AMOSI 6 - Bibilia Kui Mdedie fo Kimochi

Ihoṟoyo kipfa ke kuidikisha

¹ Ochia lowo iwo wakeri ikyeseka na ichihiyo kiidi kya Sioni na iwa wakeri olelenyi ipfo fumvunyi lya Samaria, wandu wang'anyi kiidi kya oshari lo wandu wa mbooko iwo mba ya Israeli yekewahendia.

² Idenyi itane Kalne, muwone; hendenyise Hamati ing'anyi, sokenyi itane Gati ya Wafilisti; ngesa nyo mui wecha kota mangi tsi? Ang'u mṟasa fowo fung'anyi kota mṟasa fonu?

³ Nyo muwikie mkonu fo fung'anyi mbicho haleshe, na ikuruo hafui kidembo kya wutahachi;

⁴ ochia lonu nyo mukelaa shitaṟenyi shishiwike membe na ikuhoṟoya shitaṟenyi shelaho semadari; nyo mokelya huṟuwi na mahache ha mfiṟihenyi;

⁵ nyo mokeimba shiimbo sha wutondo hamu na maṟu ha shinanda, na isungusia shinanda sha mbaṟi tsiingi cha shinanda sha Dawidi;

⁶ nyo mokenyo mpfinyo na mamboṟiko, na ikushia mafuda ha opfaamo lui lucha; indi walasokyo mfowa kipfa kya matuuro ha Yosefu?

⁷ Wulalu kipfa kya isho wulalu wechihenda wusingenyi hamu na walya wa kuwooka wechihenda wusingenyi, na kifahiyo kya temo kya iwo walekuhoṟwo kechitsitsa.

⁸ Mndumii nyalelya nyamu yake, so Ruwa Menyi Matorito; Ngamina kiṟumi kya Yakobo, ngasuiṟo nyi mamba hake; kipfa kya ikyo, njechiwutaho mṟi fo hamu na wose waipfo.

⁹ Na kyo kokoya kotsuhaa ho wasoṟo ikumi kiidi kya mba imu wechipfa.

¹⁰ Na washidiye o mndu ili echimiira, ulya akoṟie modo, kundu nawute mafuo hake, kanyi, na ulya ili echiwia ichu ai ora lo kya mba, “Ngesa na kui mndu oose oo?” Na kamhaluo wai ote; nlyong'u echihamba, Tsia sau; kipfa luwode momu fosenda rina lya Mndumii-pfo.

¹¹ Kipfa ambuya, Mndumii nawuta iwawaso; mba ing'anyi yechikapo na iwunduyo na mba ntutu yechikapo ipaṟikye mahinga.

¹² Alewo! Frasi wewikya mteeṟa huya iṟaṟa Alewo! Mndu nechiidima idema na ikumbi lyekekuruo nyi mbe mṟingenyi? Wulalu mohaluo kilya kisumhanyi kipfuṟi na ndunda tsa wulohi tsikawawa.

¹³ Nyo mokechihiṟo nyi mbonyi tsa maai, mokehamba, Ngesa chi lulekuwonyia membe kui pfinya tsadu so luwenyi?

¹⁴ Kipfa, ambuya, njechiamtsa wandu wa mkambo huye yapfo iyo mba ya Israeli, Mndumii-Ruwa menyi matorito ahamba, wo wechimlisa wukiwa wokia kichumi keida na Hamati mṟasa kimeda kya Araba.