AMOSI 5 - Bibilia Kui Mdedie fo Kimochi

Kifihiṟo kya Amosi

¹ Adanyienyi idedo lyi njikeri ilihamba liwe kifuhiyo na imsotsia fowa, nyo mba ya Israeli,

² Mkeha o Israeli naomboka; echiidima ikure-sepfo; Naombotso kiidi kya oruka loke; kuwode mndu momiiriapfo.

³ Kipfa Mndumii-Ruwa nahamba adi; Mṟi fuwode wandu kiku, fochitsuhaṟio wandu ihana limu, na mṟi fuwode wandu ihana, fochitsuhaṟio wandu ikumi, wa mba ya Israeli.

⁴ Kipfa Mndumii nawia adi wandu wa Israeli, Njishihenyi inyi, nanyo mochikaa na moo;

⁵ manya mlashihe Betheli; ma mulaide Giligali manya mlaide Beeri-sheba, kipfa Giligali kii lohi yechidao wusingenyi, na Beteli yechiwa wulya.

⁶ Shihenyi Mndumii nanyo mochikaa na moo; nalawone kechiaka cha modo ipfo kanyi ko Yosefu, modo fukarumatsa, kulechikaapfo mndu echiidima ifurumisha ipfo Beteli.

⁷ Nyo mokehaluo njowingo tsikawa njiwawo, na iembeṟutsa wukiilohi,

⁸ shihenyi ulya awikie Kilimia na Orioni, na ihalutsa kiṟinje kya opfu iwa ngamenyi, na ihaluo mfiri fuwe meema fuwe kio; ichu aidima ilaha mṟinga fo ipalyipalyi, na ifuletsia wanda terinyi; Mndumii nlyo rina lyake;

⁹ ichu aidima iende orumatso peṟeseng'u kiidi kya wandu waapfinya; itane orumatso loolotsa omombo lo mba.

¹⁰ Wo wasuo ulya modedia ai mongonyi, nawo-da weketoromisha modeda ki kicha.

¹¹ Kyasia kipfa kya ili mokewonyia mkiwa, na imsoka ngano yake; nyo muwikie mba tsa maho matsane, indi mochikaapfo-pfo; mudemiye madema mecha ha msabibu, indi mochinyo mvinyo fo fopfo.

¹² Kipfa njiichi chando mawicho hanu hafoi, na chando wunyamaṟi wonu wung'anyi; nyo mokewonyia wenyi wusumhanyi, mokeambya shetsutsuma, na ihaluo walya wahuṟi oo mongonyi walawone kilya kiwasumhanyi.

¹³ Kipfa kya ikyo mndu ulya mṟango nechitsia sau akeri cha iho, kipfa nyi kiheri kiwicho.

¹⁴ Shihenyi mecha, manya chi mawicho pfo, mukae na moo; kundu Mndumii-Ruwa menyi matorito nakae kiidi kyanu chando muihamba.

¹⁵ Suonyi mawicho; kundenyi mecha; ukiilohi wuwe kyooṟa mongonyi, kulako Mndumii-Ruwa menyi matorito, kyechiwutia mecha walya watsuhaa wa Yosefu.

¹⁶ Kipfa kya isho, Mndumii-Ruwa menyi matorito ahamba ichu ai Mndumii; Kochiwada kifuhiyo kiidi kya njia tsing'anyi tsose, nawo wehenda wechihamba, Ochia! Ochia! Wechilaha mndu mdemi nache nakape kilio, na iwo waichi ifuha wakape kilio.

¹⁷ Kingise Ipfo mademenyi hose ha msabibu kochikaapfo ifuha, kipfa inyi njechiida makidi hawi hapfo-nyi wudo Mndumii ahamba.

¹⁸ Ochia lonu! Nyo muilanga mfiri fo Mndumii nkili muilanga mfiri fo Mndumii? Nyi meema chi sapfo.

¹⁹ Nyi cha mndu aledichia miiso, kakoyana na ngaṟe, ang'u mndu aleida na mba kawika owoko loke mawandenyi, kaimado nyi njoka.

²⁰ Ngesa mfiri fo Mndumii fochiwa meema, ma chi saapfo? Ee, fuwode mema puti, ma kuwode ngeela-pfo.

²¹ Inyi njisuo mkonu yanu inene, njiiminyie, njimchihiṟe nyi shisanzyo sho shanu sha wuindipfo.

²² Ee, ma chando muinjiwutia mwaano yanu yemaya modonyi na ya mso yanu, njechiiambyapfo; ma njechiambya mwaano yanu ya ofoṟo na ya shuuma shinorupfo.

²³ Irenyi iya kifahyo kya shiimbo shanu; njilakundi iicho ṟu lya shinanda shanu.

²⁴ Indi mwanduye fusoke cha mṟinga, na ukiilohi cha mṟinga fufoi.

²⁵ Ngesa namlenjiendie mwaano na shidaso kulya nuka maaka iya makumi haana, nyo mba ya Israeli?

²⁶ Ee, mochiduo Sikuthi mangi yanu na Kiuni Sanamu yanu, nyenyeri ya ruwa onu, mulemsungusia muwenyi.

²⁷ Kui kipfa ikyo njechimsamiṟa mui wapfungo, muhende kuleshi muide Damesiki, Mndumii ahamba, ichu elaho nyi Ruwa menyi matorito.