DANIELI 8 - Bibilia Kui Mdedie fo Kimochi

Ndodo huya machondi na mburu

¹ “Maka fo kaṟaṟu fo mangi Belshaza, mawonesio hakanjichea inyi Danieli, numa ya halya ha kuwoka.

² Inyi njilewona njidi, njiwekeri ipfo Shushanyi mfiṟihenyi kidembo kya Elamu; ngawona mawonesio njikeri hafui na meda Ulai.

³ Ngairia meso hako ngawona mbelya ya meda kuhoṟoki ho isuwa, liwode membe tsiwi; membe tso tsinjileshe, indi imu injileshe kota ingi, iya iwenjileshe ngoseṟa yo iledo ifurumia.

⁴ Ngawona isuwa lyo lyechitsindika ora lo kiukanyi na ora lo mtsudu, na ora lo nuka; na kuwode indo lii na moo lyekaria ihoṟoka sumuhana nalyo pfo ma kuwode indo lyekaria iiṟiwana nalyo ilisoka ma kindopfo, indi lilewuta chandu lilewona lyo lienyi tupu, likakuirinyisha mnu.

⁵ “Na inyi kiheri mbei ikusaṟa ambuya, kyoṟo kikacha ora lo kiukanyi keitola kikashika ruwehu kilashike wanda; na kyoṟo kyo kiwewode membe ntumhari makidi hawi ha meso hakyo.

⁶ Kikahendia isuwa lyo liwode membe tsiwi lilya ndeliwona lihoṟoki afui na meda, kikasembelia na nyashi ing'anyi.

⁷ Ngawona kechihenda na nyashi kikasahia isuwa lilya kikalikapa kikafunja membe tsilya tsa isuwa lilya, likalehela likahowanda, kyoṟo kilya kikalifunja funja na kikachuma chuma; kulawoneke mowuta isuwa lilya mawokonyi hakyo.

⁸ Kyoṟo kilya kikakuichika mnu, kiheri kilewada pfinya, ombe lulya lumu lukafunjika lulya luweng'anyi, oweṟe kitutu kukado membe tsingi njiapfinya tsiina kui njohawi tsiina tsa ruwehu.

⁹ “Kiidi kya membe tso kukadoho ombe lututu lukang'ana mnu, ora lo nuka, na ora lo kiukanyi, na ora lo oruka lucha.

¹⁰ Lukaang'ana handu loshikia matorito ha ruwehu, ikaolotsa wanda kyenga kyaho na kya nyenyeri lukatsichumachuma.

¹¹ Ikakuichika ikakunda ielewetsa menyi matorito, ikawewutaho shiano na shidaso shemaya modonyi na handu halya haele hakaolotso wanda.

¹² Mamiingi fo ruwehu fukadambiko mawokonyi hake hamu na shidaso shemaya modonyi orio mkonu ko njia ilawaṟi. Na wukilohi wukoolotso wanda. Ombe lo lukoilamia wuindi wo lohi. Kohuyo kiidi ko orio kindo ulekitana.

¹³ Ngaicho umu o waele echideda na mwele ungi kechimmbesa, “Mṟasa indi shindo shi shawono kunu mawonesionyi shechitsitsa? Mṟasa indi wunyamaṟi wung'anyi wochiwa shidaso? Mṟasa indi mbahanyi ya ruwehu na ihekalu shechichumochumo?

¹⁴ Nao kamhaluo, mṟasa shiheri sha kiukanyi na ngamenyi shiku shiwi na mahana haṟaṟu (2,300) nyilyo handu ha haele hechihaluyo haele.”

Msu Gabrieli atambahaluo ndodo

¹⁵ Kikashika o inyi Danieli, kiheri njilewona shiwonesio shi, njeshiha ishimanya, oweṟe ngawona msa ahoṟoki ofano lo mndu oshangunyi loko.

¹⁶ Ngaicho ṟu lya mndu kiidi kya meda Ulai; likalaha lyehamba, “Gabrieli, manyisha mnduchu mawonesio ha.”

¹⁷ Kyasia kasembelia alyando mbehoṟoki; na inyi ngaowuo lilya alecha na afui ngaho wanda na kyamu, kyaindi o kanjiwia, “Manya iyo mndu o wandu mawonesio ha nyi ha kiheri kya ifurumia.”

¹⁸ Kiheri kilya awededa na inyi ngawado mado malemeri na kyamu kyako kikaambuya wanda, kyaindi kanjipaaya kanjihoṟotsa chimu.

¹⁹ Kanjiwia, “Ambuya, njikumanyishia mbonyi tsechikaa tsiwutike alya masiionyi ha maheri ho hai mateṟie; kipfa nyi wudo kechiwa kui nyashi ya Mndumii.

²⁰ Suwa iya ulewona, iwode membe tsiwi, nyi wamangi wa Umedi na Uajemi.

²¹ Na kyoṟo kilya kiwode mafufuta hafoi nyi mangi o Uyunani, na ombe lulya lung'anyi lui kiidi kya meso hayo nyi mangi o kuwoka.

²² Kya ombe lulya lulefunjika, tsikadoso ho membe tsiina, mangi tsiina tsechihoṟoka kiidi kya mkambo fo wandu walya walya, indi pfinya yawo yechianguo.

²³ Mtsitsionyi fo wumangi wowo, walya wedeko ili mandi wechishika, mangi awode kyamu kilang'a aichi shiṟike nechihoṟoka.

²⁴ Pfinya tsake tsechiwa tsing'anyi mnu, indi chi kui wuidimi woke amonyi pfo; nechinyamaṟa kiṟihishie wandu wose, nawetaramo necha, na iwuta chando akunda; nechirumatsa iwo waṟango na wandu waele.

²⁵ Na kui chila yake nechiṟunda kui mtambo na ikuichika amonyi ipfo mrimenyi foke nawerumatsa walya wakukerie na wuhoo; nao nechihoṟoka wahodane nao ichu ai mnene o wanene; kyaindi nechifunja kulawode mawoko heṟunda.

²⁶ Na mawonesio ho ha kiheri kedasa kya kyiukanyi na ngamenyi shahambo nyi lohi; indi iyo shikia shiwonesio shi kipfa kya maka iicha mkonu sa ifoi ikeri icha.”

²⁷ Na inyi Danieli ngauma, ngaluo mfiri maata; kiidima ngakure, ngaṟunda maṟunda hako ha mangi; ngaṟihisho nyi mawonesio halya kyaindi kuwode msa alemanya pfo.