DANIELI 7 - Bibilia Kui Mdedie fo Kimochi

Ndodo ya Danieli ya mando hang'anyi hana

¹ Maka fo kuwoka fo Belshaza Mangi ya Babeli, Danieli kalodia alee kio kitaṟenyi kyake; kaṟehia ndodo iya, kawika shose handu hamu.

² Danieli kadeda kechihamba, “Njilewona njidi kiidi kya kio; njowira tsiina tsilewiwita tsa ruwehu; tsiapfinya mnu huya ipalyipalyi ling'anyi.

³ Kudi kukadopfo mando hai na moo haana hawuka kulya mṟingenyi halafananyi ma nta.

⁴ Lya kuwoka liwefananyi na mwiso liwewode makungo cha owishi; ngaambuya, makungo halya hakairiya mberi, likairo huye, likahoṟotso na madende hawi cha mndu; likainengo mrima fo mndu.

⁵ “Ambuya indo lilya lya kawi liwefananyi na rumu lya ngaṟe, likairio ora lumu, na mafuo haṟaṟu ha mbaṟi hawei dumbunyi lyalyo mahehonyi, wakawia wadi ngaṟe, ‘Kure nolye nyama, tsiichuo pacha.’

⁶ Numa ngaambuya ate kuwode se lingi lifananyi na rumu, liwode makungo hana o mhongo cha ndehe; nalyo liwewode mdo iina; likainengo wuitoṟi.

⁷ Kyasia ngawewona kulya ndodonyi ya kio, indo lya kana liṟihishie mnu nakamu, liapfinya, liwode mkuura, liwewode maheho ha menya, hang'anyi mnu; likalya, likawepoṟipotsa, na ichuma chuma mtsuhaṟo fulya na madende halyo, mbikie na umba lyake liwei haleshe na halya ha kuwoka, ilyi liwewode membe tsiina.

⁸ Ngatuluya meso membe tsilya, kukadosa ho membe kiidi kya itso indi iwei njitutu, kukaṟuka membe tsiṟaṟu tsisonguo na kiidi kya membe tso kuwewode meso cha meso ha mndu, na dumbu liweideda madedo ha kiṟiha.”

Irumatso lya mando halya

⁹ “Ngawona njoloṟika tsa wuitoṟi tsikawiko, na meku umu o oruka adamie; nguo tsake tsiwei njiili cha makuṟeṟa na njui tsa mdo foke fuwei miili panga kipfa kya mhasa; loṟika loke luweikumba olewo lo modo, shidenga shalyo shiwei cha modo fuiaka.

¹⁰ Meda cha fo modo fukaida oshangunyi loke; shiku na shiku wukamṟundya, na shiku ikumi ka shiku ikumi wakahoṟoka oshangunyi loke, mwanduye fukawiko, shitapu shikatambaṟuyo.

¹¹ “Ngaambuya kiheri kyo kipfa kya ṟu lilya na madedo halya halewuka kulya ombehu ngaambuya mṟasa indo lilya likawoho, mbihu folyo fukanyamaṟo, fukawuto furumatso modonyi.

¹² Na mando halya hengi hakasoko wuitoṟi; indi o hendo loho lulelesheṟo shiheri na ngoseṟa.

¹³ Ngawewona se ipfo ndodonyi ya kio, umu ai ofano lo mndu kacha na mapuchi awuka ruwehu, kasembelia mmeku ulya o maka ifoi wakameende na afui.

¹⁴ Nao kainengo wuitoṟi na kiṟumi na wumangi, kundu wandu wa mbaṟi tsose, na mkambo yose, na shishomo shose wamṟundie, wuitoṟi woke nyi wuitoṟi wo mlungana; wulechikaa wuide, na wumangi woke nyi wumangi wulechiwa irumatso.”

Utambahaluo lo ndodo ya kuwoka

¹⁵ “Kyasiang'u inyi Danieli, mrima foko fukasokio mnu nyi fowa na mdo foko fukaichuo mahio malemeri.

¹⁶ Ngasembelia umu o walya wawehoṟoki hafui, ngambesa ishi shose shahamba ki. Kanjiwia na injidambuya shose:

¹⁷ “Mando halya haana hang'anyi nyi mangi tsiina tsechicha kunu wuyanenyi.

¹⁸ Indi waele wa ichu ai huya shose wechiambiya wumangi, na iitoṟia mlungana na mlungana.

¹⁹ “Njiwekundi imanya kya indo lilya lya kana, liwei aleshe na wodoye wose, liṟihishie na iowesha, maheho ha menya, njaa tsa aṟeṟa, lilelya, likapoṟipotsa na ichuma chuma mtsuhaṟo na madende halyo;

²⁰ na kya membe tsilya ikumi tsiwei mdohu kolyo, na ombe lulya luledo, na tsilya tsiṟaṟu tsileoloka, tsilya tsiwewode meso na dumbu lilededa madedo ha kiṟiha, likawona ho wa pfinya kota wodoyalyo.

²¹ “Ngaambuya na ombe lulya lulya lukaamtsa shida na waele lukawinga;

²² mṟasa kacha mmeku chu o maaka ifoi, na waele wa ichu o huye wadumbuyo mondu na maheri ha haafukia waele wakaitoṟia na iwada wumangi.

²³ “Kahamba adi, ‘Indo lyo lya kaana nyi wumangi wo kaana kunu orukenyi, wochikaa haleshe na mangi tsilya tsingi tsose, wumangi wu wochilya wuyana wose na iwachuma na ipoṟipotsa shiteno teno.

²⁴ Na kya membe tsilya ikumi; kiidi kya wumangi wo, wechikure wamangi ikumi, na ungi nechikure numa yawo, nakae haleshe na iwo wengi, nao nechisotsa wamangi waṟaṟu.

²⁵ Nao nyi echideda madedo halasumhanyi ichu o huye, nao nyi echilisa wukiwa waele wa ichu o huye, nawekusaṟa na idumbuo iilacha wuwawaso na maheri; nawo wawiko mawokonyi hake ko kiheri, na shiheri shiwi na kiteeno kya kiheri.

²⁶ Kya indi mdumbuye fochiwiko, nasoko wuitoṟi woke, na iwudetsa na irumatsa mlungana.

²⁷ Na wumangi na wuitoṟi na wunene wo wumangi iya wuyana wechiinengo wandu waele wa ichu o huye, wumangi woke nyi wumangi wo mlungana na wose wengi waitoṟi wechimṟundia na imiindia.’

²⁸ “Ifu nyi mtsitsionyi fo mbonyi iya. Na inyi Danieli mhio foko fukaeṟewe na oshangu loko lukailachika; indi ngawika kindo ki mrimenyi foko.”