ESTA 4 - Bibilia Kui Mdedie fo Kimochi

Mordekai aterewa ngaya ko Esta

¹ Mordekai kekimanya shose shiwutikie, karanduo maṟao hake, kaṟaa ikunyia kakushia ifu. Kiidima kaida makidi hawi ha mṟi kechikapa kilio ko pfinya na fowa.

² Kahenda mṟasa kichuminyi kya mba ya mangi, kyaindi aleidima iida napfopfo nyi kipfa kilasumhanyi mndu iida na mba ya mangi aṟee ikunyia.

³ Kiidima ko orio isanga iwawaso lya mangi lyamewuto, Wayuda wose wawei cha wandu wawapfiie. Walekuotoya, wakafihiṟa na ikuinadia, wafoi wakalaa ifunyi waṟee makunyia.

⁴ Mkamangi Esta kekiwio mbonyi tsi na wanzenge na shisinga shake kya Mordekai katsileha pichu.

⁵ Naaho kalaha Hataki, umu o wanzenge wa mangi alesambuṟo nahidie Esta, kamduma ko Mordekai nammbese kikeri kida na kitewe nawute ado nki?

⁶ Hataki kahendia Mordekai patehu, osehu lo kichumi kya mba ya mangi.

⁷ Mordekai kaongoya Hataki shose shiwemkoye na kiheo kya fesa yose Hamani awewikie kyasa ketaa kiidi kya kisa kya mangi kokoya Wayuda wose werumatso.

⁸ Kawemnenga na ohawi lo paruo ya mbonyi yo iwei injiwute mṟinyi fo Susa yehamba kya orumatso lo Wayuda, kamterewa nadaye Esta nambie chandu mbonyi tsi na imbia nahende iterewa mangi namterewe nasaṟie Wayuda, wandu wa Esta.

⁹ Hataki kahenda kawia Esta shose Mordekai amwongoya.

¹⁰ Esta kawia Hataki nawuye nawie Mordekai.

¹¹ “Waṟundi wose wa mangi na wandu wake wa orio isanga waichi ke kuwode momu fohenda ko mangi shile akulahapfo, na mndu kahenda alalaho ipfo nyi echipfa. Msa echikia nyi ulya mangi echimhoṟoya ndichi yake ya sahabu kundu nakie. Ate inyi njimlahepfo na wulalu nyi meri fumu tapa foida!”

¹² Mordekai kechiicho ndumi ya Esta,

¹³ Adi faṟa kamtukia kechimbia “Ulakusaṟe ke kyapfo ikaa mbenyi ya mangi nyi ui mcha wyoo kota Wayuda wengi wose.

¹⁴ Kotsia sau kiheri cha iki, ndarama yechichea Wayuda ko njia ingi, nawo wechikiṟo, kyaindi iyo nochipfa na mba ya ndeo yechiarisika. Nyiu aichi ke nolewa mkamangi kya kiheri cha iki!”

¹⁵ Esta kadikia Mordekai kechihaluo kudi,

¹⁶ “Henda usanyie Wayuda wose wai kunu mṟinyi fo Susa handu hamu. Kuotoenyi, mulalye ma inyo komfiri iṟaṟu, kio na mfiri, kipfa kyako. Inyi na shisinga shako nlochiwuta cha nyo. Kiidima njihende ko mangi ma chandu kulawode momu, kokoya nyi iwoho njiwoho.”

¹⁷ Kyasia Mordekai kahenda kawuta chandu Esta alembia.