DANIELI 12 - Bibilia Kui Mdedie fo Kimochi

Kiheri kya matsitsionyi

¹ “Kiheri kyo Mikaeli nechihoṟoka, mnene o ngapano nahoṟoke ora lo wana wa wandu wako; kochiwa kiheri kya wukiwa wulalemewono wokia mbooko itane kiheri kyo, na kiheri kyo wandu wapfo wechikiṟo orio umu echiwono amṟehiye kiidi kya kitapu kilya.

² Kingi wafoi wa iwo wekoyo walee maṟungunyi wechiṟutso, wengi wawone moo fo mlungana na wengi sonu na wukiwa wo mlungana.

³ Walya walaanyi wo wechiwaa cha sa ya nginehu, na iwo wesongoya wengi iwuta mecha wechiwaa cha nyenyeri mlungana na mlungana.

⁴ Kyaindi iyo Danieli, pfunga madedoha, nohawike kiṟingishiyo kitapunyi; nopfunge kitapu kyo mṟasa kiheri kya ifurumia; wafoi wechihenda ipfo na ipfo na wuṟango wochiengeṟeka.”

⁵ Nalyo inyi Danieli, ngaambuya, ate, wahoṟoki se wengi wawi, umu ora lumu lo meda na ungi ora lulya lungi lo meda.

⁶ Umu kawesa mndu ulya amṟike nguwo tsa katanyi, awei huya mṟinga fo meda, “Ngesa nyi kiheri kya maka inga mṟasa ifurumia lya mbonyi tsi?”

⁷ Inyi ngaicho mndu ulya amṟike nguo tsa katanyi, awei huya mṟinga fo meda, kairia owoko loke lo kulyo na owoko loke lo kumoso huye ruwehu; kalya nyamu ya ichu ai na moo mlungana na mlungana, ke kochiwa kiheri na shiheri shiwi, na kyenga kya kiheri; kake wakamemaa ifunja pfinya tsa wandu wo waele, nlyong'u mbonyi tso tsose tsechiinukia.

⁸ Inyi ngaicho indi njilamanye, nlyong'u ngahamba, “Ee Mndumii-Ruwa oko, ifurumia lya mbonyi tsi lyechiwa lida?”

⁹ Kahamba, “Henda Danieli; kipfa madedoha hamepfungo na iwiko kiṟingishio mṟasa kiheri kya ifurumia.

¹⁰ Wafoi wechikuilisha, na ikulaluo wailyi, na ikusanja; indi wawicho wechiwuta mawicho; kuwode mbicho ma umu echimanyapfo; indi iwo walaanyi nyiwo wechimanya.

¹¹ Na wokia kiheri kilya shidaso shemaya modonyi ilyi shechiwutoho shilya sha kitsitsi, na kiwi kya orumatso ilyi kechihoṟotso, kechishika mfiri kiku na mahana haṟaṟu na makumi haṟaṟu na itanu (1,335).

¹² Kyaindi iyo kuhendie mṟasa ifurumia lilya, kipfa iyo nyi ochichihiyo na isia moo, na iyo nyi ochihoṟoka kiidi kya kuṟu kuhya lyapfo iya masiiyonyi ha mfiri yo.

¹³ Kyaindi iyo Danieli, kuhendie nohende ionyonya kipfunyi, na kiheri kyo kikashika, nochiṟuka na iambilia kiṟimiṟa kyapfo.”