AMOSI 7 - Bibilia Kui Mdedie fo Kimochi

Kiwonesio kya mwanduye Kiwonesio kya kuwoka: Nzihe

¹ Ishi nsho Mndumii-Ruwa alenjiloṟa, ambuya, nalewika nzihe mawookyonyi ha ialuka lya kilimu kiheri kya fuli; ambuya iwekeri kilimu kiheri kya fuli mangi amemaa isambuo.

² Kikawa, kiheri nzihe tsamemarisa ilya mara halya mawishi ha orukenyi ngahamba, Hoi Mndumii-Ruwa hooṟia, ngakuterewa; Yakobo nechihoṟoka ada? Kipfa nai mtutu.

³ Mndumii kailacha mahiyo ha kindo kilya awerie iwuta kahamba njechiwutasepfo nyi Mndumii ahamba.

Kiwonesio kya kawi: Modo

⁴ Ishi nsho Mndumii-Ruwa alenjiloṟa; ambuya Mndumii-Ruwa nalelaha kundu nalimbane na modo; nafo fukakomba mṟinga fui mapichinyi ha mapalyipalyi kufui furumatse handu hahadutsu.

⁵ Nalyo ngahamba, Hoi Mndumii-Ruwa leka, ngakuterewa; Yakobo nechihoṟoka ada? Kipfa nai mtutu.

⁶ Mndumii kaweda-se na ilyi kahamba mbonyi tsi njechiwutasepfo, nyi Mndumii ahamba.

Kiwonesyo kya kaṟaṟu: Orusu lomasa iho litutu (Timazi)

⁷ Ishi nsho Mndumii alenjiloṟa, ambuya, Mndumii nahoṟoki kufui na omombo lo mba luiwiko nawode orusu na kindo kii cha kipiṟinyi kya menya kehoṟotsa mba owokonyi loke.

⁸ Mndumii kanjiwia, Amosi, kiki kuwonyi? Ngahamba, Njiwonyi kipiṟinyi. Nlyo Mndumii kahamba, Ambuya njechiwika kipiṟinyi na orusu kiidi kya wandu wa, njechiwada-se manyalepfo;

⁹ na handu hakuirie ha ko Isaki hechiwa ngafu; na handu haele ha Israeli hechinyamaṟika; na inyi njechikure njilimbane na mba ya Yeroboamu kui oshu.

Amosi na Amazia

¹⁰ Nalyo Amazia, mkohanyi o Beteli, aledikya Yeroboamu mangi ya Israeli ndumi kehamba, Amosi nalekuṟiingia iyo na mba yapfo na Israeli yose; orukalu loidima ikarishiya madedo hake hose-pfo.

¹¹ Kipfa Amosi nahamba adi, Yeroboamu nechipfa ko oshu, nankya lohi Israeli nechidao ampfunge lang'u, nawuto orukenyi loke.

¹² Na Amazia kawia Amosi, O iyo malya wona, kure aa, dichia oruka lo Yuda, ulyiiepfo mkate, uhende iduopfo wuikimbi;

¹³ ulakooyo ochihamba kisuku kunu Beteli; kipfa nyi handu haele ha mangi nayo nyi mba ya wumangi.

¹⁴ Nalyo Amosi kahaluo kawia Amazia, “Inyi njilemewe mwikimbipfo, manya mbei mana o mwikimbipfo; mbei mlisi o shuuma na moambuya mkuyu.

¹⁵ Nao Mndumii kanjilaha ngaidikya ndaho yake kanjiwia, “Henda ikimbia wandu wako Israeli.

¹⁶ Wulalu adanyia idedo lya Mndumii. Iyo nohamba, Ulaikimbe kya Israeli, ang'u ulawute idedo kiidi kya mba ya Isaki;

¹⁷ Ko ikyo Mndumii nyi ahamba adi, Mka opfo nyechiwa mmeluki na mṟuhui mṟinyi, wana wapfo wa kika na wa kiumi wechiwooho nyi oshu, na dema lyapfo lyechihawo kui shiwoho-kyahu kui kyahu; na iyo kumonyi nyi ochipfa orukenyi lo ngafu; na kya lohi Israeli nyechidao kuleshe ai mpfungo awuka orukenyi loke.”