ESTA 2 - Bibilia Kui Mdedie fo Kimochi

Esta asambuṟo nawe Mkamangi

¹ Kikashika nyashi ya mangi Ahasuero yekihuo kakumbuo Vashti, kakusaṟa kya orikiki na wutimbiṟi woke na chandu mbonyi tsilehenda kipfa kyake.

² Kyasia waṟundi walya wawemṟundia o amonyi wakadeda nao wechihamba, “Nyi kuwode wana wa waka wafoi wecha, kitewe nalasambuṟo ho umu nki?

³ Nochiidima iwia wachili wose wa orio isanga kiidi kya wumangi wopfo uwawie waende wana wa waka wache wose waendo na mbenyi ya waka iya Susa mṟi mnene. Numa wawiko mawokonyi ha Hegai, mnzenge moambuya waka wapfo, wainengo mafuda na shihia shekusungusia kundu wachie ngoseṟa.

⁴ Ulya echikuchihia ngoseṟa nawe nyi mkamangi handu ha Vashti.” Mangi kawona oloho nyi salucha, kawuta ado.

⁵ Kiidi kya mṟi fo Susa kuwewode mndu umu o Kiyuda, rina lyake nyi Mordekai, mana o Yairo mana o Shimei o kishari kya Benyamini.

⁶ Mordekai nawei umu o wandu waledao wupfungo kiheri kya mangi Yekonia o Yuda alewado nyi mangi Nebkadneza o Babeli.

⁷ Mordekai nawewode mana o washidie alemtoṟisha wafee wake wamepfa kamduo cha mana oke, rina lyake nyi Esta kyaindi rina lyake Kiebrania liwei Hadasa.

⁸ Esta na wana wa waka wafoi wakadao Susa mṟi fung'anyi wakaringo nyi Hegai: Esta kadao mbenyi ko mangi Hegai kamwambia ichu awei mringi o waka.

⁹ Hegai kachihiṟo nyi Esta mṟasa kamkundia kundia kainenga Esta mafuda na kelya kya kyaanya. Kamiira alya awekekaa, kamduo handu hecha ngoseṟa kiidi kya mba ya waka, kamsambuṟia shisinga mfungade wawuka mbenyi ko mangi wampfuṟukanyie.

¹⁰ Esta awememanyishe kishari kyake ma mbaṟi yake pfo, kipfa Mordekai nawemiimie nalawone kekumanyisha.

¹¹ Mordekai kawa moidaida ipfo osehu lo mba ya waka kundu nawone kilya kechihoya Esta na imanya mbonyi tsake.

¹² Kekishikia kiheri kyake keida na mba ya mangi Ahasuero chando kiwei kiteṟie nao nawemteseheṟe kui iwawaso ke mndu mka nalelo meri ikumi na iwi, nalawade kindo kya ngafu naheṟemke, meri iṟandaṟu nashio mafuda ha manemane, na meri iṟandaṟu ko mafuda hepfaama necha hamu na shihia sheheṟemtsa waka.

¹³ Mana mkeha kaida na mbenyi ya mangi, kakunda kindo kyose kiwukie mbenyi ya waka nahende nakyo ko mangi na nainengo.

¹⁴ Nekehendapfo kiukanyi na ngamenyi kawuya na mbenyi ya kawi ya waka kaambio nyi Shaashgazi, mṟundi o mangi, na mringi o waka wa mangi. Ke echihenda se ko mangipfo na kokoya achihiṟa mangi na mangi kamlaha kui rina.

¹⁵ Nahong'u kekishika kamba lya Esta mana o Abihaili ichu aledao nyi Mordekai washidie kamhaluo mana oke, kundu naide na mba ko mangi alekunda kindopfo, shile na shilya shiweishiteṟie nyi Hegai, mokalia mangi, na iringa waka. Esta kakundika oshangunyi lo wose walemmbona.

¹⁶ Kyasia Esta kadao ko Mangi Ahasuero, mbenyi ya wumangi, meri fo ikumi nyi fo meri fo Tebeti, maka fo mfungade fo wumangi woke.

¹⁷ Mangi kakunda Esta kota waka wose, nao kawona osaṟio na ikundika kota waka wose, kamṟika oṟo ya wumangi mdohu koke kamhaluo mkamangi handu ha Vashti.

¹⁸ Mangi kasungusia mfuho fung'anyi kalaha wachili wake wose na waṟundi wake, nyi mfuho fo Esta, kawuta shindo sha nnga shifoi na ihoṟia wandu (chandu kiwei mbuka kiheri kya mkonu mnene), kiidi kya isanga shose.

Mordekai akiṟa Mangi moo

¹⁹ Kyasia kiheri wakeha walekusanza lya kawi, Mordekai nawedamie mongonyi fo mangi.

²⁰ Esta awememanyishe oshari loke ma wandu wakepfo, chandu Mordekai awembawasie, kipfa Esta nawekewada madedo na mapfundo ha Mordekai chandu awei nao kiheri kilya awemtoṟisha.

²¹ Kikashika kiheri Mordekai awekedamia mongonyi fo mangi, wandu wawi kiidi kya matsenge nyi Bigtana na Tereshi wawei weringa mongo wakapfuluko mnu wakakunda iwaha mangi.

²² Mordekai kamanya mbonyi i njiwicho, kaongoya Esta, mkamangi, na Esta kawia mangi mbonyi kui rina lya Mordekai.

²³ Kiheri walesoṟa mbonyi i na iwada wulohi woyo, iwa wawi wakamaso ikidihu. Isho da shikaṟehio kiidi kya kitapu kya mbonyi oshangunyi lo Mangi.