3YOHANE 1 - Bibilia Kui Mdedie fo Kimochi

¹ Inyi mmeku ngakuiṟikiṟa iyo mkunde oko, Gayo, njikukundi njikukerye na kilya kiilohi.

² Mkunde oko, ngakuterewya ke kopfo kuchie kya shindo shose, nokae na oru chando mrima fopfo fukeri wuchenyi.

³ Kipfa ngamechihio mnu necha iliindi wanawawama walecha wakaṟingishya kya wuhendeli wopfo kya kii-lohi, chando iyo ukuwode na kilya kii-lohi.

⁴ Kulaipfo sia injichihiṟye kota ili ngaicho ke wana walya wako wakuwode na kilya kii-lohi.

Wuhendelyi wo Gayo

⁵ Mkunde oko, nyi owuta kya wuhendeli iki uipfuṟukanya nakyo wanawawama ma iwo wahenu.

⁶ Wo waleṟingishya mkundye fopfo oshangunyi lo siṟi ya iya. Kyawo ochiwuta kicha ili owasama chando kichihiṟie Ruwa.

⁷ Kipfa wambuka kanyi kimaduma kya iṟundia Kristo walechiambya kindo ko wandu walaidikye.

⁸ Nkyo kiluwaṟi itarama wandu wa kundu luwe nawo wa-kyando kya kilya kii-lohi.

Diotrefe na Demetrio

⁹ Njileṟehya siṟi paṟuo sa njifui indi Diotrefe ichu alakundi iwa mnene owo o akundi injiadanyia manyale-pfo.

¹⁰ Nkyo kitewe mandi njecha njechimkumbuṟa mawuto hake alehawuta kechiludeda na madedo ha wongo mawicho. Ma alakutsia naho; kada elekyeambia wanawawama wa, wai kyaṟonyi na walya wawekundi iwaambia kawewaima kawewafuna na nja ya siṟi.

¹¹ Mkunde oko, kulaoshe kilya kii kiwicho kya indi kilya kii kicha. Mowuta kii kicha nyio apaṟikye ko Ruwa. Mowuta kii kiwicho o alembone Ruwapfo.

¹² Orio mndu naiṟingishia kya Demetrio; na kiilohi kyo kikeri imṟingishia kii kyenyi. Naso luimṟingishya, na iyo uichi ke kiṟingishio kyadu kikeri lohi.

Shiiṟikiṟo shefurumia

¹³ Njiwode shifoi shekuwia, kya indi ngakunda ikuṟehya kui wino na kalamupfo.

¹⁴ Indi njikusirie iwonana na iyo mkonu fo afui ludede dumbu kui dumbu.

¹⁵ Kaapfo na ofoṟo. Wambuya wapfo wakuiṟikiṟa. Iṟikiṟa wambuya kui umu umu.