ESTA 1 - Bibilia Kui Mdedie fo Kimochi

Esta awa mkamangi Vashti atehia iwawaso lya mangi Ahaseuro

¹ Mangi Ahasuero nalewada wumangi, wumangi wu wuwewode masanga ihana limu makumi hawi na mfungade (127), wokia India mṟasa Ethiopia.

² Loṟika loke lo wumangi luwei kiidi kya mṟi fung'anyi folaho nyi Susa otiṟiwenyi.

³ Maka fo kaṟaṟu fo wumangi woke, mangi Ahasuero kasungusia mfuho fung'anyi, kalaha wasongoru na waṟundi wa isanga lyake, wanene wa mamiingi fo Persia na Media, wandu wawode kiṟumi na wachili wa isanga.

⁴ Mangi kawaloṟa wusuṟi woke wo wuitoṟi handu ha meri iṟandaṟu.

⁵ Kiheri kyo kyamesia kasungusia mfuho fungi fo wandu wose, wawei ipfo Susa, otiṟiwenyi watutu na wang'anyi mfiri mfungade, wawei ichangalenyi mbelya mba ya mangi.

⁶ Handu ho kuwekusungusie na ishelo kui nguwo njiili tsa bafta na tsingi tsa fana ya bluu, tsiwei tsipfume nyi ndusu tsa fana ya sambarao na ndusu tso tsikapfungio rachi tsa fesa tsikamaso ngohu tsa maṟumaṟu na wudo na shitima shedamia shifananyi na shitaṟa shelaho nyi makochi shiwei sha sahabu na fesa shiwei shiwike oo wanda iwei njiale maho ha fana, maṟumaṟu, kimande, na maili, manjano, na maiwu, maho ha wahuru.

⁷ Wandu wakanyooya kiidi kya shirahu sha mbaṟimbaṟi sha sahabu, wakanyo mvinyo kipfa fuweipfo fo mbaṟi ya wumangi.

⁸ Orio mndu nalenyo kaihuda, kipfa mangi nawewawasie waṟundi wake wa mba ya mangi orio mndu napfuṟukanyio chandu akundi.

⁹ Kiheri nakyo, mkamangi Vashti kawesungusia mfuho kipfa kya waka mbenyi ya mangi Ahasuero.

¹⁰ Mkonu fo mfungade fo mfuho fo, mangi Ahasuero aichuo msiha na sia kipfa kya mvinyo fulya awenyooye, kalaha wanzenge mfungade wawekempfuṟukanyia o amonyi, Mehumani, Bizta, Harbona, Bigta, Abagtha, Zethari na Karkasi.

¹¹ Kawaduma wahende iende mkamangi Vashti nache aṟee oṟo yake ya mkamangi. Mkamangi cho nawewode kyamu kicha mnu, mangi nawekundi iloṟa wahenu wake na wasongoru wengi wucha woke.

¹² Indi wanzenge wo wakawia Vashti iwawaso lya mangi, kamina nalakunde iindia. Kindo ki kikasuiṟa mangi mnu kaaka nyashi mrimenyi foke.

¹³ Kiwei kido kya mangi iambia oloho lo wandu walaanyi na wedumbuo mondu wandu wa menge wambie kindo kewuta.

¹⁴ Wandu wo nyi Karshena, Sheltari, Admata, Tarshishi, Maresi, Marsena na Memukani; wasongoru mfungade wa Persia na Media wawei wandu wa kiṟumi kya huye kya wumangi woke.

¹⁵ Kawawesa adi, “Ngesa Vashti nawutio kiki kirianyi na wuwawaso, kipfa ngaduma wanzenge wako koke kyaindi, nalaindie iwawaso lyako inyi mangi Ahasuero!”

¹⁶ Nalyo Memukani kawia mangi na wasongoru wake, “Da kya idekio mangi, mkamangi Vashti nadekio wasongoru wose na orio mndu kiidi kya wumangi na masanga ha mangi Ahasuero.

¹⁷ Kindoki kyawuto nyi mkamangi Vashti kechimanyika ko waka wose, nawo wechimina wamii wawo wechihamba. Mangi Ahasuero nalewawasa mkamangi Vashti nahende imsahia kaleha.

¹⁸ Inu tichi waka wa Persia na Media iwo waicho chando mkamangi Vashti awuta, wechiwia wasongoru wapfo kudo, ko ikyo wuminyi na isuana shechiichuo orio handu.

¹⁹ Ko ikyo iyo mangi kokunda - wawasa nakamu ke Vashti nalashike se oshangunyi lopfo. Iwawaso li liṟehiyo kiidi kya mawawaso ha Persia na Media, kundu lilailacho. Kiidima nasoko kidembo kya mkamangi, kiinengio mndumka ungi awaṟi kota.

²⁰ Iwawaso li likadungana kiidi kya wumangi wopfo orio mndu mka nechiindia mii oke nawe msuṟi ang'u mkiwa.”

²¹ Mangi na wasongoru wake wakachihiṟo mnu kya madedo ha, kaṟunda chandu Memukani aleonguo.

²² Nahong'u kaduma paruo ko orio isanga na isanga kui mdedie yawo na mṟeho imanyikie kowo; ke orio mndu msoṟo nawe mndumii o mba yake, na ionguo mbonyi kui kishomo kya wandu wake.