AMOSI 2 - Bibilia Kui Mdedie fo Kimochi

Moabu

¹ Iha nyiho Mndumii ahamba; Kwi madeko haṟaṟu ha Moabu, ee, kipfa kya haana, njechiima nyashi yako ilechimhoyapfo; kipfa nalekoṟa modo mafuo ha mangi ya Edomu mtano hawa ifu lyiili,

² Kyaindi njechidika modo huye ya Moabu, nafo fochirumatsa mamba ha Kerioti; na Moabu nyepfa kipfa kya mtiṟi, na kifahiyo kya maṟu ha membe.

³ Na inyi njechiwutapfo walaanyi na wachili wawuke kiidi kyawo; njiwewaaha wasongoru wose kiidi kyawo, ikyo Mndumii ahamba.

Yuda

⁴ Iha nyiho Mndumii ahamba; Kwi madeko haṟaṟu ha Yuda, ee, kipfa kya haana, njechiima nyashi yako ilechimhoyapfo; kipfa waleleha chila ya Mndumii; manya walewada wuwawaso wokepfo; madedo hawo ha wongo halewadetsa, iho wandeawo walehaosha;

⁵ kyaindi njechidika modo huye ya Yuda, nafo fochirumatsa mamba ha Yerusalemu.

Mwanduye fo Ruwa huya Israeli

⁶ Iha nyiho Mndumii ahamba; Kwi madeko haṟaṟu ha Israeli, ee, kipfa kya haana, njechiima nyashi yako ilechimhoyapfo; kipfa walekumba walya wasumhanyi kwi fesa, na wahuṟi kwi mṟaaye fumu fo shaadu;

⁷ wakawefola-fola kiluli kikeri mdohu fo wakiwa, na idetsa ohendo lucha lo wai wahoo; mndu na ndee wakawekaa na mndumka umu, itane rina lyako lyafana ngafu nalyo lyi Yele;

⁸ wo wekelaaya nguo tsilya wandu walesoko, na ipfo rasionyi lya ruwa owo inyo wekyenyo olea luiluhuṟe na fesa tsilya tsilewoneka ipfo kikumbyonyi kya wandu.

⁹ Ambuya, inyi njilewerumatsa Waamori oshangunyi lowo, ichu awei mleshe cha mweresi, nawewode pfinya iṟihishye cha mwalonyi; kamkuṟuo cha ili uikuṟuo ikidi na mri yalyo.

¹⁰ Ngoseṟa njilewadosa wuka orukenyi lo Misiri, ngawateteṟa maaka makumi haana kulya nuka, kundu mwitoṟie oruka lo Mwaamori.

¹¹ Ngawewuta wandu kiidi kyanu kiidi kya wana wanu wawe waikimbi, kiidi kya wanake wawe wewika kyaasa chi wudo nyo wana wa Israeli? Ikyo nyi Mndumii ahamba.

¹² Indi muleinenga walya waele watengo mvinyo wanyo; mukawia waikimbi walya, mlawone moihamba shisuku.

¹³ Ambuyenyi, njechimulemya, chandu igari lyekyelemio nyi mkunja kulawonekeho mwanya.

¹⁴ Na icho aidicha ekooya kidichionyipfo; Manya icho aichi ikapa mteeṟa pfinya yake yesia; Ichu akuhodye echiidima ikiṟa moo fokepfo.

¹⁵ Ichu alemye wuda echihoṟokapfo; Manya ichu awode madende maangu ekiapfo; modoya frasi echikiṟa mrima fokepfo;

¹⁶ Na ulya awode ngoo njikari kiidi kya wandu wai mbahanyi, nechidicha kitaaṟe mkonu fo, nyi Mndumii ahamba.