⁹ Kyasia waṟehi wa mangi wakalaho mkonu fo makumi hawi na kaṟaṟu (23) meri fo kaṟaṟu folaho nyi Siwani, na chandu Mordekai alewawasa, Wayuda wakaṟehio hamu na wachili, na wanene wa masanga, na wanene wa mkambo wokia Uhindi itane Ethiopia, isanga ihana na makumi hawi na mfungade (127), orio isanga kui mṟeho fowo na orio isanga na kishomo kyawo, na Wayuda, kui mṟeho fowo na kishomo kyawo.

¹⁰ Kaṟehia kui rina lya mangi Ahasuero, na itsikapa ofano kui rachi ya mangi. Walya waletsiduo nyi waringi, waledoya frasi tsiwode pfinya na njiangu iwikia mteeṟa.

¹¹ Kwi parua tsi mangi kainenga Wayuda momu fokoyana kiidi kya mṟi iringa moo yawo. Wakainengo momu fo nyamaṟa, iwaha, kulawode sonu na irumatsa orio ichekeṟo lya wandu ang'u isanga, lechiwachea na shisha kimu na waka wa wana wawo, na iwada masaa hawo.

¹² Kindo ki kiwechiwutika masanganyi hose ha mangi Ahasuero, mkonu fo ikumi na kaṟaṟu meri fo ikumi na kawi nyifo Adari.

¹³ Kiṟeho ki kilewuto cha iwawaso ko orio isanga na ko orio mndu kundu Wayuda watae kiṟache ili mkonu fochishika.

¹⁴ Kwi iwawaso lya mangi, waringi wedo frasi tsiwode pfinya na njiangu iwikia mteeṟa tsechidicha mnu wakaduo ndumi itane washika otiṟiwenyi lo Susa.

¹⁵ Mordekai kekiwuka mbenyi ya mangi naweṟee maṟao ha ki wumangi ha fana ya opuko na njiili, naweṟee oṟo ing'anyi ya sahapu, na ikonya lya kitanyi njicha ya fana ya sambarao. Mṟi fose fo Susa wakairia maṟu hawo wechichihiyo wakakapa mṟoṟo ya sia.

¹⁶ Wayuda wakaichuo sia, na sa ikakya kowo wakakuicho kiṟumi na ifuda na wuwinzi.

¹⁷ Kiidi kya orio isanga lyose leshikio iwawaso lya mangi na paruo ii, Wayuda wakachihiyo mnu wakawada mfiri mnene fuichuo mfuho. Wandu wengi walawei Wayuda, wakakuhaluo Wayuda kipfa kya wuowu woowuo Wayuda.