AMOSI 9 - Bibilia Kui Mdedie fo Kimochi

Ruwa ahoṟwo

¹ Njilewona Mndumii ahoṟoki kufui na kitaṟa kyedasya, kahamba, kapa mdo ya ngo itane ngiṟi tsadihina; nowefunja mdo ya ngiṟi tso shiteeno shiteeno; inyi njechiwaaha mndu owo mfurumi kui oshu, kuwode ma umu owo echidicha ang'u umu owo echikiapfo.

² Manya kokoya wasuma marina wasoke ko wapfu, owoko loko lochiwaonduopfo; kokoya wado na huye mṟasa mapuchinyi inyi njechiwasotsapfo.

³ Wakaowa alya kitoonyohu kya fumvu lya Karmeli njechiwashiha njiwaonduo ho; kokoya wawechiwona mkuachie ipalyipalyinyi kundu kuṟungukie mnu, njedikapfo molyimo fuwaimade.

⁴ Nawo wakadao wapfunge oshangunyi lo wakituwa wawo njechidika oshu luwamarise dang'a; njechiembeṟutsa meso hako njiwawutie mawicho tupu chi mechapfo.

⁵ Kipfa Mndumii-Ruwa menyi matorito nyio ekepaaya oruka, lukasalaa, iwo waipfo wakakapa kilio; nalo lochikure loose cha Meda lochiekase cha Meda fo Nili fo Misri.

⁶ Nyio akewika shiṟiha shayo ruwehu na isuma otende lo mlemeko wuyana; nyio ekelaha mṟinga fo ipalyipalyi, na ifuletsya wuyana. Mndumii nlyo rina lyake.

Isayo numa ya inyamaṟo

⁷ “Ngesa! Nyo chi kimu na wana wa Kushi koko inyi, lanye wana wa Israeli, Mndumii ahamba? Alewo, njiledosa Waisraeli wuka orukenyi lo Misiri, na Wafilisiti wuka Kaftori, na Washami wuka Kiri?

⁸ Ambuyenyi meso ha Mndumii-Ruwa haiambuya wumangi wuwode wunyamaṟi, na inyi njechiwurumatsa wuuke oshangunyi lo wuyana, kya indi njechirumatsa piu mba ya Yakobopfo.” Mndumii ahamba.

⁹ Kipfa, ambuyeny iwawaso na inyi njechiela mba ya Israeli kiidi kya mkambo fo wandu cha ili mndu aiela mbeke, indi kuwode mbeṟeheke manya imu yechioloka wandapfo.

¹⁰ Wandu wose wanyamaṟi kiidi kya wandu wako wechipfa kui oshu, iwo wekehamba ke kuwode kindo kiwicho kechilukooya numa manya kusonguopfo.

¹¹ Mandi ho njechiira se kiwanja kya Dawidi kilya kiolokie na iṟundya handu halya hawewundukye; na inyi njiiriye njomombo tsilya tsake tsiwehoye njitsilauo cha kuwooka;

¹² wahende ikolonyia mtsuhaṟo fo Waedomu, na wandu wa mkambo wose waiwasende kui rina lyako Ruwa ahamba mowuta isho.

¹³ Ambuyenyi, kukaa kuche kiheri, Mndumii ahamba, sa icho modema nakooye ichu mosambuo, mokama zabibu nakooye mowaaya mbeu; na mafumvu hetonyitsa mvinyo foeloda, na shitoṟomoso shesalaa.

¹⁴ Na inyi njechiwuya iwihiṟa wandu wako Israeli walya walesamiṟo, Walawuo mṟi iya iledeo mrapu na idema-se madema halya ha msabibu na inyo mvinyo, wechisungusia shyahu na iwaaya ndunda tselio.

¹⁵ Na inyi njechiwawikya ona na kuwode kewapaaya sepfo, wechikaa oruka lulya lowo ndewainenga nyi Inyi Mndumii-Ruwa opfo ngahamba.