DANIELI 3 - Bibilia Kui Mdedie fo Kimochi

Mangi Nebukadneza awawasa orio mndu naadapfume sanamu ya sahabu

¹ Kyasia Mangi Nebukadneza kasungusia sanamu ing'anyi mnu ya sahabu, wuleshe wo henda huye nyi mawoko makumi haṟandaṟu (60) wulandari mawoko haṟandaṟu (6) kaihoṟotsa patehu lya Dura, kidembonyi kya Babeli.

² Nalyo Nebukadneza kaduma wandu wasanyie wandu wose wawode iṟunda kiidi kya isanga lyose wache ishimbuo sanamu iya aleisungusia.

³ Nlyong'u wose wakacha wakashika chando mangi alewadumia

⁴ Mokapa iranda kakoṟoṟoma kechihamba, “Nyo wandu na mbaṟi tsose na shishomo mowawaso wai,

⁵ mkaicho iranda, na mtoṟiṟo, na shinanda na njonyi tsikapo orio mndu naho wanda na kyamu naindiye na iterewa sanamu i Mangi Nebukadneza aihoṟotsa.

⁶ Kokoya kuwode ma mndu umu tupu echitehya wuwawaso wu kyake nyi ikumbo kulya ṟungunyi lya modo.”

⁷ Wokia mkonufo, wandu wakameicho iranda na mtoṟiṟo na shinanda na njonyi tsikapo wandu wose wakaho wanda na kyamu wechiindia na iterewa sanamu iya ya Mangi Nebukadneza aleihoṟotsa.

Mbuya tsiṟaṟu tsa Danieli washitakio ko imina iwawaso lya mangi

⁸ Kikashika Wakalidayo maata wakahenda ko Mangi ikumba Wayuda.

⁹ Wakawia Mangi Nebukadneza, “Mangi Nebukadneza kaa na moo mlungana.

¹⁰ Iyo Mangi nolewuta iwawaso ke orio mndu oose echiicho iranda na mtoṟiṟo na shinanda na njonyi tsikapo kiwawaṟi ioloka wanda na kyaamu na iindia sanamu iya uleihoṟotsa ya sahabu;

¹¹ na mndu katehya iwawaso li nechikumbo ṟungunyi lya modo foaka.

¹² Ambuyang'u wulalu Mangi kuwode Wayuda kulewawika wawe wachili kunu Babeli nawo nyi Shadraki na Meshaki na Abednego; wandu wa Iyo Mangi walekuichopfo na ikuadanyia ma iindia maruwa hapfo ma sanamu iya yapfo ya sahabu kuleihoṟotsa.”

¹³ Mangi Nebukadneza kaichuo nyashi kawuta wuwawaso waendo wako Shadraki, Meshaki na Abednego. Wandu wakawaende oshangunyi lo Mangi.

¹⁴ Mangi Nebukadneza kawawia. “Nyo Shadraki, Meshaki na iyo Abednego, ngesa nyi wunesi na wuminyi itane moda mulaindia ruwa chu oko na sanamu ya sahabu njileihoṟotsa?

¹⁵ Wulalu munjiwie kokoya mukusungusie wokia wulalu muteṟie ke mukaicho iranda na mtoṟiṟo na shinada na njonyi tsikapo mochiho wanda na kyaamu na iindia ruwa oko na sanamu yako ya sahabu ndeihoṟotsa. Kokoya mulateṟia ikyo na iwuta mudo, mukaengeṟa iumiṟa ngoo tsanu, nyi kya lohi mochikumbo kulya ṟungunyi lya modo foaka a nyi Ruwa uhya icho echimukiṟa na owoko loko na modo fo?”

¹⁶ Nlyo Shadraki na Meshaki na Abednego wakahaluo wakambia, “Mangi Nebukadneza, luwode kindo kekuwia kiidi kya idedoli pfo.

¹⁷ Kokoya nyi wudo, Ruwa odu ichu lokemṟundia nyi echiidima ilukiṟa na modo fu focha;

¹⁸ Kokoya kilai kido. Iyo Mangi nomanye ke lochiidikia iindiya sanamu yapfo-pfo ma ihoneria maruwa hapfo.”

Mbuya tsiṟaṟu tsa Danieli waanduyo iwoho

¹⁹ Naalyo mangi Nebukadneza kaichuo nyashi, oshangu lo kyamu kyake lukailachika, kasukio nyi Shadraki, Meshaki na Abednego, kawuta wuwawaso ke waengeṟe modo kulya ṟungunyi ka mfungade kota chando kiwaṟi.

²⁰ Kiidima, kawelaha waasikari wake waapfinya, wakawada Shadraki, Meshaki na Abednego wakawapfunga wakawakumba kulya ṟungunyi lya modo.

²¹ Wamewapfunga waṟee nguo tsawo, na kanzu tsawo na makonya hawo na nguo tsingi da, wakawakumba kulya ṟungunyi liwode modo fung'anyi mnu.

²² Wulalu kipfa iwawaso lilya lya Mangi nyi liweng'anyi mnu na modo fulya nyi mbe fo kiṟiha, wekikumba pfo Shadraki, Meshaki na Abednego. Olewo lulya lo modo lukakuruo walya wawewawode itane watonyikia kulya ṟungunyi wakasenekia pfo.

²³ Wasoṟo walya waṟaṟu Shadraki, Meshaki na Abednego wakaoloka wai wapfunge kulya ṟungunyi lya modo.

²⁴ Mangi iya Nebukadneza kaṟihiyo kahoṟoka faṟa kawesa wachili walya wai wanda yake, “Alewo chi wandu waṟaṟu lulewakumba kulya ṟungunyi lya modo wai wapfunge?” Wakamhaluo, “Ee ikyo nyi lohi Mangi.”

²⁵ Nao kawawia, “Ambuyenyi inyi njiwonyi wandu waana; nawo waiwapfunguo, waitengeta kiidi kya modo ma kuwode kindo kiwapaaya pfo, indi ulya o kaana nyi afananyi na mana o ruwa?”

Wambuya waṟaṟu wainengo mkuachie na wusongoru

²⁶ Kyasia Nebukadneza katikiria alya afui na nungu iya ya modo. Kalaha, “Lanye Shadraki, Meshaki na Abednego, waṟundi wa Ruwa o Huye; wukenyi ipfo mche na kunu.” Naalyo Shadraki Meshaki na Abednego wakawuka kulya modonyi.

²⁷ Wandu wose wai wachili na wenyi wusongoru wuliwe wakuwumbie alya mengenyi ko mangi, wakawona wandu wo ke kuwode kindo kilewawutikia kulya ṟungunyi lya modopfo ma ochui lo mdo fowo, ma nguwo tsawo ma mpfaamo fo mtsu fuleichio kowopfo.

²⁸ Nebukadneza kahamba, “Naṟumisho Ruwa o Shadraki, Meshaki na Abednego; ichu aleduma Malaika oke kakiṟa waṟundi wake wakumsirie, iwo waleilacha idedo lya mangi, wakawuta mbihu yawo ilasingie maruwa hengi shile Ruwa owo wawenyi.

²⁹ Wulalu ngawika wuwawaso ke mndu oose o wumangi woko icho echideda idedo lilawaṟi lya Ruwa o Shadraki, Meshaki na Abednego, wechimanyo manyo o na mba yake iwe handu hekumba mambosha; kipfa kulawode Ruwa ungi echiidima ikiṟa adi.”

³⁰ Kyasia Mangi kang'anyisha Shadraki, Meshaki na Abedinego kulya Babeli.