ESTA 5 - Bibilia Kui Mdedie fo Kimochi

Esta alaha Mangi na Hamani ilya choonga

¹ Kyasia mkonu, fo kaṟaṟu fo kuotoya, Esta kaṟaa nguwo tsake tsa mkamangi kahenda kahoṟoka kiidi kya osa lo kyamba lo mba ya mangi luambuyanyi na handu hekumbuhana. Mangi nawei mba loṟikehu loke lo wuitoṟi kaambuya kya mongo fo mba ya mangi.

² Kiheri mangi alewona Esta ahoṟoki osehu kachihiṟo nyio, kamleshia ndichi iya ya sahabu iwei kuwokonyi koke, Esta kasembelia kapaya mdo fo ndichi iya.

³ Kudi mangi kawesa, “Esta nyi kiki ukundi? Njiwia kindo ukundi nochiwona kokoya nyi kyenga kya wumangi woko nochiinengo.”

⁴ Esta kahaluo, “Kokunda le mangi, uche inu na Hamani, njisungusie choonga kipfa kyapfo mangi.”

⁵ Mangi kawawasa Hamani nache owinyi faṟa chandu Esta aterewa. Kyasia mangi na Hamani wakahenda choongenyi injiṟeheṟe nyi Esta.

⁶ Wakeri kiidi kya choonga na inyo mvinyo, mangi kawesa se Esta, “Esta, nyi kiki ukundi? Njiwia na iyo nochiinengo. Kiterewo kyapfo nyi kiki? Ma kokoya nyi keenga kya wumangi woko nochiinengo.”

⁷ Esta kahaluo, “Kiterewo kyako nyi iki.

⁸ Kokoya ngawona osaṟio kopfo iyo mangi, koidikia kiterewo kyako, kyasia ngaterewa iyo na Hamani mche ngama kiidi kya choonga ingi njechiiṟeheṟa. Mandi ho njechihamba kiterewo kyako.”

Hamani akuṟeheṟa iwaha Mordekai

⁹ Hamani kawuka choongenyi aichuo sia na msiha na mrima foke fukafuda. Kyaindi kekiwona Mordekai alya kichuminyi kya mba ya mangi alahoṟoka ma imuindia amuiindiapfo Hamani kaaka nyashi.

¹⁰ Manya kudo katirisia, kakuhendia kanyi koke. Kiidima kalaha mbuya tsake katerewa mka oke elaho nyi Zereshi, nakusanze nawo.

¹¹ Nalyo kawoka iwaongoya mbonyi tsa wusuṟi woke awewode, na chando mangi alemdosa kambika huye na chando aleengeṟio iṟunda icha ling'anyi kota wachili wengi wose wa mangi.

¹² Hamani kaengeṟa ikushela, “Chi isho tupupfo mkamangi Esta alaha mndu ungi ose hamu na mangi shile nyi inyi tupupfo. Na ngama da! Nalulaha na mangi.

¹³ Kyaindi ishi shose shinjiinenga msiha pfo kokoya njechiwona Myuda ulya Mordekai alya kichuminyi kya mba ya mangi.”

¹⁴ Kyasia Zereshi, mka oke, na mbuya tsake wakamnenga oloho lu. “Kitewe kulatsano ikidi lyewahia wandu lishikie mawoko makumi hatanu? Ngama ngamenyi udede na mangi kundu, Mordekai nawohioho, nduma nohende ilya choonga na mangi umchihie.” Oloho lu lukachihiṟa mnu Hamani, nao kasungusia ikidi lyewahia.