ESTA 6 - Bibilia Kui Mdedie fo Kimochi

Mordekai adambikio kiṟumi nyi mangi

¹ Kio kilya mangi aleidima ilaa madopfo, kawawasa naendio kitapu kya mbonyi tsiwenjiṟehie tsa ngumbuo, nakyo kikasomo oshangunyi lo mangi.

² Kukakoyo ho mbonyi tsa Mordekai chandu alemanya mbonyi tsa Bigtana na Tereshi wawekundi iwutia mangi kindo kiwicho nawo wawei weringa kichumi kya mba ya mangi Ahasuero, wawekundi imbaha.

³ Mangi kawesa, “Nyi kiṟumi kida ang'u mwano fuki Mordekai aleinengo kipfa kya mbonyi i.” Waṟundi wa mangi walya wemhidia wakahamba, “Kuwode kindo alemewutio kyose pfo.”

⁴ Mangi kawesa, “Nyiu ai osehu?” Hamani kakoyo osehu lo nja ya mba ya mangi, nacha kundu nadede na mangi kundu Mordekai namaso ikidihu lilya aweteseheṟie.”

⁵ Kyasia waṟundi wa mangi wakambia, “Hamani aichu ai oo nja.” Mangi kahamba, “Mlahenyi nache na mba.”

⁶ Kyasia Hamani kaida na mba. Mangi kambesa, “Nyi wuda mangi echiwutia mndu akunda imng'anyisha na imṟumisha?” Hamani kadeda amonyi mrimenyi, “Nyiu ichu mangi akundi imng'anyisha na imnenga kiṟumi sile na inyi tupu.”

⁷ Kyasia Hamani kawia mangi, “Ulya mangi akunda imnenga kiṟumi na imng'anyisha.

⁸ Naendio maṟao ha wumangi halya mangi ahaṟaa, na frasi iya yeduo mangi na iṟiko kofia ya wumangi.

⁹ Maṟao halya na frasi iya nadambikio umu esambuṟo nyi mangi kundu naṟike ulya mangi akunda imṟumisha na imng'anyisha, namdosie huya frasi namtengetse mṟinyi kuwode njia njilandaṟe na ikapa ombe kechihamba, ‘Nyi wudi echiwutio mndu ulya mangi akundi imṟumisha.’”

¹⁰ Nahong'u mangi kawia adi Hamani, “Owinyi faṟa ira maṟao na frasi chandu ohamba uhende iwutia kudi Mordekai, Myuda, ekedamia mongonyi ko mangi, kulade ma idedo limu kiidi kya iho ohamba.”

¹¹ Nalyo Hamani kaira maṟao halya na frasi kaṟika Mordekai maṟao halya kamdosia huya frasi kamtengetsa mṟinyi na njia njinene kakapa ombe oshangunyi loke, “Nyi wudi echiwutio mndu ulya mangi akunda imṟumisha.”

¹² Kyasia Mordekai kawuya na alya kichuminyi kya mba ya mangi. Indi Hamani kadicha na kanyi koke amsokie nyi fowa, kaweshikia na mdo foke.

¹³ Kyasia Hamani kaongoya Zereshi mka oke na mbuya tsake tsose orio idedo lilemhoya. Zereshi na mbuya tsake wakambia, “Kokoya Mordekai chu omewoka idetsa kiṟumi kyapfo koke na nyi Myuda iyo ochimiidima pfo na umuindie na ioloka wanda oshangunyi loke.”

Hamani awoho

¹⁴ Wechideda wadi nao, wanzenge na mangi wakacha wakaitika Hamani nahende kulya ko Esta choongenyi iya aweiṟeheṟie.