DANIELI 1 - Bibilia Kui Mdedie fo Kimochi

Wanake Mengenyi ya mangi Nebukadneza

¹ Maka fo kaṟaṟu fo wuchili wo Yehoyakimu, mangi ya Yuda, Nebukadneza, mangi ya Babeli nyi alehenda Yerusalemu kafuwinza.

² Mndumii-Ruwa kawika mangi Yehoyakimu mangi ya Yuda mawokonyi hake, hamu na shindo maata sha mba ya Ruwa sa aleshiwada mdeho, kashiduo mṟasa oruka lo Shinari, kashiṟika kulya mmbenyi ya ruwa oke.

³ Mangi kawia Ashepenasi awei mnzenge naende wanake maata wa Israeli, wa oshari lo mangi na wa oshari lo njama tsa mangi.

⁴ Wanake wa kisoṟo walawode paṟi manya ngoru, wecha piu, wawode shaamu shicha, waṟango, wenyi wulaanyi, wawode wuhidi, waloshe, wenyi sonu njicha, wechiidima ihoṟoka kiidi kya mba ya mangi; kiidima walosho mbuka tsa Wakalidayo na kishomo kyawo.

⁵ Kyasia mangi iya ikawawasa ke wainengo kelya kya mangi na mvinyo fulya ekenyo handu ha maka iṟaṟu, numa waendose ko mangi.

⁶ Kyasia kiidi kyawo kuwewode wana wa oshari lo Yuda: Danieli na Hanania, Mishaeli na Azaria.

⁷ Kyasia mnzenge ulya mnene kawadumbuya marina kalaha Danieli Belteshaza na Hanania kamlaha Shadraka na Mishaeli kamlaha Meshaki na Azaria kamlaha Abednego.

⁸ Indi Danieli kadumbuo mrimenyi foke ke echikuwasha na kelya ang'u mvinyo fo mangipfo kundu nalakufanyitse ngafu. Katerewa mnene ulya mnzenge nakumnengie momu.

⁹ Kyasia Ruwa kawonesia Danieli iidikio na ikundika ko mnene ulya.

¹⁰ Mnene ulya kawia Danieli, inyi njiowoye mangi ai mndumii oko ichu alewawasa kelya kyanu na mvinyo fonu, kechiwa kida ilindi echiwona shamu shanu shilashisunuhutsu na njoshangu tsanu tsilai njicha, muwonyi ke inyi njechiwutio kindo kiwicho? Na njiwuteho iwoho kipfa kyanu?

¹¹ Naho Danieli kawia ulya mohoṟokia ai mnene o mnzenge alewiko kipfa kya Daniel, na Hanania, na Mishael, na Azaria,

¹² Hoi lokuterewa uluheshe so wasinga wapfo handu ha mkonu ikumi uluinenge mboha lulye na mṟinga lunyo.

¹³ Numa noambuye shamu shadu uṟinganyishe na walya wailya shelya na inyo kilya mangi aleluwawasia uluwutie kilya ochiwona kekuchihiya.

¹⁴ Kawaidikia kawahesha handu ha mfiri ikumi.

¹⁵ Mfiri iya yekisia shamu shawo na njoshangu tsawo tsikachia na iila na mbihu yawo ikanuo necha kota walya wengi walelya kelya kya mangi.

¹⁶ Kyasia mnene ulya kawutaho kilya kyawo kawainenga mboha na mṟinga tupu.

¹⁷ Kyasia kui mbonyi tsa wanake wo waana Ruwa kawainenga wuṟango, wulaanyi; Danieli kawa menyi wuṟango wuidie womanya mawonesio na itambahaluo ndodo.

¹⁸ Mfiri iya yekisia iya Mangi aweteṟie, mnene ulya mnzenge kaende wanake walya oshangunyi lo mangi Nebkadneza.

¹⁹ Mangi kadeda nawo. Kiidi kya wose kuwode walewonekaho wawei cha Danieli, Hanania, Mishaeli na Azaria pfo. Ko ikyo wakahoṟoka oshangunyi lo Mangi.

²⁰ Orio kindo kya wulaanyi na wuṟango mangi alekiwesa wakawoneka ke wo nyi waichi ngoseṟa ka ikumi kota wahanga na walaanyi wa mangi.

²¹ Kake Danieli cho kakaapfo mṟasa maaka fo kuwoka fo mangi Koreshi.