2 WAKORINTO 8 - Bibilia Kui Mdedie fo Kimochi

¹ Indi lomwongoya le, nyo wanawawama, kya mwaano foana Ruwa fui-mdambike ipfo siṟinyi tsilya tsikeri ipfo Makedonyia.

² Cha kipfa msiha fowo fuwekuingikye fudi ipfo kundo wafoyo shihesho sha shiwira na wukiwa wowo mawowo shikafeṟa mfeṟa fulya fo wuleki wowo.

³ Ngawaṟingishya ke waweṟamkye ilekya kiidikyanyi na wuidimi wowo na kiwuidye.

⁴ Wakaitika iluterewa isanganyo mwaano fulya na kyaando kilya kepfurukanya waele.

⁵ Ma walawelekia njia iya luwekusihye, kya indi walesonguo ikudambikya Mndumii wo wawenyi na ikudambikya so kui chila ya Ruwa.

⁶ Nakyo kikaluenenga lomhenda itutuma Tito ke na mwaano fulya namarise ifusana na ipfo konu chando aweasye kyafo.

⁷ Na chando mukeri mdonyi kya shindo shose kiwe kya wuidiki kiwe kya wuongoyi kiwe kya wutichi kiwe kya wuidimi wucha wose kiwe kya wukundi wuwukye kodu shika konu, na wudo mukuwike mdonyi kya mwaano fo.

⁸ Chi ngadeda njidi njembikya iwawasopfo kya indi mtambahanye fulya fo walya wengi fukanenga lango tsehesha na onu lo mkundye fonu.

⁹ Kyamba muichi ngata ya Mndumii odu Yesu Kristo irie wutonga woke, nyi ili awei msuṟi adi kahenda haluka mkiwa, kundu nyo ipfo wukiwenyi woke mukuwutie-ho iwa wasuṟi.

¹⁰ Nyi ngatonga nakyo, kyamba iki kimwendye kiira nyo muwesonguo ikure mta fo wukowu chi kui iwuta tupupfo indi na kui ideda chila.

¹¹ Indi wulalu mumarise na iwuta lilya, na chando mteseheṟye fo chila iya fuweidikyanyi na shiya muwode, na imarisa lilya nalyo.

¹² Kyamba mteseheṟye fo chila kokoya fuiho nyi fuchihiṟye ipfo kundo kuwode kindo chi ipfo kundo kulawode.

¹³ Kihendeke kido chi kundu wengi wahende yanguyo nanyo muhende irohyo, kya indi nyi kipfa kya mng'ang'ana.

¹⁴ Oweṟe ilu lo wulalu mfoeṟa fonu fuire mbuṟye fowo kundu na mfoeṟa fowo fushike ihoya mwaanya foira mbuṟye fonu kundu mng'ang'ana fuwefo.

¹⁵ Na wudo ku-kuṟehye, Msa asanye shifoi naengeṟekyenyi, nao msa asanye shyangu nawuṟyenyi.

Tito na wodoe

¹⁶ Indi Ruwa nawikyo mwaano kipfa kya wuidimi wulya wulya alemwamtsya nyo ipfo ngoonyi ya Tito.

¹⁷ Ma awewedye nahede ai mbawasye, indi wuidimi wulya wumbodye kyanyo womwitika kawi kaira kyaṟo kyecha na konu awodo m macha.

¹⁸ Indi handu hamu nao nyi lukaduma manowama ulya msa ai mwichike siṟinyi tsose kehamba ndumi ya sia ya okiio.

¹⁹ Manya chi ikyo tupupfo, kya ind alesambuṟo nyi siṟi tso naduane naso kya mwaano fu fuipfuṟukanyo fudo nyiso kyewikya Mndumii mng'ano na imanyisha mkuteseheṟye fodu.

²⁰ Nyi wudo lukuringa ihenda iro wongo nyi mndu ma u kya osano lu luitambanyo nyiso lufo ludi.

²¹ Kyamba lokeitika ikumbuo kilya kisumuhana chi ipfo oshangunyi lo Mndumii tupu indi na ipfo oshangunyi lo wandu.

²² Indi monowama chu odu lomduma hamu nawo, nyio lulemkoya kafoi mndu mtambanyi kya shindo shifoi, indi wulalu awa mtambahanyi kawi akusirye nanyo adi.

²³ Kyasia kiwe kya Tito, nyio mokyaṟo oko na mokyando onu; kiwe kya wanawawama wadu wo nyi wadume wa siṟi tso wariyo nyi mng'ano fo Kristo.

²⁴ Kikashika oo mumanyishe mkundie fonu oshangunyi lo siṟi tso fuwe fochisumhanana kiṟumi kilya luweimhamba nakyo kowo.