AMOSI 4 - Bibilia Kui Mdedie fo Kimochi

¹ Adanyienyi idedolyi nyo mbe tsa Bashanyi, mokekaa fumvuhu lya Samaria, mukawonyia wakiwa, na ikapa walya wahuṟi; mokewia wasoṟo wawo, Wulalu endenyi, lunyo.

² Mndumii-Ruwa nalya nyamu ya Wuele woke ke, ambuyenyi kochicha mkonu muwuto na kimenya kileme cha kedeha makunga kiidi kya oruka, walya watsuhaa wamaso na menya yedeha ikunga.

³ Nanyo mukure kundu kukuwunduo, nalyo orio mndumka limu ko limu naide kedicha; nanyo mukukumbe Harmonyi, Mndumii ahamba.

Israeli yamekusayepfo

⁴ Njonyi Beteli, muwute wunyamaṟi njonyi Gilgali, muengeṟe? Einyamaṟa endenyi shidaso shanu orio ngamenyi, na mwano yanu orio mfiri fo kaṟaṟu,

⁵ wutenyi shaano shanu, ya kilya kikiwikye mtarang'ao; muonguo mwano mulewuta kui ikunda lyanu na ihamba kyatso; kipfa ikyo kimuchihiṟye nyo, lanye wana wa Israeli, Mndumii-Ruwa ahamba.

⁶ Na inyi njilemuinenga wuili wo maheho kiidi kya mṟi yanu yose, na iwu? A mkate handu hose; ma kudo mulenjiwuuyapfo Mndumii ahamba.

⁷ Kingise ngaweima mvuo ilakape, kutsihee meeri iṟaṟu mulamesambuo; mvuo ikakapa mṟi fumu, ngaweima mvuo ilakape mṟinyi ingi; ora lumu lukawona mvuo na ora lungi lukawuṟa lukauma.

⁸ Nahong'u kuwuka mṟi iwi iṟaṟu waleṟahaṟa ihenda mṟi fungi wanyo mṟinga, walawone fuwashikie; ma kudo mulawuye na koko, Mndumii ahamba.

⁹ Na inyi ngawemukapa na wuumu wo kwaari; madema hanu ha msabibu na mkuyu njicha na mashidi ha msinepfu shose shikalio makuṟu na nzihe, mulakunde ihaluka munjiwuuye, Mndumii ahamba.

¹⁰ Ngamudikya ndaṟe njiwicho ya nda tsa makokoi yelaho “Taunyi” cha taunyi ya Misiri; wanake wanu ngawawaaha na oshu, na frasi tsanu ngatsiduo haleshe; ngadika mdao fo mnying'a njiporu muipfaamye na mbuo tsanu; mulakunde ihaluka munjiwuuye, Mndumii ahamba.

¹¹ Maata wanu ngawaarisya wanda, cha kiheri kilya Ruwa alekombetsa Sodoma na Gomora, nyo mukawa cha menya ilewuto modonyi, mulakunde ihaluka munjiwuuye, Mndumii ahamba.

¹² Wulalu, nyi udi njechikuwutya, Iyo Israeli; kipfa njechiwuta njido-le, kuṟeheṟe iwonana na Ruwa opfo, Iyo Israeli.

¹³ Kipfa, ambuya, icho awikye mafumvu na iumba otanu, na iinenga mndu o wandu makusaṟo hake, awikie mfiri na kio, kawechuma wuyanawu handu hakuiriye; Mndumii, Ruwa menyi matorito nlyo rina lyake.