DANIELI 4 - Bibilia Kui Mdedie fo Kimochi

Ndodo ya kawi ya mangi Nebukadneza

¹ Mangi Nebukadneza, ko wandu wa mbaṟi tsose, shishari shose, shishomo shose wai wuyanenyi kose, “Ofoṟo luengeṟeke konu.

² Inyi njiwonyi ke kinjiwaṟi njihambe mbonyi tsa ṟiho tsilya Ruwa alenjiwutia.

³ Shichano shake nyi shing'anyi na maṟiho hake nyi ha kilula, wumangi woke nyi wo mlungana; na wuitoṟi woke nyi wo marika hose.

⁴ “Inyi Nebukadneza, njiwekeri ichihiyo kiidi ya mba yako, njechiengeṟeka kiidi kya wuitoṟi woko.

⁵ Ngalodia ndodo ilenjiowesha mahio na makusaṟo hako mbei naho hakanjitewa ngaeṟewe mnu.

⁶ Ngawuta iwawaso ke walaho wandu wose wa Babeli wenyi wuṟango kundu wanjidambuye ndodo iya.

⁷ Nlyong'u walecha wahanga, walashi na wasawi wa Ukalidayo wose na waeṟie wuṟango; ngawaongoya ndodo iya walaidime injidambuya.

⁸ Ifurumiaho Danieli kacha na koko njimlahiye nyi Belteshaza, rina lirianyi na ruwa oko; ipfo kiidi kyake kuwode mumuyo ya maruwa halya maele ngamwongoya ndodo iya njechihamba,

⁹ “Iyo Belteshaza mnene o wahanga, kipfa njiichi ipfo kiidi kyapfo mumuyo o Ruwa mwele nai na iyo le wai, ma kuwode idedo lya kiṟika lyechidekeka ang'u iliṟikapfo njiwia ndodo iya na unjidambuye ke lyahamba ki.

¹⁰ “Shilya njilewona nyi shikeri shiile: Kuwewode ikidi kiidi kya oruka lilileshe mnu.

¹¹ Ikidi lilya likang'ana, likawada pfinya, likalea itane lyashikia ruwehu, likawono mṟasa kishingonyi kya oruka.

¹² Maṟa halyo hawei mecha mnu, ndunda tsifoi, kando kashikie wandu wose, mando ha nja hakawona mṟishe wanda ya maṟamba halyo - malehe hakakaa huye ya maṟamba; orio kii na moo kikawona kando.

¹³ “Ngawona kiidi kya kiwonesio kunu mdonyi koko ngawona mringi ai mwele, asoka awuka ruwehu.

¹⁴ Kadeda na ṟu ling'anyi kechihamba. “Manyenyi ikidi lyi, aṟawuonyi maṟamba halyo foleni maṟa halyo na iola-ola ndunda tsalyo. Mandoho hai na moo halee oo wanda hakureho na malehe ho halee ipfo maṟambehu hauke ho.

¹⁵ Indi itsuwalyo lidenyi ipfo terinyi kiidi kya maṟa mawiriwiri ha pichinyi, itsuwalyo liwewona mṟinga na ṟauṟa ya ruwehu, liwewa kamba limu na mando ha ngeṟenyi hai orukeni.

¹⁶ Ko maka mfungade echiwada mahio ha wandu pfo, kyaindi nechiwa cha indo lya ngeṟenyi.

¹⁷ Mwanduye fu focha kipfa kya waringi, na iwawaso lyi kui idedo lya waele; kundu iwa wai na moo wamanye ke ichu ai huye nyi aitoṟie wamangi wa wandu, nao nyi ekekuinengia ichu amkundi na ishimbuo ichu ai mfafa.”

¹⁸ “Inyi Nebukadneza njilelodia ndodo ii na iyo Belteshaza njiwia mdambuye foyo, kipfa wose wenyi wuṟango wai kiidi kya oruka loko wechiidima injiwia lyahambaki pfo indi iyo nochiidima, kipfa mumuyo fo Ruwa mwele fui kiidi kyapfo.”

Danieli ahamba mtambahaluye fo ndodo

¹⁹ Naalyo Danieli, amlahe rina lyake Belteshaza, kaṟihiyo handu ha oweṟe makusaṟo hake halakae sumuhana. Mangi kawia Belteshaza, “Ambuya ndodo i ilakuṟihishe ma mdambuye foyo.” Kyasia Belteshaza kambia ndodo i ikoye iwo wose wakusuo na mdambuye foyo fukoye wakituwa wapfo.

²⁰ Ikidi lilya uleliwona likang'ana, likalea itane lyashika ruwehu, na iwono nyi wuyana wose;

²¹ ilyi maṟa halyo hawei mecha na ndunda tsifoi, liwewode na shelya shishikie wose; mando hai na moo hakalaa oo wanda ya mṟishe folyo na malehe hakaa huya maṟamba halyo le wai,

²² nyi iyo mangi kuleng'ana kowada pfinya; kipfa wunene wopfo wuleng'ana wukatana woshika ruwehu, na wuitoṟi wopfo wushikie matsitsionyi ha oruka.

²³ Kake kipfa mangi nalewona mringi nao nyi ai mwele, kechisoka awuka ruwehu kechihamba, manya ikidi lyo mlirumatse indi denyi itsuwa ipfo terinyi hamu na mshe ya menya tsa aṟeṟa kiidi kya maṟa mawiriwiri ha pichinyi muliletsie mṟinga na ṟauṟa ya ruwehu na ohawi loke luwe hamu na mando hai na moo ha pichinyi mṟasa maheri mfungade haide;

²⁴ Otambahaluo loke nyi luile: “Iyo Mangi na ilyi nyi iwawaso lya ichu o huye lilechea mndumii oko mangi;

²⁵ ke nochifunyio kuleshe na wandu, na iyo nochikaa hamu na mando ha ngeṟenyi na iyo nochitikiriyo ilya maṟa cha mbe, nochiwikio mṟinga fo ṟauṟa ya ruwehu na maheri mfungade hechiida huye yapfo, itane omanya ke kuwode ai huye aitoṟie wumangi wo mndu o wandu, nao nechiidima iinenga ichu amkundi oose.

²⁶ Na kipfa alewawasa itsuwa lyo lideo; wumangi wopfo wochiwada pfinya, komekemanya ke ruwehu ntso tsekeitoṟia.

²⁷ Kipfa kya ikyo le Mangi, njikuwia kudi; da wunyamaṟi uwute sumuhana na wulohi, da mawicho hapfo uweambuya wakiwa kundu mkonu yapfo ifo-fo na iyo ukae na sia.”

Utambahaluo lo ndodo woinutsio

²⁸ Isho shose shikahoya Mangi Nebukadneza.

²⁹ Komeida meri ikumi na iwi nyi awekeri ichumia - chumia mbenyi ya wumangi kulya Babeli.

³⁰ Mangi kadeda kahamba: “Mṟifu fo Babeli fung'anyi njilefuwika inyi fuwe mṟi fo wumangi, kui pfinya tsako, kundu fuwade kiṟumi kya wuitoṟi woko!”

³¹ Kudi kechideda ṟu likamchea liwuka ruwehu lyechihamba, “Iyo Mangi Nebukadneza madedoha nyi iyo ukeri iwio; wumangi wu wowuto kopfo.

³² Na iyo nyi ochifunyio kuleshe na wandu na iyo nochikaa hamu na mando ha ngeṟenyi, nochilya maṟa cha mbe; na shiheri mfungade shechiida huye yapfo mtano omanya ichu ai huye nyio aitoṟie wumangi wo wandu, nao nekeinenga ichu akukundia ose.”

³³ Saa nayo tichi kindo ki kikawutika, kikakoya Nebukadneza; kafunyio kuleshe na wandu, kalya maṟa cha mbe, na mbihu foke fukapuo mṟinga fo ṟauṟa ya ruwehu, njui tsake tsikang'ana, tsikawa cha mberi tsa owishi na njaa tsake tsikalea cha tsa ndehe.

Nebukadneza aṟumisha Ruwa

³⁴ “Lyefurumia maheriho, inyi Nebukadneza, ngairia meso hako ngaambuya ruwehu, mahio hako hakawa kufui na inyi; ngaidapfuma Ruwa chu ai Huye. Ngamwaana ngamṟumisha Ichu ai na moo mlungana: ‘Kipfa wuitoṟi woke nyi wuitoṟi wo mlungana, na wumangi woke nyi wuitoṟi wo mlungana, na wumangi woke wulamanda kishari na kishari;

³⁵ na wose waikunu wuyana wai watale chi kindopfo; nao nekewuta chando akundi ipfo ruwehu na kunu orukenyi, kuipfo manya umu echiidima iima owoko lokepfo, ma imbesa, ‘Nkiki uiwuta iyo?’”

³⁶ Nalyo kudi makusaṟo hako hakawa mecha na kipfa kya wuitoṟi wo wumangi woko, kiṟumi kikawewuya, walya wawei wanda yako wakacha injishiha; na inyi ngawanzio kiidi kya wumangi woko ngaengeṟio wuitoṟi ngaeṟa.

³⁷ Na hong'u inyi Nebukadneza njiadapfuma Mangi ya ruwehu, njimṟumisha, njimuindia; kipfa mawuto hake hose nyi ha lohi, na njia tsake nyi tsa sumuhana; walya wekushela wose nekewasotsa.