DANIELI 5 - Bibilia Kui Mdedie fo Kimochi

Mfuho ya mangi Belshaza

¹ Mangi Belshaza kasungusia mfuho fo walya wose wawewode wuchili, kanyo mvinyo oshangunyi lowo.

² Belshaza kiheri aweisaha mvinyo fulya, kaduma masinga hake hahendeende shombo shilya sha sahabu ndeeoke Nebukadneza aleshiende awuta hekalunyi lya Yerusalemu (shiwekeri ofano lo bilauri tsa mvinyo) kundu o na wachili wake, na waka wake, na shitonga washinyoye.

³ Kyasia wakaende shombo shilya sha sahabu shilya shileendo shiwuto Hekalunyi lya Ruwa wuka Yerusalemu, Mangi na wachili na waka wawo wakashinyooya

⁴ Wakanyo mvinyo wakaṟumisha maruwa hawo ha sahabu, na ha fesa, na ha aṟeṟa na ha menya, na ha mashidi, na ha maho.

Maṟehio onandenyi

⁵ Peṟeseng'u, kukawoneka owoko lo mndu na shimnyo shii cha sha mndu, shikaṟehia mahandenyi ha mba ya wuitoṟi ya Mangi sumuhana na kitaanga kya taa, nao mangi kawewona owoko lulya luleṟehia.

⁶ Oshangu loke lukailachika oweṟe, makusaṟo na mahiyo hake hakadeka, kadosa mtara na idedema ling'anyi.

⁷ Mangi kafuha na ṟu ling'anyi, kaduma walaho wahanga na wasawi na Wakalidayo na walya welasha. Mangi kadeda na wenyi wuṟango wa Babeli, kahamba, mndu echiidima injisomia mṟehoyo na injidambuya necha nechiṟiko maṟao ha king'aring'ari na mshe fo sahabu nzingonyi nao nyi echiwa o kaṟaṟu kiidi kya wumangi woko.

⁸ Kyasia wakaanga kulya mmbenyi ya mangi wose waweichi ke wawode wuṟango; indi alewonekaho manya umu awode wuṟango aleidima isoma maṟeho halya ma imbonyia mdambuye-pfo.

⁹ Naalyo mangi Belshaza kaeṟewe mnu, kyamu kyake kikadetsa fana, na wachili wake wakasonu mnu na iwado nyi machenyede.

¹⁰ Kipfa kya madedo ha mangi na wanene wake, mae o mangi kaida na kulya wawedamie wechikesa kahamba, “Mangi kukae ho na moo! Manya kulakusaṟe mnu ma kuladetse fana ya kyamu kyapfo.

¹¹ Kuwode mndu kiidi kya wumangi wopfo amiichuṟe mumuyo fo maruwa hose hai maele fui kiidi kyake; mandi halya ndeo awode wumangi; ngeela na wulaanyi na wuṟango shilewoneka koke; na Mangi Nebukadneza ndeo kamng'anyisha kambikaho mnene o wahanga, na walaanyi na Wakalidayo na Shisuku.

¹² Kipfa Mumuyo mcha fueṟie na imanya na wuidimi wo idambuo ndodo, na imanya madedo ha kiṟika, shikawono ko Danieli-cho, ichu mangi alededa kyake ke nalaho Belteshaza. Ko ikyo Danieli nalaho nechiloṟa mndambuye fo ishi owona.”

Danieli atambahaluo maṟeho

¹³ Nalyo Danieli kaendo na ko mangi. Mangi kadeda na Danieli kambia: “Ngesa, iyo nyi Danieli ulya ai umu o wana wa Yuda walya walesamiṟo, walya wande oko alewaende kiheri awei mangi kawaende kuwuka Yerusalemu?

¹⁴ Njileicho mbonyi tsapfo ke mumuyo ya maruwa ii kiidi kyapfo, ngoseṟa ngeela na wuṟango shikawewono kopfo.

¹⁵ Kyasiang'u ambuya wandu wose waṟango na wahanga na walashi wameendo na koko kundu wasome mṟeho fu na injineenga mdambuye, indi walaidime isoma ma injidambuya.

¹⁶ Indi ngaicho ke iyo nyi okedambuo na imanya mbonyi tsa kiṟika; wulalu kokoya ochiidima isoma maṟeho ho na injidambuya kiṟike kyo nyi ochiṟiko nguo tsa king'aring'ari, na mshe fo sahabu nzingonyi kopfo nowe mndu o kaṟaṟu o kiidi kya wumangi woko.”

¹⁷ Nalyo Danieli kahaluo mangi kambia, “Shiinengo shapfo shiwade iyo kumonyi na weri woko kuinengie mndu ungi indi njechisoma mṟeho fu na idambuo mbekudambuya.

¹⁸ Ko mbonyi tsapfo iyo mangi kikeri kiile:- Ruwa-chu akeri huya shose naleinenga Nebukadneza wumangi akeri ndeo, kamnenga wusuṟi wuitoṟi na wunene

¹⁹ kipfa kya wuitoṟi na wunene wulya alemsumba wandu wa mbaṟi tsose na shishomo wakadedema na imwowuo, ulya akunda imbaha kambaha, ulya akunda imda na moo kikawewa kido, ulya akunda imṟumisha kamṟumisha, akunda imsotsa kawemsotsa.

²⁰ Kyaindi kakudosa na ikuichika mnu na mrima foke fukauma kawuta shindo kui orikiki, kairo loṟikehu lo wuitoṟi kasoko wunene wulya wose.

²¹ Kafunio kuleshe na wandu, mahio na ngoo yake ikawa cha indo lya ngeṟenyi, kakaa kimu na nzoi tsa ngeṟenyi; kalya maṟa cha mbe, mbihu foke fukaambia ṟauṟa iwuka ruwehu; itane alemanya ke Ruwa-chu o huye nyio ai moitoṟia wamangi wose na wuyana na nyio ekewika mndu na imdosa chandu akunda.

²² Na iyo manoke iyo Belshaza ulakunde ikunyiiṟa mrimenyi manya chando uweichi mbonyitso.

²³ Kokuirinyisha oshangunyi lo Mndumii-Ruwa o ruwehu; mkaende shombo shilya shele shikaendo na mmbenyi yapfo mukanyo nasho iyo na wanene wa mkambo, na waka wapfo na shitonga shapfo, mokiidima mukaṟumisha maruwa hanu ha wongo ha sahabu na fesa na aṟeṟa, na ha mashidi na ha maho; halekewona manya iicho, na halaichi idedo lyose na Ruwa ulya mṟufu fopfo fui kuwokohu koke na njia tsapfo nyi tsake ulakunde imṟumisha.

²⁴ Naalyo owoko lulya lukaendo luwuka koke, na maṟeho ha haleṟehyo.

²⁵ Maṟeho hawemaṟehie nyi iha, “MENE, MENE, TEKELI NA PERESI.”

²⁶ Mdambuye fo madedoha nyi ifu; MENE, Ruwa natala wumangi wopfo wukashika mtsitsionyi.

²⁷ TEKELI, noineng'eno kowono nyi ui mfafa.

²⁸ PERESI, wumangi wopfo wohawukana, wukainengo, Wamedi na Waajemi.

²⁹ Nalyo Belshaza kawuta uwawaso, wakaṟika Danieli nguo tsa king'aring'ari, wakawemṟika mshe fo sahabu nzingonyi, wakakapa ombe na ionguo mbonyi tsake, ke o nyi mndu o kaṟaṟu kiidi kya wumangi.

³⁰ Kio kilya Belshaza, mangi o Wakalidayo kawoho.

³¹ Na Dario Mmedi kaambia wumangi awode maaka makumi haṟandaṟu na iwi (62).