2 WAKORINTO 9 - Bibilia Kui Mdedie fo Kimochi

¹ Imṟehia nyo kya kitarama kilya kyetarama waele walya lyo liwewa ikapa lya kawi.

² Kyamba njichi mteseheṟye fonu fo chila njifukushelia njemhamba nyo ipfo ko Wamakedonyia, ke Akaya nyi iwekuṟeheṟye wokia mta fo wukowu na nyashi yanu ilemwamtsa wafoi kya mwengeṟia.

³ Indi ngamduma wanawawama iwa kundu ipfo kundo luwekushelye kipfa kyanu lulahoyo-ho sonu, kundu mukae-ho mukuṟeheṟye chando njilehamba.

⁴ Kundu manya Wamakedonyia wakacha warianyi na inyi wawemkoya mulakuṟeheṟye lulashike ipfia sonu so njikuringe ihamba muwechipfia sonu nyo kya mkusihie fu lufurie.

⁵ Nkyo kilenjinenga ihamba ke na kikaki na njitutume wanawawama iwa wasonguo ishike konu walawe ilaṟa necha mwaano fulya fonu mwoone fuwei mteṟye nyo kui kyasa wuka kacha, kundu fukae-ho fochiwedya ihenda dambiko fuwe mwaano mwoone fulawone fochiwa cha ishido lya wuikeremi.

⁶ Nyi kikeri kiile, ke ichu mowaya wotonokwo echisambuo wotonokwo, na ichu owaya wosaṟia echisambuo wosaṟia.

⁷ Orio mndu nalekie chando akudumbuya ipfo mdonyi kilawe nyi lya mnung'u ng'u kya mkoṟomu, kyamba Ruwa akundi mleki molekya na kyamu kilyi.

⁸ Nao Ruwa ai na pfinya yemfeṟya shanu sha mweena kya orio kindo mkonu yose mochihelukya orio ngata njicha yose.

⁹ Chando kii-kiṟehye, Nyi atomoke kainenga wakiwa, wucha woke wokaa mlungana.

¹⁰ Na ichu moinenga ichu mowaya mbeu moinengya mkate fuwe shelya echimuinenga mbeu na itsipfumbutsa na ifoeṟa echifeṟa maalutso ha wuhoṟotsu wonu.

¹¹ Mochisuṟisho mudo kya shindo shose muwute-ho ilekya na mawoko hawi kyewonya Ruwa mwaano mwoone kui mweke fodu.

¹² Cha kipfa wupfuṟukanyi wu wo odambiko ilu loindya Ruwa wo wulaiheluya waele sheluya moo isho washiwuṟye tupu, kya indi wufeṟye na Ruwa mfeṟa fo shyaano shifoi echiwikyo,

¹³ ipfo kundo wupfuṟukanyi wukeri wudi womshika imanyika wawuta-ho iṟumisha Ruwa kya wuhendeli wonu wohamba ndumi ya sia ya Kristo na kya mlungano fu mukuwodye nawo na wandu wose fuhoṟoki fudo.

¹⁴ Na iterewa wechimterewya wamuwodyo m maacha kya wutonga wo Ruwa wumpfumbukye nyo.

¹⁵ Ruwa nahende wikyo mwaano kya kisumbo kyake king'anye mdedye yose yekihamba.