ESTA 3 - Bibilia Kui Mdedie fo Kimochi

Hamani awada kyama kyerumatsa Wayuda

¹ Kyasia numa ya mbonyi tso mangi Ahasuero kadosa Hamani mana o Hamedata, Mwagagi kambika huye ya wachili wose wawei nao.

² Na waṟundi wose wa mangi wawekelya mongonyi ko mangi wakahongoma na iindia Hamani, kipfa nyi wudo mangi awewawasie ko mbonyi tsake. Indi Mordekai alehongoma ma iindiapfo.

³ Waṟundi wa mangi wawedamie mongonyi ko mangi wakawesa Mordekai, “Nki ilyi iyo uifunja wuwawaso wo mangi?”

⁴ Wakawa mombesa orio mkonu, nalawaadanyie, wakawia Hamani, kundu wawone mbonyi tsa Mordekai tsechiwa tsida, kipfa nalewawia ke o nyi Myuda.

⁵ Hamani kekiwona ke Mordekai ahongoma ma imuindiapfo kanyashiko mnu na kamu.

⁶ Kawona kishikie iwaha Mordekai amonyi pfo kipfa walembia ke o nyi oku na oshari loke ko ikyo Hamani nawekundi irumatsa Wayuda wose wawekekaa kiidi kya Wumangi wo Ahasuero, kii nyi wandu wose wa Mordekai.

⁷ Nahong'u koikishika meri fo kuwoka, nyifo fo Nisani, maka fo ikumi na kawi fo wumangi wo Ahasuero wakawika Puri, nyi kuṟu kuhya kundu kumanyike mkonu na meri fo Hamani iinutsia kilya akuṟeheṟie ikiwuta mṟasa meri fo ikumi na kawi nyi fo meri fo Adari.

⁸ Hamani kawia mangi Ahasuero, “Kuwode wandu wa Isanga liliwe warahanyikie nawo wai kiidi kya wuchili wopfo na isanga shose sha mangi. Wawode chile tsilafananyi na chile tsa wandu wengi, waminyie na wuwawaso wo mangi, ko ikyo kiwaṟi mangi naduane nawopfo.

⁹ Iyo mangi kokunda wuta iwawaso wandu wa wawoho na nyi ngawika kyasa ke kowuta kudo, njechitaa fesa talanta shiku ikumi shiwiko kisenyi kya mangi.”

¹⁰ Mangi kawuta rachi iwekekapo handu cha mhuri kainengia Hamani mana o Hamedata, Mwagagi, mkituwa o Wayuda.

¹¹ Kiidima kawia Hamani, “Numwinenge wandu wose na fesa yo ṟunda nayo chandu ukundi.”

¹² Kyasia, mkonu fo ikumi na kaṟaṟu fo meri fo kuwoka Hamani kalaha waṟehi wose wa mangi, kawainenga mbonyi iwaṟi isungusio kui mdedie fo orio umu na kui mṟeho kiidi kya wumangi wo nduma kudiko ndumi tso tsiṟehie kose ko wachili wa isanga na isanga shose, na ko wanene wa shishari shose, tsiwode shishomo shose shekededo. Mbonyi tsi tsinjiwute kui rina lya Mangi Ahasuero na ikapo ofano loke lui nyi rachi yake.

¹³ Weduo mbonyi wakaduo paruo tso ko orio isanga kya wumangi wo. Mbonyi yo ihambie ke mfiri fumu tupu, mkonu fo ikumi na kaṟaṟu fo meri fo ikumi na kawi folaho nyi Adari, Wayuda wose, wanake ko waku, waka na wana wose wawaṟi iwoho, warumatso na iarisika piu na masaa hawo hadao.

¹⁴ Mbonyi yo iwewaṟi iwiko handu ha pata kiidi kya orio isanga, kundu orio mndu nakuṟeheṟe kya mkonu fo.

¹⁵ Iwawaso lyi lya mangi likawuto kiidi kya mṟi fung'anyi fo Susa, na walya weduo mbonyi wakaonguo kiidi kya isanga shose. Mangi na Hamani wakadamia wanda wanyo mvinyo, kyaindi wandu wa Susa waiṟewe.