AMOSI 3 - Bibilia Kui Mdedie fo Kimochi

¹ Adanyienyi idedo lyi Mndumii alehamba kyanu, nyo wana wa Israeli, kiidi kya oshari lonu loose njilemdosa wuka orukenyi lo Misiri, njehamba.

² Nyi nyo tupu njilemumanya kiidi kya wandu wa mkambo ya wuyanenyi kose; kwi kipfa ikyo, njechimuwuwuya manyamaṟo hanu hose.

Kihuri Mwikimbi

³ Ngesa wandu wawi wechiidima ihenda kimu walaidikyanyi?

⁴ Ngesa miiso fochipoṟohoṟa ngaṟenyi fulawode kindo kelya? Mana o miiso nyechiringona opangenyi loke alawode kindo awona?

⁵ Ngesa, kilehe kechioloka mdehonyi kulawode kindo kedeha? Mdeho fochidehuka, fulawada kindo.

⁶ Ngesa, ombe lochikapo mṟinyi, wandu walechiowuo? Mṟi fochiwona ngapo, ilanjiende nyi Mndumii?

⁷ Nyi kya lohi kya ndiyo Mndumii-Ruwa echiwuta kindo kyose alaloṟa waṟundi wake waikimbi kiṟikyekyo kya kyaanyapfo.

⁸ Miiso fompoṟohoṟa, nyiu alechiowuo? Mndumii-Ruwa amededa nyiu aidima ideda shile nyi ihamba kisuku?

Orumatso lo Samaria

⁹ Onguonyi mbonyi kiidi kya mamba ha Ashdodi, na kiidi kya mamba ha oruka lo Misiri, muhambe, Kuwumbyenyi huye ya mafumvu ha Samaria, ambuyenyi nyi mtiṟi ing'anyi cha iki iipfo, na mawicho hang'anyi cha kiki hafoipfo.

¹⁰ Kipfa waichi iwuta shilya shisumhanyipfo, Mndumii ahamba iwo wawikiye kisa kya wusoki na wulang'a ipfo mmbenyi tsawo.

¹¹ Kyasia, iha nyiho Mndumii-Ruwa ahamba; kochiwada mkituwa natengetie oruka njora tsose; nao nechisoṟowitsya wanda pfinya tsapfo tsose tsikuwuke na mamba hapfo hechiwado shidenyi.

¹² Iha nyiho Mndumii ahamba, chando mlisi ekesoka miiso madende hawi dumbunyi lyalyo, ang'u ngamra ya kudu; nyi wudo wana wa Israeli wechiwutyo iwo wai Samaria na shitaṟenyi shicha sha semadari, na huye ya handu hehekekya mdo.

¹³ Adanyienyi muṟingishie kya mba ya Yakobo, Mndumii-Ruwa menyi matorito ahamba.

¹⁴ Kipfa mkonu fulya njechiwuwuya manyamaṟo ha Israel njechiwuwuya rasionyi tsa Beteli, na ndumba tsa rasio tsemanyo manyo tsose na ioloka wanda.

¹⁵ Inyi njechikapa mba tsa kiheri kya mbeo hamu na mba tsa kiheri kya kwari, mba tsinjiwike na membe tsa njofu tsesaramaya, na mba tsing'anyi tsechitsitsa, Mndumii ahamba.