AMOSI 8 - Bibilia Kui Mdedie fo Kimochi

Kiwonesio kya kaana: Kikunja kya ndunda

¹ Ishi nsho alenjiloṟa Mndumii-Ruwa; ambuya kikunja kya ndunda tsa kuari.

² Kanjiwia, “Amosi, nkiki uwonyi?” Ngahamba, “Njiwonyi kikunja kya ndunda tsa kuari.” Nahong'u Mndumii kanjiwia, Mtsitsionyi fo wandu wa Israeli foshika; njechiwasaṟia-se manyalepfo.

³ Shiimbo shawo sha Hekalunyi lyako shechiwa kilio maheri halya, Mndumii-Ruwa ahamba, mnying'a yechifo, wechiikumba orio handu, watsie sau.

⁴ Adanyienyi, iki, nyo mukundi imeṟa walya wahuṟi na iowesha wakiwa wa orukenyi,

⁵ moihamba, Nyi indii meri mhya fowoneka, kundu lukumbe mso? Na sabato kundu lusanye ngano? Mochifafaṟa efa na iengeṟa shekeli Mochilemba wandu na wueri wulashikie

⁶ Kundu luidime ihuṟa wakiwa kui fesa, na wahuṟi kui mṟae fo shaadu; luwekumba mbosha ya ngano.

⁷ Mndumii nyalya nyamu kui kiṟumi kya Yakobo, Nyi kya lohi njechihadima iṟunda lyawo ma limupfo.

⁸ Kipfa kya ikyo, ngesa oruka lochidedema, na waipfo wechikapa kilio? Ee lochikupaya cha Meda; lochilya wukiwa na ieka cha Meda fo Misiri.

⁹ Na Mkonufo Mndumii-Ruwa nahamba njechihaluo mnengeṟi fuolokie mfiri makidi hawi, na njechikumbia meema kiheri kya ngeela ya mfiri.

¹⁰ Na inyi Njechihaluo mfiri yanu nnene ya sia iwe ya shilio na shiimbo shanu naawo shiwe kilio; mochiṟaa masaṟa shitsinyi shose, mbewika njohaa huye ya orio mdo; njechiende ishi shose shiwe kilio kipfa mana kimumu na ifurumia cha kiheri kya mawawio.

¹¹ “Ambuya mkonu ikeri icha Mndumii-Ruwa ahamba, njechiende njaa orukenyi, chi njaa yetuṟa kandopfo, na nyoda yetuṟa mṟingapfo, indi nyi yetuṟa iicho madedo ha Mndumii.

¹² Nawo wechiṟahaṟaha wuka ipalyipalyi itane ipalyipalyi; na wuka ora lo mtsudu na lo ngamenyi; wechiwika mteeṟa ipfo na ipfo, wechishiha idedo lya Mndumii walechiliwona.

¹³ Maheri ho wana wa waka wecha na wanake wechiuma na iomboka kipfa kya nyoda.

¹⁴ Na iwo wekelya nyamu kui wunyamaṟi wo Samaria, na ihamba So Ruwa opfo ai na moo iyo Dani na so njia yapfo iyo Beer-sheba, nawo wechioloka, walechiidima se ikure.”