DANIELI 10 - Bibilia Kui Mdedie fo Kimochi

Ndodo ya Danieli mbai ya meda fo Tigris

¹ Kiidi kya maka fo kaṟaṟu fo Koreshi, mangi o Uajemi, Danieli chu awe mdumbuye rina Belteshaza, kaloṟo idedo; na idedolyo liwei lohi; kipfa nyi lya shida ing'anyi; nao kamanya idedo lilya, kamanya na mawonesio ho.

² Kiidi kya mafiri halya inyi, Danieli, njiwekeri ikapa kilio handu ha mfungade iṟaṟu iichuo.

³ Ndelya kelya kelodapfo, ma nyama, ma mvinyo fulekuwasha na dumbu lyakopfo, ma njilekushia mafuda pfo, mṟasa mfungade iya iṟaṟu ikasia.

⁴ “Na mkonu fo makumi hawi na kaana (24) fo meri fo kuwoka, njikeri mbai ya meda fulya fung'anyi, Tigrisi;

⁵ njileiria meso hako, ngaambuya, ate a ulya mndu amṟike nguo tselaho tsa kitanyi, kitsi kyake kiikipfunge na sahapu njicha ya Ufazi.

⁶ Mbihu foke fuwei cha zabarajadi njicha, kyamu kyake kiwei cha mbawa, na meso hake cha taa tsa modo, mawoko hake na madende hake mfananyie foho nyi menya ya aṟeṟa iya njiili injisanje mnu, ṟu lya madedo hake lifananyi na maṟu ha kituṟu kya wandu.

⁷ “Inyi Danieli, ngawona ishi njii njimonyi; kipfa walya wawei kimu na inyi walewona ishipfo; kyaindi walewado nyi kiding'ashi, wakadicha ihenda iowa.

⁸ Kyasia ngadeo njimonyi, ngawona mbonyitsi tsiṟihishie, ngadeo njilawode pfinya; wucha wulya woko wukalaachika wukawa inyamaṟika, manya njiledeyo pfinya.

⁹ Kyaindi njileweicho ṟu lya madedo hake; na inyi kiheri njileicho ṟu lya madedo hake, ngawado mado hang'anyi, kyamu kyako kikaambuya wanda.

¹⁰ Kudi owoko lukanjipaaya, lukanjihoṟotsa, madende hako na mawoko hakawada pfinya, kipfa mbeleheli.

¹¹ Kanjiwia, “Iyo Danieli mndu umkunde mnu, manya madedo ha njikeri ikuwia, hoṟoka chimu; kipfa njimdume kopfo wulalu.” Kiheri alenjiwia idedo lyi, njilehoṟoka njechidedema.

¹² Nlyondi alenjiwia, “Kulaowuo, Danieli, kyamba wokia mkonu fulya fo kuwoka ulewika ngoo yapfo sumuhana kundu nowade wuṟango, kowekunyiiṟa oshangunyi lo Ruwa, madedo hapfo haleichio; na inyi ngacha kipfa kya madedo hapfo.

¹³ Kyaindi mnene o wumangi wo Uajemi nyi alehodana na inyi mkonu makumi hawi na fumu (21) ; kyaindi ambuya Mikaeli cho, umu o wanene wasonguo, kacha injitarama; na inyi ngamda pfo hamu na wamangi wa Uajemi.

¹⁴ Wulalu ngacha ikuwia mbonyi tsechikoya wandu wapfo maheri ha ifurumia; kipfa mawonesio ha nyi ha kiheri kileshe daa.”

¹⁵ Kekimarisa ideda na inyi madedo ho ngaindutsia kyamu kyako wanda ngawa pipi.

¹⁶ Oweṟe kudi, umu afananyi na wandu kapaya dumbu lyako; naalyo ngawoka ideda, ngawia ulya awehoṟoki afui na inyi, “Hoi Mndumii-Ruwa oko, kipfa kya mawonesio ha ngawuya ihoyose nyi fowa; ngalehela piu.

¹⁷ Kipfa, mṟundi o Mndumii-Ruwa oko nechiidima se ideda na Mndumii-Ruwa chu oko? Kipfa ngadeeyo se pfinyapfo ma mṟufu fuledeo kokopfo.”

¹⁸ Kudi umu afananyi na mndu kanjipaaya se, kanjiwanza.

¹⁹ Kahamba, “Iyo mndu umkunde mnu, kulaowuo; ofoṟo lukae na iyo, kaa na pfinya, yee, wada pfinya.” Adeda na inyi ngawada pfinya, ngahamba, “Hoi Mndumii-Ruwa oko, nakudedie; kipfa anjiwika pfinya.”

²⁰ Nalyo kanjiwesa, “Nomanya kitewe ngakuchea? Na wulalu kinjiwaṟi njiwuye na ikapana na msu mringi o Persia. Nduma ngamembinga, msu mringi o Ugiriki nechicha.

²¹ Kyaindi njechikumanyisha shilya shishiṟehie kiidi kya Kitapu kya wulohi. Kuwode mndu echiidima injitarama iwinza wanduwa sile nyi Mikaeli, msu mringi onu-pfo.”