2 WAKORINTO 7 - Bibilia Kui Mdedie fo Kimochi

¹ Kyasia-ng'u ili lui wateṟye shasa shidi, lanye wakunde, lukuheṟemtse so luwenyi kya ngafu yose iya yefanyitsa mbihu na iya yefanyitsa mumuyo lichiawutsya wuele lui na wuowu wo yowuo Ruwa.

Sia ya Paulo

² Luchinguṟuyenyi ngoo! Kwipfo lulemtahachyapfo, kwipfo lulemdetsapfo kwipfo lulemsoka kindopfo.

³ Ngadeda njidi njiwonye mndu owingopfo, kyamba njilemsonguo ihamba ke lumbode owide ipfo ngoonyi tsadu lutane lopfa handu hamu na ikukaya na moo handu hamu.

⁴ Njimukerye na wulalutsu wung'anyi, njikuṟumisha mnu kipfa kyanu; njiihutsu kiwihiṟya moo, njiichuo msiha fuidye mawawiṟo hadu hose.

⁵ Kyamba na mandi luwemeafukya Makedonyia mbihu fodu fulewona mwaanya fo yonyonyapfo kya indi luweiwawyo kose, ora lo nja mapfumu, ora lo mba maowu.

⁶ Kya indi Ruwa chu mowihiṟya wanyonge moo aleluwihiṟya so moo kui icha lya Tito.

⁷ Indi chi icha lyake tupu liweluwihiṟye moopfo kya indi nyi kipfa amcha ai-mbihiṟye moo kipfa kyanu kechiluongoya kya macha hanu hambode na kya shyeṟeṟo shanu na kya mtambahanye fonu fonjitambahanya kikantana ngawuya henda ichihio.

⁸ Ma kikawa ndemusotsya fowa na paruo iya ndahambe samanya, ma kokoya njiwehambye njido cha kipfa njiwonyi ke paruo iya ilemsotsya fowa na kikawa nyi kya kidempfu.

⁹ Wulalu na ngachihio chi kipfa mulesotsyo fowa, kya indi nyi kipfa mulesotsyo fowa tsiende idumbuya; kyamba mulesotsyo fowa tsiinjiamtse nyi Ruwa kundu mulawonyo kihutsa kiwukye kodu.

¹⁰ Kyamba fowa tsi tsii njamtse nyi Ruwa tso tsiende mdumbuye fowika-ho okiṟo fulai na samanya; indi fowa tsii njiamtse nyi wuyana wu tso tsihendende opfu.

¹¹ Ambuya isotsyo fowa tsii njiamtse nyi Ruwa lyo nyilyo lilemṟamtsya mtambahanye apa chando fung'anyi na mwanduye nafo na mkuṟukye fo sonu na wuowu na macha na wurahari na wudeheli. Momekumanyisha muwenyi kya shindo shose ke mui wakeha kya mondu fu.

¹² Kyasia-ng'u ma kikawa njilemṟehya nyo baṟuo iya chi ngameiṟehya kimaduma kya motahachya ulya ang'u kya motahachyo ulyapfo, kya indi nyi kundu kumanyikye ipfo konu ke nyi muwodo mnu kyadu so oshangunyi lo Ruwa.

¹³ Nakyo nyikyo kyamnenga lomhennda iwihiṟyo moo. Na ipfo kundo so lumhenda iwihiṟyo moo kulemshika yengeṟyo-ho kiluchihiṟa lya wueṟa nyi ili Tito ai mchihiṟe adi kipfa dima lyake lii idamiṟe n nyo mose tsee.

¹⁴ Ma kokoya kuwewode kindo njiwekushelye ipfo koke kyemhamba nyo ngamhutso sonupfo, kya indi chando lulemuwia shose njia ya wulohi na wudo ikushela lilya lyadu lya ko Tito likawemba lya lohi.

¹⁵ Na mrima foke fukukerye nanyo foengeṟa imkunda ili aitamuo yanguya madu lyanu mose chando mulemwambya muwei na wuowwu na iiṟewe.

¹⁶ Ngachihio nyi kipfa ngamba mṟamtsu kyanu kui shindo shose.